ހައްޖު ކޯޕަރޭޝަން މެދުވެރިކޮށް ހައްޖާއި އުމްރާއަށް ދާ ފަރާތްތަކަށް އޮންލައިންކޮށް ފައިސާ ދެއްކޭނެ ހިދުމަތް އެ ކުންފުނިން މިއަދު ތައާރަފްކޮށްފި އެވެ.
ހައްޖު ކޯޕަރޭޝަންގެ އޮންލައިން ޕޯޓަލް އިފްތިތާހުކުރުމަށް މިއަދު އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި އެ ޕޯޓަލް އިފްތިތާހުކޮށްދެއްވީ، އިސްލާމިކް މިނިސްޓަރު އަހުމަދު ޒިޔާދު އެވެ.
އޮންލައިން ޕޯޓަލްއާ ގުޅޭ މައުލޫމާތު ދެއްވަމުން ހައްޖު ކޯޕަރޭޝަންގެ މެނޭޖިން ޑިރެކްޓާ ޔާމީން އިދުރީސް ވިދާޅުވީ، ހައްޖު ކޯޕަރޭޝަނަށް ތިން އަހަރު ފުރޭއިރު، ހިދުމަތްތަކުގެ ފެންވަރު މަތިކޮށް، މުޅި ރާއްޖެއަށް އޮންލައިންކޮށް ހިދުމަތް ދެވޭ ފެންވަރަށް އެ ކޯޕަރޭޝަންގެ މަސައްކަތްތައް ވަރުގަދަ ވެގެންދިއުމަކީ ހޯދުނު ބޮޑު ކާމިޔާބީއެއް ކަމަށެވެ. އެ ކޯޕަރޭޝަނަށް ގޮސްގެން ހޯދޭ ހުރިހާ ހިދުމަތެއް ޕޯޓަލް މެދުވެރިކޮށް ހޯދޭނެ ކަމަށާއި އޭގެ ސަބަބުން މާލޭން ބޭރުގައި ދިރިއުޅޭ ދިވެހި ރައްޔިތުންނަށް ގިނަ ފަސޭހަތަކެއް ލިބިގެންދާނެ ކަމަށް ވެސް ޔާމީން ވިދާޅުވި އެވެ.
ހައްޖު ކޯޕަރޭޝަންގެ އޮންލައިން ޕޯޓަލް މެދުވެރިކޮށް ކޯޕަރޭޝަންގައި ރަޖިސްޓްރީކުރުމާއި ފައިސާ ދެއްކުން ފަދަ ހިދުމަތްތައް އޮންލައިންކޮށް ހޯދޭނެ އެވެ. އަދި އެކައުންޓް މައުލޫމާތު ޗެކް ކުރުމާއި ކޯޓާ ލިބިގެން ޖާގައިގެ ތަރުތީބަށް އަންނަ ބަދަލުވެސް ބަލައިލެވޭނެ އެވެ. މީގެ އިތުރުން ހައްޖު ދަތުރާ ބެހޭ ތަފްސީލުތަކާއި ބައިބަޔަށް ފައިސާ ދެއްކުމުގެ އިހުތިޔާރުތަކާއި، އަގީގާ އާއި ސަދަގާތުގެ ކަތިލުންތަކަށް އެދި ހުށަހެޅުމާއި، އެކަންކަމާބެހޭ ހުރިހާ މުއާމަލާތެއް މިއަދު ތައާރަފްކުރި ހައްޖު ކޯޕަރޭޝަންގެ އޮންލައިން ޕޯޓަލް މެދުވެރިކޮށް ލިބޭނެ ކަމަށް އޭނާ ވިދާޅުވި އެވެ.