ނ. ޅޮހީއަށް ދިމާވި ކަރަންޓް މައްސަލަ ހައްލުކުރުމަށްފަހު އެރަށަށް އަލުން އިއްޔެ ކަރަންޓް ދީފައިވަނިކޮށް ރައްޔިތުން ނިކުމެ މުޅި ރަށުން ކަރަންޓް ކަނޑާލާފައިވާ ކަމަށް ފެނަކަ ކޯޕްރޭޝަނުން ބުނެފި އެވެ.
ޅޮއްސަށް ދިމާވެފައިވާ ކަރަންޓް މައްސަލައާ ގުޅިގެން ފެނަކަ ކޯޕަރޭޝަނުން ނެރުނު ނޫސް ބަޔާނެއްގައި ބުނީ، އެރަށަށް ކަރަންޓް ދިނުމަށް ބޭނުން ކުރަމުންދިޔަ 112 ކިލޯ ވޯޓްގެ ޖަނަރޭޓަރަށް ދިމާވި މައްސަލައަކާއި ގުޅިގެން މައްސަލަ ހައްލު ކުރަން މިދިޔަ ބުރާސްފަތި ދުވަހު އެރަށަށް 160 ކިލޯ ވޯޓްގެ ޖަނަރޭޓަރެއް ފޮޮނުވާފައިވާ ކަމަށެވެ. ނަމަވެސް ރައްޔިތުންގެ ބަޔަކު ނުކުމެ ޓެކްނިކަލް ޓީމުގެ މަސައްކަތަށް ހުރަސް އަޅައި މަސައްކަތް ހުއްޓުވުމުގެ ސަބަބުން ފުލުހުންގެ އެހީތެރިކަމާއެކު ޓެކްނިކަލް ޓީމް އެރަށުން ފައިބައިފައިވާ ކަމަށް ފެނަކައިން ބުންޏެވެ.
ފެނަކައިން ބުނީ ކަރަންޓް މައްސަލަ ހައްލުކުރަށް ޅ. ރީޖަންގެ ޓެކްނިކަލް ޓީމެއް އިއްޔެ އެރަށަށް ގޮސް 160 ކިލޯ ވޯޓްގެ ޖަނަރޭޓަރު އިންސްޓޯލް ކުރުމުގެ މަސައްކަތް ނިންމާ ރޭ މުޅި ރަށަށް ކަރަންޓް ދީފައިވާ ކަމަށެވެ. ނަމަވެސް ރައްޔިތުންގެ ބަޔަކު ނިކުމެ ހިންގާފައިވާ 160 ކިލޯ ވޯޓްގެ ޖަނަރޭޓަރު ގަވާއިދާ ހިލާފަށް ނިއްވާލައި މުޅި ރަށުން ކަރަންޓް ކަނޑާލާފައިވާ ކަމަށް ފެނަކައިން ބުންޏެވެ.
"ޅޮހީގެ ކަރަންޓްގެ ހިދުމަތަށް ދިމާވެފައިވާ މައްސަލައިގެ ހައްލެއްގެ ގޮތުގައި ރައްޔިތުން އެދެމުންދަނީ ރަށުގެ ކަރަންޓް ޑިމާންޑާ ނުބައްދަލު 200 ކިލޯ ވޯޓްގެ ޖަނަރޭޓަރެއް ގެންދަންް، ނަމަވެސް މި ކުންފުނިން އެރަށަށް 200 ކިލޯވޯޓްގެ ޖަނަރޭޓަރެއް ގެންދަން ނިންމާފައެއް ނުވޭ،" ފެނަކައިން ބުންޏެވެ.
ފެނަކައިން ބުނީ ޕީކް ގަޑިތަކުގައި 90 ކިލޯވޯޓް ނަގާ ރަށެއްގައި 200 ކިލޯވޯޓް ބެހެއްޓުމުން ބޭކާރުވެގެންދާ 110 ކިލޯވޯޓްގެ ކަރަންޓް އުފައްދަން ހަރަދުވާ ތެލަކީ އެރަށަށް ފޯރުކޮށްދޭ ހިދުމަތްތައް ރަނގަޅު ކުރަން ހެދަކުރެވޭނެ ފައިސާ އަށް ވެގެންދާނެ ކަމަަށެވެ. އަދި 160 ކިލޯވޯޓްގެ ޖަނަރޭޓަރަކީ މިވަގުތު ޅޮހީގެ ކަރަންޓް ލޯޑަށް ބެލުމަށްފަހު އެންމެ އެކަށީގެންވާ ޖަނަރޭޓަރު ކަމަށް ފެނަކައިން ބުންޏެވެ.
ޅޮއްސަށް ދިމާވެފައިވާ ކަރަންޓް މައްސަލަ ހައްލު ނުކުރާ ކަމަށް ބުނެ އެރަށުގެ ރައްޔިތުން މިއަދުވެސް ވަނީ މުޒާހަރާ ކޮށްފަ އެވެ. އަދި ރަށަށް ގެނައީ ބާ ޖަނަރޭޓަރެއް ކަމަށް ބުނެ މިދިޔަ ބުރާސްފަތި ދުވަހު މުޒާހަރާކޮށް، ފުލުހުންގެ އެހީތެރިކަމާއެކު ޓެކްނިކަލް ޓީމް ވަނީ އެރަށުން ބާލާފަ އެވެ.