މޯލްޑިވްސް ބްލަޑް ސާވިސަސް އާ ގުޅިގެން އެމްޕީއެލް ގެ މުވައްޒަފުން ލޭހެދިޔާ ކުރުމުގެ ކޭމްޕެއް މިއަދު ފަށައިފި އެވެ.
އެމްޕީއެލްގެ މުވައްޒަފުންނަށް ހާއްސަކޮށްގެން ކުރިއަށްގެންދާ އެ ކޭމްޕް ފެށުމުގެ ގޮތުން އެމްޕީއެލްގެ ސީއީއޯ މުހައްމަދު ޖުނައިދު ވަނީ ލޭ ހަދިޔާކުރައްވާފަ އެވެ. މިއީ އެ ކުންފުނީގެ އިޖްތިމާއީ ޒިންމާގެ ދަށުން ފެށި ޕްރޮގްރާމެކެވެ.
ބްލަޑް ކޭމްޕް ފެށުމަށް މިއަދު ބޭއްވި ހަފްލާގައި ވާހަކަފުޅު ދައްކަވަމުން ސީއީއޯ ޖުނައިދު ވިދާޅުވީ، އެމްޕީއެލްގެ މުވައްޒަފުން މުޖުތަމައުގެ މަންފާއަށް ކުރާ އެކި މަސައްކަތްތަކުގައި ޝާމިލުކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ. މީގެ ކުރިން އެމްޕީއެލް އޮތީ ހަމަ އެކަނި "ބަނދަރު މަސައްކަތް" ކުރާ ބައެއްގެ ގޮތުގައި ކަމަށާއި އެ އާދަ ބަދަލުކުރުމަށް ކުރިއަށް އޮތްތަނުގައި ވެސް ގިނަ މަސައްކަތްތަކެއް ކުރާނެ ކަމަށް ޖުނައިދު ވިދާޅުވި އެވެ.
"ފާޑު ކިޔާ މީހުން ފާޑު ކިޔާ، އަޅުގަނޑު އެމްޕީއެލްއާ ގުޅުނު ފަހުން ޖޫގޯ ވިއްކަނީއޭ، ހެދިކާ ވިއްކަނީއޭ. ބުނަން ބޭނުންވަނީ، ޖޫގޯ ވެސް ވިއްކަންވީމަ ވިއްކާނަމޭ، މުޖުތަމައަށް ހިދުމަތްކުރަން ވެދެވެން ހުރި ހުރިހާ ދިމާލަކުން ވަންނާނަމޭ،" ޖުނައިދު ވިދާޅުވި އެވެ.
މިއަދު އެ ކުންފުނީގައި ފެށި އެ ކޭމްޕްގައި ބައިވެރިވެ، ލޭ ހަދިޔާކުރަން ކުންފުނީގެ 70 މުވައްޒަފަކު ވަނީ ރަޖިސްޓްރީކޮށްފަ އެވެ. މިއަދު ހަވީރާ ހަމަޔަށް އޮތް އެ ފުރުސަތުގައި އެއަށްވުރެ ގިނަ މުވައްޒަފުން ބައިވެރިވާނެ ކަމަށް އެމްޕީއެލުން ވަނީ ލަފާކޮށްފަ އެވެ.