ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގެ ކައުންޓަރުތަކުން ދޭ ހިދުމަތްތައް ފުޅާކޮށް އަވަސް ކުރުމުގެ އިންތިޒާމްތަކާ އެކު އެ އެޖެންސީގެ އާ އޮފީހެއް ހުޅުވައިފި އެވެ.
އެކަމަށްޓަކައި އަމީނީ މަގުގައި ހުންނަ މ. ދޮންވެލީގައި މިއަދު ބޭއްވި ރަސްމިއްޔާތެއްގައި އެންސްޕާގެ އާ އޮފީސް ހުޅުވައިދެއްވީ ފިނޭންސް މިނިސްޓަރު އަހުމަދު މުނައްވަރެވެ.
އަލަށް ހުޅުވި އޮފީހާ ބެހޭގޮތުން އެންސްޕާގެ ސީއީއޯ މުޖުތަބާ އަލީ ޖަލީލް ވިދާޅުވީ، އެންސްޕާއިން އަބަދުވެސް މަސައްކަތްކުރަނީ ރައްޔިތުންނަށް ފަސޭހަކަމާއެކު ހިދުމަތް ލިބޭނެ ގޮތް ފަހިކޮށްދިނުމަށް ކަމަށެވެ. ކުރިން އެންމެ ދެ ކައުންޓަރުން ހިދުމަތްދެމުން އައި ނަމަވެސް އާ އޮފީހާއެކު ހިދުމަތްދޭ ކައުންޓަރުތަކުގެ އަދަދު ހަތަރަކަށް ބަދަލުކޮށްފައިވާކަން މުޖުތަބާ ފާހަގަކުރެއްވި އެވެ.
މުޖުތަބާ ވިދާޅުވީ އެކުންފުނީގެ ހިދުމަތްތައް މިއަދު ރައްޔިތުންނަށް ފޯރުކޮށްދެމުންދަނީ ބޭރު ގައުމުތަކުންވެސް ބަލައިގަންނަ ފެންވަރަކަށް ކަމަށާއި އާސަންދަ ކުންފުނީގެ ހިދުމަތްތަކަށް ބެލި ނަމަވެސް އެކަން ހާމަވާނެ ކަމަށެވެ. މީގެ ކުރިން ހަތް ދުވަހަށް ދެމިގެންދާ ހިދުމަތް 24 ގަޑިއިރަށް ކުރުވެފައިވާއިރު، އާސަންދައިގެ ހިދުމަތަކީ މިއަދު މުޅި ރާއްޖެ ބަލައިގަންނަ ހިދުމަތަކަށް ވެފައިވާ ކަމަށް މުޖުތަބާ ވިދާޅުވި އެވެ.
ފިނޭންސް މިނިސްޓަރު މުނައްވަރު ވިދާޅުވީ، އެންސްޕާއިން ފޯރުކޮށްދޭ ހިދުމަތްތައް ދުވަހެއް ދުވަހަކަށް ފުޅާވަމުންދާކަން ފާހަގަކުރެވޭ ކަމަށެވެ. ރައްޔިތުންނަށް ދޭ ހިދުމަތްތަކަކީ ޒަމާނީ ވަސީލަތްތައްކާ އެކު ދޭ ހިދުމަތްތަކަކަށް ހަދައި، ވީހާވެސް އަވަހަށް ހިދުމަތް ފޯރުކޮށްދިނުމަކީ ވަރަށް މުހިއްމު ކަމެއް ކަމަށާއި އެގޮތަށް މަސައްކަތް ކުރުމުގައި އެންސްޕާއަކީ ފާހަގަކޮށްލެވޭ އެޖެންސީއެއް ކަމަށް މިނިސްޓަރު ވިދާޅުވި އެވެ.
އެންސްޕާއިން މިއަދު ހުޅުވި އާ އޮފީހުގައި ނަންބަރަކާ ނުލައި މައުލޫމާތު ސާފުކޮށްދޭ ކައުންޓަރަކާއި ނަންބަރު ދޫކޮށްގެން ހިދުމަތްދޭ ހަތަރު ކައުންޓަރު ބަހައްޓާފައިވެ އެވެ. އެ ހަތަރު ކައުންޓަރުގެ ތެރެއިން އެއް ކައުންޓަރަކީ އިސް ރަށްވެހިންނަށާއި ނުކުޅެދުންތެރިކަން ހުންނަ ފަރާތްތަކަށާއި މާބަނޑު މީހުންނަށް ހިދުމަތްދޭ ކައުންޓަރެކެވެ. އެ ކައުންޓަރު ބެހެއްޓުމުގެ ބޭނުމަކީ އެފަދަ ފަރާތްތައް ކިއުގައި ގިނައިރު ނުބައިތިއްބާ އަވަހަށް ހިދުމަތް ދިނުން ކަމަށް އެންސްޕާއިން ބުންޏެވެ.