ބިދޭސީ މަސައްކަތްތެރިންނަށް ގާނޫނުތަކުން ލިބިދޭ ހައްގުތަކަށް އަރައިގަނެ، އެމީހުންގެ ހައްގުތައް ނިގުޅައިގަންނަ ފަރާތްތަކަށް ހަރުކަށި އަދަބު ދިނުމަށް ކަމާ ބެހޭ އިދާރާތަކަށް ހިއުމަން ރައިޓްސް ކޮމިޝަން (އެޗްއާރްސީއެމް) އިން މިއަދު ގޮވާލައިފި އެވެ.
މިއަދު ފާހަގަކުރާ ދުނިޔޭގެ ބިދޭސީ މަސައްކަތެރިންގެ ދުވަހުގެ މުނާސަބަތުގައި އެޗްއާރްސީއެމުން ނެރުނު ބަޔާނެއްގައި ބުނީ، ބިދޭސީންގެ ހައްގުތަށް ގެއްލި އެމީހުންގެ ކަރާމާތަށް ނުރައްކާވާ ގިނަ މައްސަލަތައް ރާއްޖޭގައި އެބަހުރި ކަމަށެވެ. ބިދޭސީ މީހުންނަށް ރާއްޖޭގައި ނުހައްގުން ގިނަ އަނިޔާތަކެއް ލިބޭ ކަމަށް އެޗްއާރުސީއެމް އިން ބުންޏެވެ. އެގޮތުން ރާއްޖޭގައި، ބިދޭސީންގެ ހައްގުތަކަށް ހުރުމަތްތެރިކޮށް ނުހިތުމުގެ މައްސަލަތައް ގިނަވުމުގެ ނަތީޖާއެއްގެ ގޮތުން، އެމެރިކާގެ ސްޓޭޓް ޑިޕާޓްމަންޓުން ނެރޭ ހިއުމަން ޓްރެފިކިން ވޮޗްލިސްޓްގެ ދެވަނަ ހަރުފަތުގެ ގައުމެއްކަން އެޗްއާރުސީއެމް އިން ވަނީ ފާހަގަކޮށްފަ އެވެ.
އެމެރިކާގެ ސްޓޭޓް ޑިޕާޓްމަންޓްގެ ވޮޗްލިސްޓަށް އަރާ ގައުމުތަކަކީ ވަކި ހާއްސަ އުސޫލެއްގެ ދަށުން އިންސްޕެކްޓް ކުރާ ގައުމުތަކެކެވެ.
ބިދޭސީންގެ ހައްގުތަކަށް ނިގުޅައިގަނެވޭ ގޮތަށް، އެ މީހުން ލައްވައި މުސާރަ ނުދީ މަސައްކަތް ކުރުވުމާއި، ޕާސްޕޯޓާއި އެހެނިހެން ލިޔެކިޔުންތައް ހިފެހެއްޓުމާއި، ބިރުދައްކައިގެން ގަދަކަމުން މަސައްކަތްކުރުވުމުގެ އިތުރަށް އެމީހުންނާ މެދު ހިންގާ ލާއިންސާނީ އަމަލުތައް ރާއްޖޭގައި ހިންގާކަށް ފާހަގަކުރެވޭ ކަމަށް އެ ބަޔާނުގައި ބުންޏެވެ.
"ދިވެހިރާއްޖޭގައި ދިރިއުޅޭ ބިދޭސީ މަސައްކަތްތެރިންގެ ޙައްޤުތަކާއި އެބައިމީހުންގެ އިންސާނީ ކަރާމަތަށް އުނިކަން އަންނަ ގޮތަށް ހިންގާ ޢަމަލުތަކުގެ ސަބަބުން ދިވެހިރާއްޖެ ވަނީ އެމެރިކާގެ ސްޓޭޓް ޑިޕާޓްމަންޓްގެ ހިއުމަން ޓްރެފިކިން ވޮޗް ލިސްޓްގެ ދެވަނަ ހަރުފަތުގެ ވޮޗް ލިސްޓްގައި ހިމެނިފައެވެ. ބިދޭސީންނަށް އެކަށީގެންނުވާ މާހައުލުތަކުގައި މަސައްކަތްކުރުވުމާއި، ބިރުދައްކައިގެން ގަދަކަމުން މަސައްކަތްކުރުވުމާއި، ލާއިންސާނީ އަނިޔާގެ މައްސަލަތައް ރާއްޖޭގައި ފާހަގަކުރެވެއެވެ. މީގެއިތުރުން، ޝަރީއަތުގެ މަރުހަލާގައި ތަރުޖަމާނުން ނުލިބުމުގެ މައްސަލަތަކާއި، ޝަރީއަތް ލަސްވާކަމަށް ބުނެ ހަށަހަޅާފައިވާ މައްސަލަތަކާއި، ގަވާއިދާ ހިލާފަށް ބަންދުކުރުމުގެ މައްސަލަތައްވެސް ހިމެނެއެވެ،" ބަޔާނުގައި ބުންޏެވެ.
އެ ކޮމިޝަނުން ބުނީ ބިދޭސީން މަސައްކަތު މީހުންގެ ހައްގުތައް ގާނޫނުން ވެސް ރައްކާތެރިކޮށްދޭއިރު، އެ ގާނޫނުތައް ތަންފީޒުކުރެވެން ޖެހޭ ކަމަށެވެ. އެހެންކަމުން އަނިޔާ ލިބޭ ބިދޭސީންނަށް އެމީހުންގެ ހައްގުތަށް ކަށަވަރުކޮށްދީ، އެހައްގުތައް ނިގުޅައިގަންނަ ފަރާތްތަކާމެދު ގާނޫނީގޮތުން އަޅަންޖެހޭ އެންމެ ހަރުކަށި އަދަބުދިނުމަށް ކަމާބެހޭ އިދާރާތަކަށް އިލްތިމާސްކުރާ ކަމަށް ކޮމިޝަނުން ބުންޏެވެ.
ރާއްޖޭގައި ދިރިއުޅޭ ބިދޭސީ މަސައްކަތްތެރިންނަކީ ދިވެހިންގެ ދިރިއުޅުމާ ގުޅިފައިވާ ބަޔަކަށް ވީހިނދު، އެފަރާތްތަކާ އިހުތިރާމާއެކު މުހާތަބުކޮށް ގަދަރުކުރުމަށް އެޗްއާރްސީއެމުން ވަނީ އާންމުންނަށް އިލްތިމާސްކޮށްފަ އެވެ. އަދި، ބިދޭސީ މަސައްކަތްތެރިންގެ ހައްގުތަކަށް މުޖުތަމައު ހޭލުންތެރިކުރުވައި އެފަރާތްތަކުގެ ހައްގުތަކަށް އިހްތިރާމްކުރުމުގެ ސަގާފަތެއް ގާއިމްކުރުމަށްވެސް ވަނީ ނަސޭހަތްތެރިވެފަ އެވެ.
ބިދޭސީ މަސައްކަތްތެރިންގެ ދުވަހަކީ ކޮންމެ އަހަރެއްގެ ޑިސެމްބަރު މަހުގެ 18 ވަނަ ވަނަ ދުވަހު ދުނިޔޭގެ ފެންވަރުގައި ފާހަގަކުރާ ދުވަހެކެވެ.