"ބެޔަސް ނުބެޔަސް" ސްކީމް މަސްވެރިން މިހާރު ބޭނުމެއް ނުވޭ: ޝައިނީ

ރާއްޖޭގެ މަސްވެރިންނަކީ މިއަދު ނަފާވާ ބައެއް ކަމަށާއި، "ބެޔަސް ނުބެޔަސް" ސްކީމުން ދޭ 10،000 ރުފިޔާގެ ބޭނުން ނުޖެހޭ ވަރަށް ކޮންމެ މަސްވެރިއަކަށް ވެސް މިހާރު އާމްދަނީ ލިބޭ ކަމަށް ފިޝަރީޒް މިނިސްޓަރު މުހައްމަދު ޝައިނީ ވިދާޅުވެއްޖެ އެވެ.

ރާއްޖޭގެ މަސްވެރިންގެ ދުވަސް ފާހަގަކުރުމަށް މިރޭ ގއ. ގެމަނަފުށީގައި ބޭއްވި ޖަލްސާގައި ވާހަކަފުޅު ދައްކަވަމުން މިނިސްޓަރު ޝައިނީ ވިދާޅުވީ، "ބެޔަސް ނުބެޔަސް" ސްކީމަކީ މިހާރު މަސްވެރިންގެ ޝަކުވާއެއް ނޫން ކަމަށެވެ. އެއީ ހަމައެކަނި އިދިކޮޅު ފަރާތްތަކުން ކުރާ ޝަކުވާއަކަށްވެ ނިމިއްޖެ ކަމަށް މިނިސްޓަރު ވިދާޅުވި އެވެ.

"ރާއްޖޭގެ މަސްވެރިކަމުގެ ދާއިރާއަށް އައި ކުރިއެރުމާއެކު ބެޔަސް ނުބެޔަސް އިން ދޭ 10،000 ރ. އަށް ބޭނުން ނުޖެހޭ ވަރަށް މިއަދުގެ މަސްވެރިންނަށް ނަފާވަމުންދޭ،" މިނިސްޓަރު ވިދާޅުވި އެވެ.

އާންމުކޮށް އިންޝްއަރެންސް ސްކީމްތަކަކީ ބަޔަކަށް ލިބޭ އެއްޗަކަށްވުރެ ގިނައިން ފައިސާ ލިބޭ އެއްޗެއްކަން ފާހަގަ ކުރައްވަމުން މިނިސްޓަރު ވިދާޅުވީ އެ ސްކީމްގައި ބައިވެރިވެފައި ތިބި މަސްވެރިންނަށް މިހާރު ވެސް ފައިސާ ލިބޭ ކަމަށެވެ. މިނިސްޓަރު ވިދާޅުވީ މަސްވެރިންނަށް ހާއްސަ އިންޝްއަރެންސް ސްކީމެއް ރާއްޖޭގައި އުފެދިފައި އޮތުމަކީ ފަހުރުވެރިވާ ކަމެއް ކަމަށެވެ.

"މަސްވެރިން މިއަދު ވިދާޅުވަނީ، ތިމަންނަ މެންނަށް ސަރުކާރުން ދޭ ރުފިޔާއަށްވުރެ ގިނައިން ރުފިޔާ ލިބޭ އިރު، އެއަށްވުރެ މަދުން ލާރި ލިބޭ ސްކީމެއްގައި ބައިވެރިވުމަކީ ކަންބޮޑުވުމެއް ނޫނޭ. އިރާދަ ކުރެއްވިއްޔާ ކޮންމެ މަސްވެރިއަކަށްވެސް މިއަދު ބެޔަސް ނުބެޔަސް ސްކީމުން ދޭ މިންވަރަށްވުރެ ގިނައިން ފައިސާ ލިބޭ،" މިނިސްޓަރު ވިދާޅުވި އެވެ.

ޝައިނީ ވިދާޅުވި ގޮތުގައި ރައީސް ޔާމީންގެ ސަރުކާރުން މަސްވެރިންގެ ދާއިރާ ތަރައްގީކުރަން މަސައްކަތްކުރަނީ ފާއިތުވި 30 އަހަރު ދާއިރާ ތަރައްގީކުރަމުން ދިޔަ ސްޕީޑަށްވުރެ އެތަކެއް ގުނަ ބާރު މިނުގަ އެވެ. މަސްވެރިކަމާއި ދަނޑުވެރިކަމަކީ އިގްތިސާދުގެ އެންމެ މައި ދެ ތަނބަށް ހެދުމަކީ ރައީސް ޔާމީންގެ ވިސްނުންފުޅެއް ކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވި ގޮތުގައި އެ އަމާޒުގެ ދަށުން ކުރަންޖެހޭ ހުރިހާ މަސައްކަތެއް އަންނަނީ ކުރަމުންނެވެ.

ޝައިނީ ވިދާޅުވީ، ރައީސް ޔާމީން ވެރިކަމަށް ވަޑައިގެންނެވުމަށްފަހު މަސްވެރިކަމުގެ ދާއިރާ ކުރިއަރުވަން ކުރި މަސައްކަތުން 72،000 ރުފިޔާގެ އާމްދަނީއެއް ލިބޭ ދޮށީގެ މަސްވެރިކަމުން، މިހާރު 12 މިލިއަން ރުފިޔާ ލިބޭ ކަމަށެވެ.

ޝައިނީ ވިދާޅުވީ މަސްވެރިންގެ ފަރާތުން ކުރިން ލިބެމުން ދިޔަ އެތަކެއް ޝަކުވާ މިހާރު މަދުވެފައިވާ ކަމަށެވެ. އެއީ ދާއިރާ ރަނގަޅުވަމުންދާކަމުގެ ހެއްކެއް ކަމަށް ޝައިނީ ވިދާޅުވި އެވެ. ސަރުކާރުގެ އަމާޒު ހުރީ ގިނަ ޒުވާނުން މަސްވެރިކަމުގެ ދާއިރާއަށް ނެރެ ޒުވާން މަސްވެރިން އުފެއްދުމަށެވެ. އަދި މަސްވެރިކަމުގެ ނަފާ އިތުރު ކުރުމަށް މަސްވެރިކަމުގެ އެކި ބާވްތަކުގެ މަސައްކަތްތައް ފުޅާކުރުމަށް މަސައްކަތް ކުރަމުން އަންނަ ކަމަށް ވެސް މިނިސްޓަރު ވިދާޅުވި އެވެ.