ސިއްރު ހިފެހެއްޓުމާއެކު އެޗްއައިވީ އަށް ޓެސްޓުކުރެވޭނެ ގޮތްތައް ހޮސްޕިޓަލްތަކުގައި ގާއިމްކޮށްފައި އެބަހުރި ކަމަށާއި، އެޗްއައިވީއަށް ޓެސްޓުކުރުމަށް ޖެހިލުން ނުވުމަށް ހެލްތު މިނިސްޓަރު އަބްދުއްﷲ ނާޒިމް އިބްރާހިމް އިލްތިމާސްކުރައްވައިފި އެވެ.
މިއަދު ފާހަގަކުރަމުންދާ ބައިނަލްއަގުވާމީ އެއިޑްސް ދުވަހުގެ މުނާސަބަތުގައި ޖުމްހޫރީ މައިދާނުގައި ބޭއްވި އެޗްއައިވީއަށް ސްކްރީންކޮށްދިނުމުގެ ހަވީރު ފައްޓަވައިދެއްވައި ވާހަކަފުޅު ދައްކަވަމުން މިނިސްޓަރު ނާޒިމް ވިދާޅުވީ، ރާއްޖެއަކީ ނިސްބަތުން އޭޑްސް ޖެހިފައިވާ މީހުން މަދު ގައުމަކަށް ވިޔަސް އެކަމުން ހިތްހަމަޖައްސާލައިގެން ތިބެވެން ނެތް ކަމަށެވެ. ދިވެހިން އަބަދު ދަތުރުކޮށް އުޅޭ ގައުމުތަކަކީ އެއިޑްސް ބަލީގައި ރާއްޖެއަށްވުރެ ކުރީގައި އުޅޭ ގައުމުތައް ކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވި ގޮތުގައި ބަލިން ރައްކާތެރިވުމުގެ ގޮތުން ޓެސްޓުކޮށް ޗެކްއަޕްތައް ގަވާއިދުން ހެދުމަކީ މުހިއްމު ކަމެކެވެ.
މިއަދުގެ ރަސްމިއްޔާތު ފެއްޓެވުމުގެ ގޮތުން މިނިސްޓަރުވެސް ވަނީ އޭޑްސް އަށް ޓެސްޓު ކުރެއްވުމަށް ސާމްޕަލް ދެއްވާފަ އެވެ.
ނާޒިމް ވިދާޅުވީ، މީހާގެ މައުލޫމާތު ސިއްރުކުރުމާއެކު އޭޑްސް ބަލީގެ ޓެސްޓު ހަދައިދިނުމުގެ ހިދުމަތް ހޮސްޕިޓަލްތަކުން ދެމުންދާއިރު، އެކަމަށް ނުކެރުމަކީ ރަނގަޅުގޮތެއް ނޫން ކަމަށެވެ. ނުރައްކާތެރި ބަލިތަކުން އަރައިގަނެވޭނީ ބަލިން ރައްކާތެރިވުމަށް ފިޔަވަޅު އެޅުމާއެކު އެހެން މީހުންނަށް ވެސް ރައްކާތެރިވުމުގެ ފިޔަވަޅުތަކަށް ހިއްވަރު ދީ ހޭލުންތެރިކޮށްގެން ކަމަށް އޭނާ ވިދާޅުވި އެވެ.
މުޖުތަމައެއް ހެޔޮ ގޮތުގައި ބައްޓަންކުރުމަށް ހޭލުންތެރިކުރުމަކީ މުހިއްމު ކަމެއް ކަމަށާއި ރާއްޖެއަކީ މިހާރުވެސް ސިއްހީ ދާއިރާ ފުޅާކޮށް ހަރުދަނާކުރުމަށް ބޮޑު ހޭދައެއް ކުރާ ގައުމެއްކަން މިނިސްޓަރު ފާހަގަކުރެއްވި އެވެ. ހެލްތު މިނިސްޓްރީން ކުރާ އެންމެ ބޮޑު އެއް މަސައްކަތަކީވެސް އެއީ ކަމަށާއި މީހުން ހޭލުންތެރިކުރުމުގެ މަސައްކަތް ކުރިއަށް އޮތްތަނުގައި މިހާރަށް ވުރެވެސް ބޮޑަށް ކުރިއަށްގެންދާނެ ކަމަށް މިނިސްޓަރު ވިދާޅުވި އެވެ.
އެމަނިކުފާނު ވިދާޅުވީ، ދުޅަހެޔޮ ސިއްހަތެއްގައި މީހުންނަށް ފަސޭހަކާމާއެކު ދިރިއުޅޭވޭ މުޖުތަމައަކަށް ރާއްޖެ ހެދުން ވަރަށް މުހިއްމު ކަމަށެވެ. ޒުވާނުން އެކި މައިދާންތަކުގައި ކުރާ ކަންކަމަކީ އެމީހުންނަށް ފައިދާކުރަނިވި އަސަރުތަކެއް ކުރާ ކަންތައްތަކެއް ކަމަށް ހަދަންޖެހޭ ކަމަށާއި ސިއްހަތަށް ގެއްލުންދެނިވި ކަންތައްތަކުން އެއްކިބާވާން ސަމާލުވާންޖެހޭ ކަމަށެވެ.
ހެލްތު މިނިސްޓްރީން މިއަދު ޖުމްހޫރީ މައިދާނުގައި ކުރިއަށްގެންދިޔަ ހަރަކާތުގައި ހިލޭ އެޗްއައިވީ ޓެސްޓު ހެދުމުގެ އިތުރަށް ދުވަހާ ގުޅޭ ބައެއް ހަރަކާތްތައް ވެސް ވަނީ ކުރިއަށް ގެންގޮސްފަ އެވެ.