ހުޅުމާލޭގައި އިމިގްރޭޝަނުން ހިންގި އޮޕަރޭޝަނެއްގެ ތެރެއިން ހައްޔަރުކުރި އެމެރިކާގެ ވިޔަފާރިވެރިޔާ، ޖޯން ސޭފޯޓްގެ މައްސަލަ ވަރަށް ގާތުން ބަލަމުންދާ ކަމަށާއި އެ މައްސަލާގައި އޭނާއަށް ގާނޫނީ ގޮތުން ލިބިދޭންޖެހޭ ހައްގުތައް ހޯދައިދޭން މަސައްކަތްކުރަމުންދާ ކަމަށް އެމެރިކާގެ އެމްބަސީން ބުނެފި އެވެ.
ސްރީ ލަންކާގައި ހުންނަ އެމެރިކާގެ އެމްބަސީން މިހެން ބުނެފައިވަނީ ޖޯން ޑިޕޯޓް ކޮށްލާނެ ކަމަށް އިމިގްރޭޝަނުން ބުނެފައި ވަނިކޮށެވެ. ޖޯން މިވަގުތު ހުރީ ރާއްޖޭގެ އިމިގްރޭޝަންގެ ބެލުމުގެ ދަށުގަ އެވެ.
ޖޯންގެ މައްސަލާގައި ކަންބޮޑުވުން ފާޅުކޮށް އެމެރިކާގެ އެމްބަސީން މިއަދު ނެރުނު ބަޔާނެއްގައި ބުނީ، އެމެރިކާގެ ސްޓޭޓް ޑިޕާޓްމަންޓުން އެންމެ އިސްކަމެއް ދެނީ ބޭރު ގައުމުތަކުގައި ތިބޭ އެ ގައުމުގެ ރައްޔިތުންގެ ރައްކާތެރިކަން ކަށަވަރު ކުރުމަށް ކަމަށެވެ. އަދި ބޭރު ގައުމެއްގައި ހައްޔަރު ކުރާ އެ ގައުމުގެ ރައްޔިތުންނަށް ގާނޫނީ ގޮތުން ލިބިދޭންޖެހޭ ހުރިހާ ހައްގަކާއި ރައްކާތެރިކަން ހޯދައިދޭން އެ އެގައުމުގެ ސަރުކާރުން މުހިއްމު އިސްކަމެއް ދޭ ކަމަށެވެ.
އެ ބަޔާނުގައި ބުނީ، ރާއްޖޭގެ އިމިގްރޭޝަނުން ހިފަހައްޓާފައިވާ ޖޯން ސޭފޯޓަށް ގާނޫނީ އެހީތެރިކަން ފޯރުކޮށްދިނުމަށް މިމަހުގެ 18 އަދި 19 ގައި އޭނާއަށް އެ އެންބަސީގެ ފަރާތުން ބައްދަލުކޮށްފައިވާ ކަމަށެވެ. އަދި އެ ބައްދަލުވުމުގައި އޭނާ އެދުނު ގޮތަށް، އެމެރިކާގައި ދިރިއުޅެމުންދާ އޭނާގެ އާއިލާއަށް އޭނާގެ މައްސަލައިގެ މައުލޫމާތު ހިއްސާކޮށް، ކަންކަން ވަމުންދާގޮތް ވަރަށް ގާތުން ބަލަމުން ދާކަމަށެވެ.
"އެމްބަސީން މިދަނީ ޖޯން ސޭފޯޓްގެ މައްސަލަ ވަރަށް ގާތުން ބަލަމުން،" ޔޫއެސް އެމްބަސީގެ ބަޔާނުގައި ބުނެފައިވެ އެވެ.
ހުޅުމާލޭގައި ގެސްޓްހައުސްގެ ވިޔަފާރި ކުރުމުގައި އުޅުނު، ޖޯން މިދިޔަ އާދީއްތަ ދުވަހު ހައްޔަރު ކުރުމާ ގުޅޭ ގޮތުން، "އަވަސް" އިން މިއަދު ސުވާލުކުރުމުން އިމިގްރޭޝަންގެ އިންފޮމޭޝަން އޮފިސަރު، ހަސަން ހަލީލު ވިދާޅުވީ، ހުޅުމާލެއިން ހައްޔަރުކުރި ހަތަރު ބިދޭސީނަކީ ވެސް ގަވައިދާ ހިލާފަށް އުޅުނު މީހުން ކަމަށެވެ. އޭގެ ތެރޭގައި ވިސާ އާ ނުކުރާތާ ދެ އަހަރުވެފައިވާ މީހުން ވެސް ހިމެނޭ ކަމަށެވެ. އަދި އެ އެންމެން ވެސް ޑީޕޯޓް ކުރާނެ ކަމަށެވެ.