މިދިޔަ އަހަރުގެ ޖީސީއީ އޯލެވެލް އަދި އައިޖީސީއެސްއީ އެސްއެސްސީ އިމްތިހާނުގެ ނަތީޖާތައް އޮންލައިންކޮށް ދޫކުރަން ފަށައިފި އެވެ. ނަތީޖާތައް ދޫކުރަން ފަށާފައިވަނީ މިއަދު 11:30 ހާއިރު އެވެ.
މިދިޔަ އަހަރު އޯ ލެވެލް ހެދި ސެންޓަރުތަކަށް އޮންލައިންކޮށް ނަތީޖާ ދޫކުރަން ފަށާފައިވާއިރު، ކެންޑިޑޭޓުންނަށް ނަތީޖާ ރަސްމީކޮށް ދޫކުރަން ފަށާނީ މާދަމާ އެވެ. އޮންލައިންކޮށް ދޫކުރާ ނަތީޖާ ބަލައިލެވޭނީ ހަމައެކަނި ސްކޫލްތަކުގެ އިސް ވެރިންނަށެވެ.
އެޑިއުކޭޝަން މިނިސްޓްރީން ބުނީ، މާދަމާ ހެނދުނު 8:30 ގައި ރާއްޖޭގައި އޯލެވެލް ހަދާ ހުރިހާ ސެންޓަރަކުން ނަތީޖާ ސްލިޕްތައް ރަސްމީޮށް ދޫކުރަން ފަށާނެ ކަމަށެވެ. ސްލިޕްތައް އަންނަ ފެބްރުއަރީ މަހުގެ ހަވަނަ ދުވަހާ ހަމައަށް ދޫކުރާނެ އެވެ. ނަތީޖާ ދޫކުރާނީ ބަންދު ނޫން ކޮންމެ ދުވަހެއްގެ ހެނދުނު 8:30 އިން މެންދުރު 1:30 އަށެވެ.
މި ދިޔަ އަހަރުގެ އޯލެވެލް އިމްތިހާނިގައި އަމިއްލަ ގޮތުން ބައިވެރިވި ކެންޑިޑޭޓުންގެ ނަތީޖާ އައިޑީ ކާޑު ގެންދިއުމުން ދޫކުރާނެ ކަމަށް ޑީޕީއީއިން ބުންޏެވެ. ބަދަލުގައި މީހަކު ފޮނުވާނަމަ، ކެންޑިޑޭޓުގެ އައިޑީ ކާޑާއި، ހަވާލުވާ ފަރާތުގެ އައިޑީ ކާޑު ގެންދަން ޖެހެ އެވެ.
ނަތީޖާގައި މައްސަލައެއްވާކަމަށް ޝައްކުވާނަމަ އަންނަ ފެބުރުއަރީ ހަތް ވަނަ ދުވަހުގެ 12:00 ގެ ކުރިން އެކަން ލިޔުމަކުން ޑިޕާޓްމަންޓަށް ހުށަހެޅުމަށާއި ނަތީޖާ ރީޗެކް ކުރުމަށް ބޭނުންވާ ކެންޑިޑޭޓުން، އެކަމަށް އެދޭ ފޯމު ފުރިހަމަ ކުރުމަށްފަހު އަށެއް ފެބްރުއަރީވާ ބުދަ ދުވަހުގެ މެންދުރު 12:00 ގެ ކުރިން ހުށަހެޅުމަށް ވަނީ އަންގާފަ އެވެ.