ކުދި ކުށްތަކުގައި ޖަލުގައި ތިބި ގައިދީންނަށް މާފު ދިނުމަށް ރައީސް ނިންމަވާފައިވާތީ، އެކަން ތަންފީޒުކުރުމަށް ކުރަންޖެހޭ މަސައްކަތްތައް ފަށާފައިވާ ކަމަށް ހޯމް މިނިސްޓަރު އަޒްލީން އަހުމަދު ވިދާޅުވެއްޖެ އެވެ.
މިނިސްޓަރު އަޒްލީން މިއަދު އަވަސް އަށް ވިދާޅުވީ، ވަރަށް ކުދި ކުދި ކުށްތަކުގައި ޖަލު ހުކުމް ތަންފީޒު ކުރަމުންދާ ފަރާތްތަކަށް، އަލުން މުޖުތަމައަށް އެނބުރި އައިސް އިސްލާހުވެފައިވާ ދިރިއުޅުމެއް އުޅުމުގެ ފުރުސަތު ހޯދައިދޭން، އެފަދަ ފަރާތްތަކަށް މާފު ދިނުމަށް ރައީސް އަބްދުﷲ ޔާމީން ބޭނުންފުޅުވެ ވަޑައިގަންނަވާ ކަމަށެވެ. ނަމަވެސް މާފު ދޭ ކުށްވެރިންގެ ތެރޭގައި މާރާމާރީ އާއި މަސްތުވާތަކެތީގެ މައްސަލަތައް ފަދަ ބޮޑެތި މައްސަލަތަކުގައި ތުހުމަތުވާ ފަރާތްތައް ނުހިމެނޭނެ ކަމަށެވެ. މާފުދޭ ފަރާތްތައް ވެސް މުޖުތަމައަށް ދޫކުރާނީ ޝަރުތު ތަކެއްގެ ދަށުން ކަމަށް ވެސް ވިދާޅުވި އެވެ.
"ކުދި ކުށްތަކުގައި ޖަލުގައި ތިބި ގައިދީންނަށް މާފު ދިނުމަށް ރައީސް ގެންގުޅުއްވާ ވިސްނުންފުޅަކީ އެ ފަރާތްތަކަށް ރަނގަޅު ދިރިއުޅުމެއް އުޅޭނެ މަގު ފަހިކޮށްދިނުމަށް ރައީސް ގެންގުޅުއްވާ ވަރަށް ދީލަތި ވިސްނުންފުޅެއްގެ ތެރެއިން ނިންމަވާ ކަމެއް. އޭގެ ތެރޭގައި ބޮޑެތި ކުށްކުރާ މީހުން އެއްގޮތަކަށްވެސް ނުހިމެނޭނެ،" މިނިސްޓަރު ވިދާޅުވި އެވެ.
ކުށްވެރިންނަށް މާފު ދިނުމަށް ވާންޖެހޭ ތައްޔާރީތައް ވުމަށް ހާއްސަ ކޮމެޓީއެއް އުފައްދައި މަސައްކަތްތައް މިހާރު ފައްޓަވާފައިވާ ކަމަށް މިނިސްޓަރު އަޒްލީން ވިދާޅުވި އެވެ. އޭގެ ތެރޭގައި ކުށްވެރިން ދޫކުރާނެ އުސޫލުތަކާއި ޝަރުތުތަކާއި ގަވާއިދުތަކުގެ އިތުރަށް، އެމީހުން ޖަލުން ދޫކޮށްލާ ހިސާބުން މުޖުތަމައުގައި އުޅޭނެ ގޮތްތަކާއި ދީނީ އަދަބުތަކާއި އާއިލީ ގުޅުންތައް ފަދަ މުހިއްމު ކަންކަން ނިންމުން ހިމެނޭ ކަމަށް މިނިސްޓަރު ވިދާޅުވި އެވެ.
"މި ކަމަކީ ވަރަށް ބޮޑު މަސައްކަތެއް. ވަރަށް ގިނަ ވިސްނުންތަކަކާއެކު ނިންމަންޖެހޭ ކަމެއް. ދޫކޮށްލާ މީހުން ހަމައެކަނި ދޫކޮށްލެވުމުން އަދި ނިމުނީއެއް ނޫން. އެމީހުން މުޖުތަމައުގައި އުޅެނީ ކިހިނެއްތޯ އާއި، އެމީހުންނަށް ބަދަލުތަކެއް އަތުވެއްޖެކަން ކަށަވަރުކުރުމާއި މިފަދަ ކަންކަމަކީ ވަރަށް ރަނގަޅަށް މޮނިޓާ ކުރަންޖެހޭ ކަންކަން. އެހެންވީމަ މި މަސައްކަތްތައް ވަރަށް ބާރަށް އެބަ ކުރިއަށްދޭ،" އަޒްލީން ވިދާޅުވި އެވެ.
އެކަންކަން ނިމުނުހާ އަވަހަކަށް ނިންމުން ތަންފީޒުކުރާނެ ކަމަށްވެސް ވިދާޅުވި އެވެ.
އަޒްލީން ވިދާޅުވީ، ކުށްވެރިންނަށް މާފުދޭނީ ވަރަށް ގިނަ މީހުންނަށް އެއްފަހަރާ ނޫން ކަމަށާއި އެކި ދުވަސްތަކުގެ މަތިން ކަމަށެވެ. އެހެންކަމުން އެ ނިންމުމުގެ ސަބަބުން މުޖުތަމައަށާއި އެ ފަރާތްތަކާއި އެ ފަރާތްތަކުގެ އާއިލާތަކަށް ހިތްހަޖެހުމާއި ހެޔޮ ބަދަލު އަންނާނެ ކަމަށެވެ.
"ކުށްވެރިން ދޫކުރާއިރު ވެސް ވަރަށް ގިނަ ކަންތައްތަކެއް ބަލާނެ. އެމީހުންނަށް ދީނީ ނަސޭހަތް ދިނުމާއި މިފަދަ ވަރަށް ގިނަ ކަންކަން އޮންނާނެ. 20 ވަރަކަށް ދުވަހުގެ ޕްރޮގްރާމެއް އެމީހުންނަށް ހިންގާނެ. އާ ފުރުސަތުގެ މުހިއްމުކަން ވިސްނައިދީ ނަސޭހަތް ދިނުން އޮންނާނެ،"
ކުދި ކުށްތަކުގައި ގައިދުގައިތިބި ކުށްވެރިންނަށް މާފުދޭން ރައީސް ނިންމަވާފައިވާއިރު، އެމަނިކުފާނުގެ ވެރިކަމުގެ ކުރީކޮޅު ވެސް ވަނީ ކުށްވެރިންތަކަކަށް މާފު ދީފަ އެވެ. އަދި އެއް ފަހަރު ކުށެއް ކޮށްފައިވާ ޒުވާނުންގެ ކުށުގެ ރެކޯޑް ސާފުކުރުމުގެ މަސައްކަތްތަކެއް ވެސް ވަނީ ކޮށްފަ އެވެ.