ހއ. ދިއްދޫގައި މޫދަށް އެރި އުޅުނު އަންހެނަކު ގެނބިގެން މިއަދު މަަރުވެއްޖެ އެވެ. މަރުވެފައިވަނީ އެރަށު ބަހާރުގެ، ނަސީމާ އަބްދުﷲ 55، އެވެ.
ދިއްދޫ ކައުންސިލުން ބުނީ، ނަސީމާ މަރުވީ އޭނާގެ ރަހުމަތްތެރިންނާއެކު އެރަށު އަލަށް ކޮނުނު ސަރަހައްދުގެ މޫދަށް އެރި އުޅެނިކޮށް މިއަދު ހެނދުނު 6:30 ހާއިރު ކަމަށެވެ. ނަސީމާ އަކީ އާދަކޮށް ކަސްރަތަށް މޫދަށް ގޮސް އުޅޭ މީހެއް ކަމަށާއި ނަމަވެސް މިއަދު މޫދަށް ދިޔައީ ނުގޮސް ދުވަސްކޮޅަކު ހުރުމަށް ފަހު ކަމަށް ކައުންސިލުން ބުންޏެވެ.
"އެއީ އާންމުކޮށް އެ އުމުރުގެ އެހެން މީހުންނާއެކު މޫދަށް ގޮސް އުޅޭ މީހެއް. ކަސްރަތަށް ކަމަށް ބޮޑަށް ބެލެވެނީ،" ކައުންސިލް މެންބަރު އިސްމާއިލް ނަސީރު ވިދާޅުވި އެވެ.
ނަސީރު ވިދާޅުވީ، ދިއްދޫ ސިއްހީ މަރުކަޒަށް ނަސީމާ ގެންދިޔަ އިރު ކޮންމެވެސް ވަރަކަށް ނޭވާލާ ކަމަށާއި، މަރުވީ ފަރުވާ ދެމުން ދަނިކޮށެވެ. ނަސީމާ މަރުވި އިރު ދަރިއަކާއި މާމަ ކިޔާ ތިން ކުދިން އެބަތިއްބެވެ.
"ފުލުހުންނާއި ހޮސްޕިޓަލުން ހުރިހާ ކަމެއް ބެލުމަށްފަހު މިހާޜު މައްޔިތާ ވަޅުލުމުގެ ކަންކަން ކުރިއަށް ދަނީ،" ނަސީރު ވިދާޅުވި އެވެ.