ރާއްޖޭގެ މުނިފޫހިފިލުވުމުގެ ދާއިރާގެ އުފެއްދުންތަކުގެ ފެންވަރު ދުވަހެއް ދުވަހަކަށް ރަނގަޅުވެ، މުނިފޫހި ފިލުވުމުގެ ދާއިރާއިން މުޖުތަމައަށް ފައިދާހުރި ޕްރޮގްރާމްތަކެއް ނެރެވޭކަމީ ދާއިރާއަށް ރަނގަޅު މުސްތަގުބަލެއް އޮތްކަން ހާމަވާ ކަމެއް ކަމަށް ޔޫތު މިނިސްޓަރު އިރުތިޝާމް އާދަމް ވިދާޅުވެއްޖެ އެވެ.
ދަރުބާރުގޭގައި މިރޭ ކުރިއަށްދާ ގައުމީ ފިލްމް އެވޯޑްސް ހަފްލާ ޝަރަފުވެރި ކޮށްދެއްވާ ވާހަކަފުޅު ދައްކަވަމުން މިނިސްޓަރު އިރުތިޝާމް ވިދާޅުވީ، ރާއްޖޭގެ އާޓްސްގެ ދާއިރާ ތަރައްގީ ކުރަން މި ސަރުކާރުން ކުރަން ފެށި މަސައްކަތުގެ ދަށުން އާޓްސްގެ ރޮނގުން ގިނަ ޒުވާނުންތަކެއް ތަމްރީނާއި ތައުލީމު ހާސިލްކޮށްފައިވާ ކަމަށެވެ. އެއީ ދާއިރާއަށް ކުރެވޭ އުންމީދު ވަރަށް ބޮޑުތަން އިތުރުވާ ކަމެއް ކަމަށެވެ.
މިނިސްޓަރު ވިދާޅުވީ، ޕީއެސްއެމްގެ އިސްނެގުމާއެކު ފެށި އޮފީސްތަކުގެ ޓެލެޑްރާމާ މުބާރާތަކީ ވެސް ރާއްޖޭގެ މުނިފޫހިފިލުވުމުގެ ދާއިރާއަށް އިތުރު އާ ރޯކަމެއް ގެނެސްދިން މުބާރާތެއް ކަމަށެވެ. ގިނަ އަހަރުތަކެއްގެ މެދުކެނޑުމަކަށްފަހު މިއަހަރު ބޭއްވި ޓެލެޑްރާމާ މުބާރާތުން ވެސް ފެނިގެންދިޔައީ ހުނަރުވެރި ފަންނާނުންތަކެއްކަން މިނިސްޓަރު ފާހަގަކުރެއްވި އެވެ. އެ މުބާރާތުން ލިބޭ އެންމެ ވަރުގަދަ މެސެޖަކީ މުނިފޫހި ފިލުވުމުގެ ދާއިރާއިންވެސް މުޖުތަމައަށް މަންފާކުރުވަނިވި ވަރުގަދަ މެސެޖްތަކެއް ފޯރުކޮށްދީ، އެފަދަ ފިލްމުތަކުގެ ޕްރޮޑަކްޝަން ކާމިޔާބުކުރެވޭނެ ވަރުގެ ފަންނާނުން ރާއްޖޭގައި އަދިވެސް އެބަތިބި ކަން ކަމަށް ވެސް އިރުތިޝާމް ވިދާޅުވި އެވެ.
މިނިސްޓަރު ވިދާޅުވި ގޮތުގައި، އާޓްސްގެ ދާއިރާއިން ތައުލީމު ހާސިލްކުރާ ޒުވާނުން މިހާޜު ދަނީ ފާހަގަކޮށްލެވޭ ވަރަށް އިތުރުވަމުންނެވެ. އެގޮތުން މިހާތަނަށް ވެސް 200 އަށްވުރެ ޒުވާނުން ދާއިރާއިން ތަމްރީން ވެފައިވާކަން ފާހަގަކުރެއްވި އެވެ.