ހުޅުމާލޭގެ ފުރަތަމަ ފިޔަވަހީގައި އަޅާފައިވާ ފްލެޓްތަކުގައި ގަވާއިދާ ހިލާފަށް ހަދާފައިވާ ތަންތަނާއި އިމާރާތްތައް ނެގުމަށް ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) އިން ދީފައިވާ މުއްދަތު ހަމަވުމާއެކު، ނުގަވާއިދުން ހުރި ތަންތަން ނެގުމުގެ މަސައްކަތް އެކުންފުނިން ފަށައިފި އެވެ.
ހުޅުމާލޭގެ ފުރަތަމަ ފިޔަވަހީގެ ބައެއް ފްލެޓްތަކުގެ ގްރައުންޑް ފްލޯގައި އުޅޭ ފަރާތްތަކުން ފްލެޓްތަކުގެ ގާޑަން ސްޕޭސްގެ ގޮތުގައި އޮންނަ ހުސް ޖާގައިގައި ގަވާއިދާ ހިލާފަށް ތަންތަނާއި އިމާރާތްތައް އަޅަމުންދާތީ އެކަން ހުއްޓާލައި، އެތަންތަން ހުސްކުރުމަށް މީގެ ދެމަސްކުރިން ވަނީ 60 ދުވަހުގެ މުއްދަތެއް ދީފަ އެވެ.
އެ މުއްދަތު ހަމަވީ އިއްޔެ އަށެވެ. މުއްދަތު ހަމަވުމާއެކު އެޗްޑީސީން ވަނީ ގަވާއިދާ ހިލާފަށް ހުރި ތަންތަން ނަގައި، އެތަންތަން ހުސްކުރަން ފަށާފަ އެވެ.
އެޗްޑީސީގެ ޑިރެކްޓާ އަހުމަދު ފާތިހު މިއަދު "އަވަސް" އަށް ވިދާޅުވީ، އެޗްޑީސީގެ އެންގުމާ އެއްގޮތަށް ގަވާއިދާ ހިލާފަށް ހުރި ތަންތަން ހުސްކުރި ކަމަށެވެ. ނަމަވެސް އަދިވެސް ގިނަ ފަރާތްތަކުން އެ ގަވާއިދާ އެއްގޮތަށް އަމަލުކޮށްފައި ނުވާތީ އެތަންތަން ހުސްކުރަން އެޗްޑީސީން މަސައްކަތް ފަށާފައިވާ ކަމަށް ވިދާޅުވި އެވެ.
ހުޅުމާލޭގެ ސޯޝަލް ހައުސިން ޔުނިޓްތައް އިމާރާތްކޮށްފައިވާ ގޮތުން ކޮންމެ ފްލެޓެއްގެ ދެމެދުގައި ފުދޭ ވަރެއްގެ ބޮޑު ހުސް ޖާގައެއް ދޫކޮށްފައި އޮވެ އެވެ. އެގޮތަށް ޖާގަ ދޫކޮށްފައި އޮންނަ އެންމެ ބޮޑު ބޭނުމަކީ ފްލެޓްތަކުގައި ދިރިއުޅޭ މީހުންނަށް ޕާކިން ސްޕޭސް ހޯދައިދިނުމާއި، އެމަޖެންސީ ހާދިސާއެއް ހިނގުން ފަދަ ހާލަތެއް އަތުވެއްޖެ ހިނދެއްގައި ފަސޭހައިން އެހީތެރިކަން ފޯރުކޮށްދެވޭނެ ޖާގަ ހޯދައިދިނުމެވެ.
ފާތިހު ވިދާޅުވީ، ތަންތަން ހުސްކުރަމުންދަނީ ފްލެޓްތަކުގެ މީހުންނާ މަޝްވަރާކުރުމަށްފަހު އެ ފަރާތްތަކަށް މަސައްކަތް ދާ ގޮތް އަންގައިގެން ކަމަށެވެ.
"ތަންތަން ނެގުމުގެ މަސައްކަތް ފެށިއަސް، މިކަން ކުރިއަށް ގެންދަނީ އެ ފަރާތްތަކާ މަޝްވަރާ ކޮށްގެން. މީގެ ސަބަބަކަށް މިވަނީ ބައެއް ފަރާތްތަކުން މިގޮތަށް ހަދާފައި ހުރި ތަންތަނުގައި ދިރިވެސް އެބަ އުޅޭ، އެފަދަ ތަންތަން ވެސް ހުސްކުރަން އެކަށޭނަ މުއްދަތެއް ދެ މަހުގެ މުއްދަތަކީ. ދެން އަނެއްކާ މުއްދަތެއް އަޅުގަނޑުމެންނަކަށް ނުދެވޭނެ، އެހެން ނަމަވެސް އެ މީހުންގެ މަސްލަހަތާ ވެސް ގުޅިފައި އޮތް ކަމަކަށް ވާތީ، އެ ތަންތަނަށް ވަނުމުގެ ކުރިން މަޝްވަރާ ކުރަން ޖެހެނީ،" ފާތިހު ވިދާޅުވި އެވެ.
ހުޅުމާލޭގައި ފުރަތަމަ އެޅި ބައެއް ހައުސިން ޔުނިޓްތަކުގެ ތެރެއިން 116 ހައުސިން ޔުނިޓެއްގައި ގަވާއިދާ ހިލާފަށް ގާޑަން ސްޕޭސް ބޭނުންކުރުމުގެ އެކި މައްސަލަތައް ހުރި އިރު، އޭގެ ތެރެއިން ގިނަ ފްލެޓްތަކުގައި އެގޮތަށް އަޅާފައިވާ އިމާރާތްތަކަކީ ކުއްޔަށް ދިނުމަށް އަޅާފައިވާ ތަންތަނެވެ.
ފާތިހު ވިދާޅުވީ، ގަވާއިދާ ހިލާފަށް ހުރި ތަންތަން ނެގުމުގެ މަސައްކަތް މިއަދު ފަށާފައިވާއިރު، ކުރެވުނު މަޝްވަރާތަކުން މިހާތަނަށް ވެސް ގިނަ ބަޔަކު ކުންފުންޏަށް އެއްބާރުލުން ދެމުންދާ ކަމަށެވެ.
ގާވާއިދުގައި އޮންނަ ގޮތުން އެޗްޑީސީން މީހަކަށް ބިމެއް ނުވިއްކާހާ ހިނދަކު ހުޅުމާލޭގެ ބިމަކީ ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ)ގެ މިލްކިއްޔާތެކެވެ. އެހެންކަމުން އެ ކުންފުނީގެ ބިމެއްގައި އާންމު ފަރާތަކުން، އަދި އެނޫން ވެސް ފަރާތަކުން ހުއްދަ ހޯދުމަކާ ނުލައި އިމާރާތް ކުރުމާއި، ތަނެއް ތަރައްގީ ކުރުމަކީ މަނާ ކަމެކެވެ.