ފުލުހުންނަށް ތަމްރީންދޭ އެކަޑަމީއެއް ގާއިމްކުރުމަށް ފުލުހުންގެ އިދާރާއަށް ގުޅިފަޅުން ބިމެއް ދޫކޮށްފި އެވެ.
ގުޅީފަޅު އިންވެސްޓްމަންޓާއި ފުލުހުންގެ އިދާރާއިން މިއަދު ބޭއްވި ރަސްމިއްޔާތެއްގައި ޕޮލިސް ސާވިސްގެ ފަރާތުން އެއްބަސްވުމުގައި ސޮއިކުރެއްވީ ކޮމިޝަނާ އޮފް ޕޮލިސް އަހުމަދު އަރީފް އެވެ. ގުޅިފަޅު އިންވެސްޓްމަންޓް ލިމިޓެޑްގެ ފަރާތުން އެކުންފުނީގެ މެނޭޖިން ޑިރެކްޓާ އަބްދުﷲ ފަޒީލް އެވެ.
ގުޅިފަޅުގައި ފުލުހުން ތަމްރީންކުރާ އެކަޑަމީއެއް ގާއިމްކުރުމާ ގުޅޭގޮތުން ވާހަކަފުޅު ދައްކަވަމުން ކޮމިޝަނާ އަރީފް ވިދާޅުވީ، ރައްޔިތުން ބޭނުންވާފަދަ ހިދުމަތެއް ދިނުމަށް ފުލުހުންނަށް ބޭނުންވާ ތައުލީމާއި ތަމްރީން ފޯރުކޮށްދިނުމުގައި ދަތިތަކެއް އެބަހުރިކަމަށެވެ. އެ ދަތިތައް ހައްލުކުރުމަށް ގިނަ މަސައްކަތްތަކެއް ކުރައްވަމުން ގެންދަވާކަމަށް ކޮމިޝަނަރު ވިދާޅުވި އެވެ. މިއަދު ސޮއިކުރި އެއްބަސްވުމާއެކު އެ މަސައްކަތަށް ވަރަށްބޮޑު ކާމިޔާބެއް ލިބިއްޖެ ކަން ފާހަގަ ކުރެއްވި އެވެ.
"ފުލުހުންނަށް ތަމްރީން ދިނުމަށްޓަކައި ތަމްރީން މަރުކަޒެއް ގާއިމްކުރެވިގެން ދިޔުމާއެކު ޤގައުމަށާއި ރައްޔިތުންނަށް އެކަމުގެ ލާބަޔާއި މަންފާ ލިބިގެންދާނެ، ރައްޔިތުންނަށް ހިދުމަތް ދިނުމަށް ތަމްރީނާއި ހުނަރު ލިބިފައިވާ ޕްރޮފެޝަނަލް ބަޔަކަށް ފުލުހުން ހެދުމަށް މި މަރުކަޒުން މަސައްކަތްތަކެއް ކުރެވިގެންދާނެ،" އަރީފް ވިދާޅުވި އެވެ.
މި އެއްބަސްވުމުގެ ދަށުން ގުޅިފަޅުގައި ޕޮލިސް އެކަޑަމީ ގާއިމްކުރުމަށް 240،000 އަކަފޫޓުގެ ބިމެއް 99 އަހަރަށް މޯލްޑިވްސް ޕޮލިސް ސާވިސްއަށް ލިބޭނެ އެވެ. ގުޅިފަޅުގައި ޕޮލިސް އެކަޑަމީއެއް އެޅުމަށް މަޖިލީހުން ފާސްކުރި މިދިޔަ އަހަރުގެ ބަޖެޓްގައި ވެސް ވަނީ ހިމަނައިފަ އެވެ.