ކޮލަމްބޯއިން ފުރާ ފަސިންޖަރުން ފަސްގަޑިއިރު ކުރިން ޗެކިންވާން އަންގައިފި

ސްރީލަންކާގެ ބަންޑާރަނަޔަކަ އިންޓަނޭޝަނަލް އެއާޕޯޓުގެ ރަންވޭ މަރާމާތު ކުރުމުގެ މަސައްކަތަށް އަންނަ ޖެނުއަރީ މަހުގެ ހަވަނަ ދުވަހުން ފެށިގެން މާޗްމަހުގެ ނިޔަލަށް ކޮންމެ ދުވަހަކު ވެސް ވަކި ގަޑިއެއްގައި އެއާޕޯޓު ބަންދު ކުރާތީ ކޮލަމްބޯއިން ފުރާ ޕަސިންޖަރުން، ފްލައިޓު ޑިޕާޗާ ވަގުތުގެ ފަސް ގަޑި އިރު ކުރިން ޗެކިން ވުމަށް ސްރީލަންކަން އެއާލައިންސް އިން އިލްތިމާސްކޮށްފި އެވެ.

ބަންޑާރަނަޔަކަ އިންޓަނޭޝަނަލް އެއާޕޯޓު މަރާމާތަށް ބަންދުކުރަނީ އަންނަ ޖެނުއަރީ މަހުގެ ހަވަނަ ދުވަހުން މާޗް މަހުގެ ނިޔަލަށް، ކޮންމެ ދުވަހެއްގެ ހެނދުނު 8:30 އިން ފެށިގެން ހަވީރު 4:30 އަށެވެ.

ރާއްޖޭގައި ހުންނަ ސްރީލަންކަން އެއާލައިންގެ އޮފީހުން ބުނީ، ފަސް ގަޑިއިރު ކުރިން ޗެކިންވާން ފަސިންޖަރުންނަށް އަންގާފައި ވަނީ ބަންޑާރަ ނަޔަކަ އިންޓަނޭޝަނަލް އެއާޕޯޓްގެ ރަންވޭ ހަދަން އަށް ގަޑި އިރު ރަންވޭ ބަންދުކޮށްފައި ބާއްވަންޖެހޭތީ، ފުރުމުގައި ދިމާވެދާނެ މައްސަލައަކުން ރައްކާތެރިކުރުމުގެ ގޮތުން ކަމަށެވެ. އެހެންކަމުން އެކަމަށް ހުރިހާ ފަސިންޖަރުން ވެސް ސަމާލުވާން އެ އެއާލައިނުން ވަނީ އިލްތިމާސްކޮށްފަ އެވެ.

ލަންކާ އެއާޕޯޓް މަރާމާތުކުރުމުގެ މަސައްކަތް ކުރިއަށްދާތީ ރާއްޖެއާ ލަންކާއާ ދެމެދު ކުރާ ދަތުރުތައް ވެސް ދުވާލަކު ދެ ދަތުރަށް މަދުކުރަން ސްރީލަންކަން އެއާލައިނުން ވަނީ ނިންމާފަ އެވެ. އެގޮތުން މިމަހުގެ ހަ ވަނަ ދުވަހުން ފެށިގެން މާލެއާ ލަންކާއާ ދެމެދު ކުރާ ދަތުރުތައް މަދުކުރުމަށް ނިންމާފައިވާތީ ޓިކެޓް ނެގުމުގައި އެކަމަށް ސަމާލުކަން ދިނުމަށް ސްރީލަންކަން އިން ވަނީ އާންމުންނަށް އިލްތިމާސްކޮށްފަ އެވެ.

"ދުވާލަކު ދެ ފްލައިޓް ލަންކާ އަށް ދާގޮތަށް ހަމަޖެއްސީ ހެނދުނު 8:30 ގައި ލަންކާ އެއާޕޯޓް ބަންދުކުރާތީ ރަންވޭ ބަންދުކުރުމަށްފަހު ހުޅުވާނީ ހަވީރު ހަތަރެއްގެ ފަހުން ކަމަށް ވާތީ ދެވަނަ ފްލައިޓް ލަންކާއަށް ދާން މާލެއިން ފުރާނީ ހަވީރު ހަތަރެއްގެ ފަހުން،" އެ އެއާލައިނުން ބުންޏެވެ.

ލަންކާއާ ރާއްޖެއާ ދެމެދު މިހާރު ކުރަނީ ދުވާލަކު ހަތަރު ދަތުރެވެ. އެ އަދަދު ދެ ދަތުރަށް މަދުކުރަން ނިންމާފައިވަނީ، އެއާޕޯޓްގެ މަރާމާތަށް ރަންވޭ ބަންދުކުރާތީ ރަންވޭގެ ޓްރެފިކަށް ދިމާވެދާނެ މައްސަލައަކަށްޓަކައެވެ.

މީގެ ކުރިން ސްރީލަންކަން އިން ދިޔައީ ރާއްޖެއާ ލަންކާއާ ދެމެދު ފަސް ފްލައިޓް އޮޕަރޭޓްކުރަމުންނެވެ. ފަސް ދަތުރުން ހަތަރު ދަތުރަށް މަދުކުރަންޖެހުނީ، ހުޅުލެ އެއާޕޯޓްގެ ރަންވޭ ބޮޑުކުރުމަށް ފަށާފައިވާ މަޝްރޫއާ ގުޅިގެން ދަންވަރު ރަންވޭ ބަންދުކުރަންޖެހުމާ ގުޅިގެންނެވެ. މައުލޫމާތު ލިބޭ ގޮތުގައި ދަތުރުތަކުގެ އަދަދު އަނެއްކާވެސް ދަށް ވެގެން ދިއުމުން ސްރީލަންކަން އިން ދަނީ ދަންވަރު ފްލައިޓް އަލުން އޮޕަރޭޓް ކުރުމާމެދު މަޝްވަރާކުރަމުންނެވެ.