ގއ. ގެމަނަފުށީގެ މިސްކިތާއި އައިސް ޕްލާންޓް ރައީސް އަބްދުﷲ ޔާމީން މިއަދު ހުޅުވައިދެއްވައިފި އެވެ.
ގެމަނަފުށީގައި މިއަދު އަލަށް ހުޅުވި މިސްކިތަށް ކިޔަނީ މަސްޖިދުލް އިބްރާހީމް އެވެ. އެ މިސްކިތަކީ ގެމަނަފުށީ ބަޑިޔާގޭ އިބްރާހީމް އަހްމަދުގެ ހަނދާނުގައި ޝީޝާ ޕްރައިވެޓް ލިމިޓެޑުގެ ފަރާތުން ބިނާކުރި 700 މީހުންގެ ޖާގައިގެ މިސްކިތެކެވެ.
މިސްކިތް ހުޅުވުމުގެ ރަސްމިއްޔާތުގައި ޝީޝާ ޕްރައިވެޓް ލިމިޓެޑުގެ ފަރާތުން އަހުމަދު ހަސަން މަނިކުވަނީ މަސްޖިދުލް އިބްރާހީމްގެ މިހުރާބެއް ރައީސުލްޖުމްހޫރިއްޔާއަށް ވެދުމަށް އަރުވާފައެވެ.
މިސްކިތް ހުޅުވައިދެއްވުމުގެ ރަސްމިއްޔާތަށްފަހު ރައީސް ވަނީ ގެމަނަފުށީގެ ބަނދަރު ސަރަހައްދުގައި ގާއިމުކޮށްފައިވާ އައިސް ޕްލާންޓް ވެސް ހުޅުވައިދެއްވާފަ އެވެ. ސަރުކާރުގެ ލޯން ސްކީމްގެ ދަށުން 3.75 މިލިއަން ރުފިޔާ ހަރަދުކޮށްގެން މިފްކޯގެ ފަރާތުން ގެމަނަފުށީގައި ގާއިމްކުރި އެ އައިސް ޕްލާންޓުން ދުވާލަކު 25 ޓަންގެ އައިސް އުފެއްދޭނެއެވެ.
އިބްރާހިމް މިސްކިތާއި އައިސް ޕްލާޏްޓްގެ އިތުރުން ރައީސް ވަނީ އެރަށު ޒުވާނުން ހަދާފައިވާ ހިތްފަސޭހަ ދެ މައިޒާނެއްވެސް ހުޅުވައިދެއްވާފަ އެވެ.
ރައީސް ޔާމީން ގެމަނަފުއްޓަށް މިއަދު ކުރައްވާ ދަތުރުފުޅަކީ އެރަށުގައި ފާހަގަކުރާ މި އަހަރުގެ މަސްވެރިންގެ ދުވަހުގެ ހަރަކާތްތައް ބައްލަވާލައްވައި، މިރޭ އެރަށުގައި ބާއްވާ ދުވަހުގެ ޖަލްސާގައި ބައިވެރިވެވަޑައިގެންނެވުމަށް ކުރައްވާ ދަތުރުފުޅެކެވެ.
ރާއްޖޭގެ މަސްވެރިންގެ ދުވަހަކީ ޑިސެމްބަރު މަހުގެ ދިހަ ވަނަ ދުވަހެވެ. ނަމަވެސް މަސްވެރިންގެ ދުވަހުގެ ޖަލްސާ ބާއްވަނީ މިރޭ 8:30 ގަ އެވެ.