ރާއްޖޭގެ އެކި ހިސާބުތަކުގައި ގާއިމްކޮށްފައިވާ ފެނަކައިގެ އޮފީސްތައް އެއް ވިއުގައަކުން ގުޅުވާލައި، ދުވަހުން ދުވަހަށް ކުންފުނިން ހިންގާ ވިޔަފާރީގެ ހަރަކާތްތައް އެ ނިޒާމްގެ ތެރެއިން މެނޭޖްކޮށް މަސައްކަތްތައް އަވަސްކުރުމަށް "އެންޓަޕްރައިސް ރިސޯސް ޕްލޭނިން ސިސްޓަމް"، (އީއާރުޕީ) އެއް ގާއިމްކުރުމަށް ފެނަކައިން މަސައްކަތް ފަށައިފި އެވެ.
އީއާރުޕީ ސިސްޓަމަކީ ވިޔަފާރިތަކަށް ގުޅިފައިވާ ނިޒާމެއްގެ ތެރެއިން ހިންގުމަށާއި، މުވައްޒަފުންގެ ކަންތައްތަކާއި، ވިޔަފާރީގެ މުއާމަލާތްތައް ރައްކާތެރިކަމާއެކު ބަލަހައްޓައި މަސައްކަތްތައް އަވަސް ކުރުމަށް އެހީތެރިވެދޭ ސޮފްޓުވެއާ އެކެވެ. މި ސޮފްޓުވެއާ ފެނަކައިގެ ހިންގުމުގެ ނިޒާމަށް ފެއްތުމަށް އެކުންފުނިން މިއަދު ވަނީ ސްރީލަންކާގެ ކުންފުންޏަކަށް ދީފަ އެވެ.
މިއަދު ފެނަކަ އޮފީހުގައި ބޭއްވި ރަސްމިއްޔާތެއްގައި އެ އެއްބަސްވުމުގައި ސޮއިކުރެއްވީ ފެނަކައިގެ މެނޭޖިން ޑިރެކްޓާ އަހުމަދު ޝަރީފް އެވެ. އެ އެއްބަސްވުމުގައި ލަންކާގެ ޖިނަސެނަ އިންފޯޓެކް ޕްރައިވެޓް ލިމިޓެޑްގެ ފަރާތުން އެ ކުންފުނީގެ މާކެޓިން މެނޭޖާ ހެމަކަ ވިޖެގުނަސެކަރަ އެވެ.
ސޮފްޓްވެއާ ގާއިމްކުރުމަށް އެ ކުންފުންޏަށް ދީފައިވަނީ 2.6 މިލިއަން ރުފިޔާ އަށެވެ.
އެއްބަސްވުމުގައި ސޮއިކުރެއްވުމަށްފަހު އެމްޑީ ޝަރީފު ވިދާޅުވީ، ފެނަކަ އަކީ 150 އަށްވުރެ ގިނަ ރަށްރަށުގެ ފެނާއި ނަރުދަމާ އާއި ކަރަންޓުގެ ކަންކަން ބަލަހައްޓާ ކުންފުންޏަށް ވެފައި، ފާއިތުވެފިޔަ ދުވަސްތަކުގައި ކުންފުނީގެ އެތައް ގުނައަކަށް ފުޅާވެގެން ގޮސްފައިވާ ކަމަށެވެ. އެހެންކަމުން ފެނަކަ ހާ ބޮޑު ކުންފުންޏަކަށް އިތުރަށް ތަރައްގީވާން ބޭނުންވަނީ ވަރަށް ހަރުދަނާ ޒަމާނީ ހިންގުމުގެ ނިޒާމެއް ކަމަށާއި މިއަދު ސޮއިކުރި އެއްބަސްވުމުގެ މަގުސަދަކީ އެއީ ކަމަށެވެ.
އެ ސޮފްޓުވެއާ އިމްޕްލިމެންޓް ކުރުމުން ހިދުމަތްދިނުމަށް ކުންފުނިން ހޯދާ މުދަލާއި ހިދުމަތް، އަދި ތަނުގެ އިންވެންޓްރީ ބެލެހެއްޓުމާއި ހަރުމުދަލުގެ ދަފްތަރު ބެލެހެއްޓުމާއި ބަޖެޓް މެނޭޖްކުރުމާއި މަޝްރޫއުތަކާބެހޭ ކަންތައްތަކާއި، މުވައްޒަފުންނަށް މުސާރަ ދިނުން ފަދަ ކަންކަން އެއް ވިއުގައެއްގެ ތެރޭން ކުރެވޭނެ މަގު ފަހިވެގެންދާނެ އެވެ.
ޝަރީފް ވިދާޅުވީ، އީއާރުޕީ ސިސްޓަމާއެކު ފެނަކައިގެ ގާބިލުކަން އެތައް ގުނައެއް މަތިވެގެންދާނެ ކަމަށެވެ.
"މި ކުރެވެ މަސައްކަތަކީ މުޅި ރާއްޖޭގައި ހުރި ކުންފުނީގެ އޮފީސްތައް އެއް ވިއުގައަކުން ގުޅާލުން. އެހެންވުމުން ދުވަހުން ދުވަހަށް ލިޔެކިއުންތައް ރައްކާކުރެވި، ޓްރެކް ކުރުމަށް ފަސޭހަވެގެންދާނެ. އަދި މަޝްރޫއުތަކަށް އެޕްރޫވަލް ހޯދުމާއި އެއް އޮފީހުން އަނެއް އޮފީހަށް ފޮނުވަންޖެހޭ ލިޔެކިޔުންތައް ޕްރޮސެސް ކުރުމަށް ލަސްތަކެއް ނަގާކަށް ނުޖެހޭނެ. އެއް އޮފީހުން އަނެއް އޮފީހަށް ފެކްސްތައް ފޮނުވަން ނުޖެހޭނެ. މާލީ މައުލޫމާތާއި ޓްރާންޒެކްޝަންތައް ދުވަހުން ދުވަހަށް ބަލައި، ޖަވާބުދާރީ ވާންޖެހޭ ފަރާތްތަކަށް ޖަވާބުދާރީވާން ކުންފުންޏަށް ފަސޭހަވުން ފަދަ ވަރަށް ގިނަ ފައިދާ އެބަ ލިބޭ،" ޝަރީފް ވިދާޅުވި އެވެ.
މިއަދު ސޮއިކުރި އެއްބަސްވުމުގެ ދަށުން މަސައްކަތް ނިންމައި އެ ނިޒާމް ބޭނުން ކުރަން ފަށަން ނިންމާފައި ވަނީ އަންނަ ޖޫން މަހުގެ 15 ވަނަ ދުވަހު އެވެ.