ގަވާއިދާ ހިލާފަށް ކުނި އުކާ ފަރާތްތަކަށް މިމަހު 15 އިން ފެށިގެން އިންޒާރު ދޭން ފަށާނެ ކަމަށާއި އަންނަ މަހުގެ އެއްވަނަ ދުވަހުން ފެށިގެން އެފަރާތްތަކާމެދު ފިޔަވަޅު އަޅާނެ ކަމަށް އެންވަޔަރަންމަންޓް މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.
އެންވަޔަރަންމަންޓް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ތޯރިގު ވިދާޅުވީ، ވެމްކޯއާއި އެންވަޔަރަންމަންޓް ޕްރޮޓެކްޝަން އެޖެންސީ އަދި މޯލްޑިވްސް ޕޮލިސް ސާވިސްއާ ގުޅިގެން ގަވާއިދާ ހިލާފަށް ކުނި އުކާ ބިދޭސީންނާއި އަދި ގަވާއިދާ ހިލާފަށް ކުނި ހިފައިގެން އަންނަ އެހެނިހެން ފަރާތްތަކަށް މިމަހު 15 އިން ފެށިގެން އިންޒާރު ދޭނެ ކަމަށެވެ. އަދި އަންނަ މަހު އެއްވަނަ ދުވަހުން ފެށިގެން ގަވާއިދާ ހިލާފަށް ކުނި އުކަން އަންނަ ފަރާތްތަކާމެދު ފިޔަވަޅު އަޅާނެ ކަމަށާއި އޭގެ ތެރޭގައި އެބަޔަކު ހިފަހައްޓާ ޖޫރިމަނާ ކުރުމާއި ވެހިކަލްތައް ކޮންފެސްޓިކޭޓް ކުރުންވެސް ހިމެނޭނެ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އަންނަ މަހު އެއްވަނަ ދުވަހުން ފެށިގެން ރެޖިސްޓާ ނުވާ ފަރާތްތަކުން ވެމްކޯ ސަރަހައްދަށް ކުނި އުކޭނީ ގޭޓް ފީއެއް ދައްކައިގެން ކަމަށާއި އަމިއްލަ އަށް ކުނި އުކަން އަންނަ ފަރާތެއް ވީ ކަމުގައި ނަމަވެސް ރެޖިސްޓާ ނުކޮށްވާނަމަ ގޭޓްފީ އެއް ނެގިގެންދާނެ ކަމަށެވެ.
"އަދިވެސް އުޅޭ ބައެއް ބިދޭސީން ގަވާއިދާ ހިލާފަށް ކުނި އުކާ ފަރާތްތައް، އެމީހުންގެ އިތުރުން އަދިވެސް ގަވާއިދާ ހިލާފަށް ކުނި ހިފާގެން އަންނަ ފަރާތްތަށް އުޅޭ، އެފަރާތްތަކަށް އިންޒާރުދޭން ފަށާނަން މިމަހުގެ 15 އިން ފެށިގެން، އަދި އިންޒާރަށްފަހު އަންނަ މަހު އެއްވަނަ ދުވަހުން ފެށިގެން ގަވާއިދާ ހިލާފަށް އަންނަ ފަރާތްތަކާމެދު ފިޔަވަޅު އަޅާނަން، އޭގެ ތެރޭގައި އެބަޔަކު ހިފަހައްޓާ ޖޫރިމަނާ ކުރުމާއި ވެހިކަލްތައް ކޮންފެސްޓިކޭޓް ކުރުންވެސް ހިމެނޭނެ ކަމަށް،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ ކުނި އުކުމަށް ނަގާ ފީތަށް ދެއްކުމުގެ އިތުރު ގޮތްތަކެއް މިމަހުގެ ތެރޭގައި ތައާރަފް ކުރާނެ ކަމަށާއި އޭގެ ތެރޭގައި އިންޓަނެޓުން ފީ ޕޭ ކުރުމާއި ތާޑް ޕާޓީ މެދުވެރިކޮށް ފީ ޕޭކުރުމުގެ އިތުރުން ވެމްކޯ ހެޑް އޮފީހުންވެސް ފައިސާ ބަލައި ގަންނާނެ ގޮތްތައް ލަސްތަކެއް ނުވެ ރޭވިގެން ދާނެ ކަމަށެވެ. އަދި މަސައްކަތް އިތުރަށް ހަލުވިކޮށް ކުނި ނެގުން އަވަސް ކުރުމުގެ ގޮތުން އިތުރު ވެހިކަލް ތަކެއް ވަރަށް އަވަހަށް ގެނެވޭނެ ކަމަށެވެ.
"ކުނި އުކުމަށް ވަރަށް ގިނަ ފަރާތްތަކުން ރަޖިސްޓާ ކުރީ މިދިޔަ މަހުގެ އެއްވަނަ ދުވަހު، އެހެން ކަމުން ވަރަށް ގިނަ ޗެލެންޖެސްތަކާއި ކުރިމަތި ލާން ޖެހުނު، އެކަމުގެ ސަބަބުން ހުރިހާ ގެއަކުން އެއްފަހަރާ ކުނި ނެގުމަށް ވަރަށް ބޮޑު އުނދަގޫ ތަކަކާ ކުރިމަތި ކުރުވި، މިހާރު ކުނި އުކުމުގެ ހިދުމަތަށް 18200 ފަރާތުން ރަޖިސްޓާ ވެފައިވޭ، އެއީ އަމިއްލަ އަށް ކުނި އުކުމަށް 1100 އަދި 17180 ފަރާތަކުން ވެމްކޯ މެދުވެރިކޮށް ކުނި އުކައިދޭން ރަޖިސްޓާ ކޮށްފައިވޭ" މިނިސްޓަރު ވިދާޅުވި އެވެ.
ނޫސްވެރިންގެ ބައްދަލުވުމުގައި ވެމްކޯގެ މެނޭޖިން ޑިރެކްޓަރު މުހައްމަދު ޝިފާއު ވިދާޅުވީ އަމިއްލަ ގޮތުން ކުނި އުކަން އަންނަ ފަރާތްތައް ވަރަށް ބޮޑަށް މަދުކުރެވިފައިވާ ކަމަށާއި އެގޮތުން ބައިސްކަލުގައި ކުނި އުކަން އަންނަ މީހުންގެ ނިސްބަތް 94 އިންސައްތަ އަށް ދަށްކުރެވިފައިވާ ކަމަށެވެ. އަދި އިތުރަށް ވިދާޅުވީ ޕްރޮސެސް ސްޓީމްލައިން ނުވަތަ މަސައްކަތް ހަލުވި ކުރުމުގެ ގޮތުން ޒޯން ފަހެއް އަދި 10 ނަގައިގެން އިތުރު ޕްރޮޖެކްޓް ތަކެއްގެ މަސައްކަތް ކުރަމުންދާ ކަމަށެވެ.
"ފެށިއިރު ކޯލް ސެންޓާ ތަކުގައި އިޝޫސްތަކެއް އުޅުން، ކުރިން ރިސީވް ވާ ކޯލްތަކުގެ ތެރެއިން ސާވިސް ދެެވްނީ 44 ޕަސެންޓް ކޯލްތަކަށް، ނަމަވެސް މިއަދު ސާވިސް ރަނގަޅުކޮށް ރިސީވާ ކޯލްތަކުގެ ތެރެއިން 98 ޕަސެންޓް ކޯލްތަކަށް ސާވިސް ދެވޭ، ވަރަށް އަވަހަށް އާ ވެހިކަލް ތަކެއް ގެނެވޭނެ. 10 ނޫނީ 15 ވަރަކަށް ވެހިކަލް ގެނެވޭނެ،" ޝިފާއު ވިދާޅުވި އެވެ.