ވެށިފަހި މާލެ ގެދޮރުވެރި ޕްރޮގްރާމުގެ ދަށުން ދައުލަތަށް މިލްކުވެފައިވާ 37 ބިމެއް ވިއްކާލަން ނިންމައި، ބިން ގަތުމަށް ބޭނުންވާ ފަރާތްތަކަށް ސަރުކާރުން މަރުހަބާ ކިޔައިފި އެވެ.
ބިން ވިއްކަނީ އެ ބިމަކާއި އިންވެގެން އޮންނަ ފަރާތެއް ބިން ގަތުމަށް ހުށައަޅާފައިވާނަމަ އެފަރާތަކަށް އިސްކަންދޭ އުސޫލުންނެވެ. ވިއްކާލަން ހަމަޖެހިފައިވަނީ މާފަންނުން 12 ބިން، މައްޗަންގޮޅިން އަށް ބިން، ގަލޮޅުން ހަތެއް އަދި ހެންވޭރުން 10 ބިމެވެ. ބިން ވިއްކަނީ އަކަފޫޓަކަށް 2,000 ރުފިޔާގެ ރޭޓުންނެވެ.
ހައުސިން މިނިސްޓްރީން މިއަދު ކުރި އިއުލާނެއްގައި ބުނީ، ވެށިފަހި ޕްރޮގްރާމުން ސަރުކާރަށް ލިބުނު ބިންތައް ވިއްކުމާބެހޭ އުސޫލުގެ ދަށުން ބިން ގަތުމަށް ޝައިގުވެރިވާ، އެ ބިންތައް ހިމެނޭ ގޯތިތަކުގެ ބެހެނިވެރިންނަށާއި، އެ ބިންތަކާ އިންވެގެންވާ ގޯތިތަކުގެ ވެރިންނަށް އެ ފުރުސަތު ހުޅުވާލާފައިވާ ކަމަށެވެ. އެ ގޮތުން ބިން ގަންނަން ޝައުގުވެރިވާ ފަރާތްތަކުން ވެށިފަހި މާލެ ޕްރޮގްރާމްގެ ދަށުން ދައުލަތަށް މިލްކުވި ބިންތައް ވިއްކުމާބެހޭ އުސޫލުގައިވާ ފޯމު ފުރިހަމަކޮށް އެ މިނިސްޓްރީ އަށް ހުށަހެޅުމަށެވެ. ބިން ގަންތުމަށް ބޭނުންވާ ފަރާތްތަކަށް އެކަމަށް އެދި ހުށަހަޅަން ދީފައިވަނީ މިމަހުގެ ނިޔަލަށެވެ.
ވެށިފަހި ޕްރޮގްރާމުން ދައުލަތަށް މިލްކުވާ ފްލެޓް ވިއްކުމާ ބެހޭ އުސޫލުގެ ދަށުން ބިން ވިއްކާނީ އެ ބިމަކާއި އިންވެގެން އޮންނަ ފަރާތެއް ބިން ގަތުމަށް ހުށައަޅާފައިވާނަމަ އެފަރާތަކަށް އިސްކަންދޭ އުސޫލުންނެވެ. އެގޮތުން ވިއްކާ ބިން ގަންނަ ފަރާތުގެ ބިމާ އެއް އިންވެގެން އޮތްނަމަ ވިއްކާ ބިން އިތުރުކޮށް އެއް ރަޖިސްޓްރީއަކަށް ހެދިދާނެ ކަމަށް އުސޫލުގައި ބުނެފައިވެ އެވެ.
ވިއްކާލާ ބިމާއި އިންވެގެން އޮންނަ ބިމެއްގެ ވެރިފަރާތަކުން އެބިމެއް ގަތުމަށް ހުށަނާޅައިފިނަމަ ދެން އެބިންކޮޅެއް ވިއްކާނީ ބިޑް އުސޫލުން އެންމެ ބޮޑު އަގެއް ހުށައަޅާ ފަރާތަކަށް ކަމަށް އުސޫލުގައި ބުނެފައިވެއެވެ. އަދި އެކަކަށްވުރެ ގިނަ ބަޔަކު ބިން ގަތުމަށް ހުށަހަޅާއިފި ނަމަވެސް ބިން ވިއްކާނީ އެ ބިމުގެ އިމާ އެންމެ ކައިރިން ބިމެއް އޮތް ފަރާތަކަށް ކަމަށް އުސޫލުގައި ބުނެފައިވެ އެވެ.
ވެށިފަހި ގެދޮރުވެރިކުރުމުގެ ޕްރޮގްރާމުގެ ދަށުން ފްލެޓް ލިބުނު ފަރާތްތަކުން ދޫކޮށްލާ ބިންތައް ވިއްކުމާ ބެހޭ އުސޫލު ގެޒެޓްކޮށް، ބިންތައް ވިއްކާލަން ހައުސިން މިނިސްޓްރީން މިހާރު އިއުލާން ވެސް ކޮށްފައިވާއިރު، އެ ފްލެޓް ލިބުނު ބައެއް ފަރާޓްތަކުން އަދިވެސް ބިންތައް ދޫނުކޮށްލަ އެވެ. ހައުސިން މިނިސްޓްރީން ވަނީ ބިން ހުސް ނުކުރާ ފަރާތްތަކަށް ބިން ދޫކޮށްލަން ތިން މަސްދުވަހުގެ މުހުލަތެއް ދީފައެވެ.
ބިން ގަތުމަށް އެދޭ ފޯމް މިނިސްޓްރީ އާއި މިނިސްޓްރީގެ ވެބްސައިޓުން ލިބޭނެ އެވެ. އެކަމާ ބެހޭ މައުލޫމާތު މިނިސްޓްރީއަށް ގުޅައިގެން ސާފުކުރެވޭނެ އެވެ.
ވިއްކާލާ ގެތައް
މ. ސިލްވަރނެސްޓް، 112.03 އަކަފޫޓް
މ. ނަރުގިސްމާގެ، 266.66 އަކްފޫޓް
މ. ހުދުކަނީރުގެ، 111.4 އަކަފޫޓު
މ. ވެލީ ހޯމް، 171.23 އަކަފޫޓް
މ. ނިއު ހޯޕް، 155.68 އަކަފޫޓް
މ. އޯރކިޑްވިލާ، 261.5 އަކްފޫޓް
މ. ދެވެލި، 228.87 އަކަފޫޓް
މ. ސުތުލި، 295 އަކަފޫޓް
މ. ޝޭޑީ ރެސްޓް، 134.4 އަކަފޫޓް
މ. ޕަރުވާނާގެ، 288.8 އަކްފޫޓް
މ. ތްރީ ސިސްޓަރސް، 490.6 އަކަފޫޓު
މ. ވެސްޓް ސީ، 250 އަކަފޫޓް
މއ. އެރިޒޯނާ، 155 އަކްފޫޓް
މއ. ޤިސްމަތު، 173.1 އަކްފޫޓް
މއ. ރިއޯގްރޭންޑް، 150 އަކްފޫޓް
މއ. ބެރެބެދިހިޔާ، 196.75 އަކަފޫޓް
މއ. ދާނިއާ، 223 އަކްފޫޓް
މއ. ގްލާސްގެ، 182.78 އަކްފޫޓް
މއ. ހެނބޫދޫގެ، 166.9 އަކަފޫޓް
މއ. ފަތޮޅު، 254.59 އަކަފޫޓް
ގ. އަރޫޝާ މަންޒިލް، 87.285 އަކަފޫޓް
ގ. ހުދުގުލްއަލާގެ، 192.87 އަކަފޫޓް
ގ. ހުރަސްފަރު، 280 އަކަފޫޓް
ގ. ފުންފަޅު، 173.94 އަކަފޫޓް
ގ. އޯލްޕެރިސް، 164.2 އަކަފޫޓް
ގ. ސުނީތާ، 221.26 އަކަފޫޓް
ގ. ޖުވެލް، 230.9 އަކްފޫޓް
ހ. ސޯފިޔާ، 160.39 އަކްފޫޓް
ހ. ހީލިއަމް، 129.21 އަކްފޫޓް
ހ. އުދަރެސްގެ، 99.94 އަކްފޫޓް
ހ. މަރިޔަމްމާގެ، 127.5 އަކްފޫޓް
ހ. އައި.އެން ހައުސް، 140.89 އަކަފޫޓް
ހ. އިލާމާ، 228.57 އަކަފޫޓް
ހ. ބްރައުންހައުސް، 283 އަކަފޫޓް
ހ. ރެޖީނާ ހައުސް، 192.6 އަކަފޫޓް
ހ. ބްރެޑްލީ، 290 އަކްފޫޓް
ހ. މާކަރީ ހައުސް ، 288 އަކަފޫޓް