ރ. މީދޫ ފެންފިޔާޒުގޭ މުހަައްމަދު އަނަސް މަރާލި ކަމުގެ ތުހުމަތުގައި ދެ މީހަކު ހޯދުމުގެ މަސައްކަތް ފުލުހުން ފަށައި އެ މީހުންގެ ވަނަވަރާއި ފޮޓޯ އާންމުކޮށް އިއުލާންކޮށްފި އެވެ. އަނަސް މަރާލާފައިވަނީ، ޖުލައި މަހުގެ 31 ވަނަ ދުވަހުގެ ރޭ ލިޓަސް ސާވިސް ސެންޓަރު ތެރޭގަ އެވެ.
އޭނާއަށް ހަމަލާދީފައިވަނީ ގުރޫޕަކުންނެވެ. އެތައް ހަމަލާތަކެއް ދިނުމުގެ ސަބަބުން އަނަސްއަށް ބޮޑެތި ޒަހަމްތަކެއް ލިބުނެވެ. އޭނާ މަރުވެފައިވަނީ އޭޑީކޭ ހޮސްޕިޓަލަށް ގެންގޮސް ފަރުވާދޭން ފެށިތާ ކުޑަ އިރުކޮޅެއްގެ ތެރޭގަ އެވެ.
ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހްގީގުކުރަމުންދާ އަނަސްގެ މަރުގެ މައްސަލައާއި ގުޅިގެން ހޯދަމުންދާ ދެމީހުންނަކީ ތ. ކިނބިދޫ، ގުލްފާމުގެ އުމުރުން 21 އަހަރުގެ މުހައްމަދު ސާޒް އާއި މ. ލޮނުމިދިލިގެ އުމުރުން 21 އަހަރުގެ އަފްރާޙް އަބްދުއްރައްޒާގެވެ. އެ ދެމީހުންނާ ބެހޭ އެއްވެސް މަޢުލޫމާތެއް ލިބިފައިވާނަމަ ހިއްސާ ކުރުމަށް ފުލުހުން އެދިފައި ވެއެވެ.
އަނަސް މަރާލި މައްސަލައާ ގުޅިގެން މިދިޔަ މަހު ކޯޓު އަމުރެއްގެ ދަށުން މ. ދިމިޝްގުން ބަލައި ފާސްކޮށް އުމުރުން 23 އަހަރުގެ ފިރިހެނަކާއި 18 އަހަރު ނުފުރޭ ކުއްޖެއް ވަނީ ހައްޔަރު ކޮށްފަ އެވެ. އަދި މިދިޔަ މަހުގެ ހަ ވަނަ ދުވަހު މ. އަސަރީހިޔާގެ ބަލައި ފާސްކޮށް ޖުމްލަ 12 މީހަކު ފުލުހުން ހައްޔަރުކޮށްފައިވެ އެވެ. އެ މީހުންގެ ތެރޭގައި އަނަސްއަށް ވަޅިން ހަމަލާދީ އޭނާ މަރާލުމުގައި އަމަލީ ގޮތުން ހަރަކާތްތެރިވި މީހުން ހިމެނޭ ކަމަށް ފުލުހުން ބުނެފައިވެ އެވެ. އޭރު ހައްޔަރުކުރި މީހުންގެ ތެރޭގައިވެސް 18 އަހަރު ނުފުރޭ ކުޑަ ކުދިން ތިއްބެވެ.
އަތޮޅު ފެރީގެ ކެޕްޓަނެއްގެ ވަޒީފާގައި އުޅުނު އަނަސް ވަރަށް އަނިޔާވެރިކޮށް މަރާލީ ފެރީ ދަތުރުގައި މާލެ އައިސް ހުއްޓަ އެވެ. އޭނާގެ އާއިލާއިން ބުނަނީ އަނަސް އަކީ އެއްވެސް ގްރޫޕަކާ މައްސަލައެއް އޮތް ޒުވާނެއް ނޫން ކަމަށެވެ. އޭނާގެ އާއިލާއިން މީގެ ކުރިން ތުހުމަތުކޮށްފައިވާ ގޮތުގައި އަނަސް މަރާލީ، އޭނާ ކައިވެނިކުރަން ތައްޔާރުވަމުން ދިޔަ ކުއްޖާގެ ކުރީގެ ފިރިމީހާ ރާވައިގެން އެވެ. އެހެން ނަމަވެސް އެ ތުހުމަތުތައް ޔަގީން ކުރެވިފައެއް ނުވެ އެވެ. އަނަސްގެ ބައްޕަ ބަޔާނެއް ނެރެ، ބުނެފައި ވަނީ އެފަދަ މައުލޫމާތުތައް އާންމު ނުކުރުމަށް އެދޭ ކަމަށާއި އެދެނީ އޭނާގެ ގާތިލުން ވީހާ ވެސް އަވަހަކަށް ހާމަވުން ކަމަށެވެ. އަދި ފުލުހުންނަށް ފުރިހަމަ އިތުބާރު އޮތް ކަމަށް ވެސް ބުނެފައިވެ އެވެ.