އަވަށްޓެރި ގައުމުތަކުން ރާއްޖެއަށް އަންނަމުންދާ ތަރައްގީގެ ސަބަބުން ހަސަދަވެރިވާ ކަމަށް ވިލުފުށީ ދާއިރާގެ މެމްބަރު ރިޔާޒް ރަޝީދު ވިދާޅުވެއްޖެ އެވެ.
ޕީޕީއެމް ރުމާލު ދޭއް ޖަގަހާގައި މިރޭ ބޭއްވި ޖަލްސާގައި ރިޔާޒް ވިދާޅުވީ، މިނިވަން ވިޔަފާރީގެ އެއްބަސްވުމަކީ އަލަށްވި އެއްބަސްވުމެއް ނޫން ކަމަށާއި މީގެ ކުރިންވެސް އޭގެ އެއްބަސްވުމެއް ވެފައިވާ ކަމަށެވެ. އަދި ރާއްޖެ އާއި ޗައިނާގެ ގުޅުމުގެ ސަބަބުން ރާއްޖެއަށް ތަރައްގީ އަންނަ ކަމަށާއި އެކަމުގެ ސަބަބުން ހަސަދަވެރިވާ އަވައްޓެރި ގައުމުތަށް އުޅޭ ކަމަށް ރިޔާޒް ވިދާޅުވި އެވެ.
ރިޔާޒް ވިދާޅުވީ، ރާއްޖެ އާއި ޗައިނާގެ ގުޅުމަށް ބައެއް އަވަށްޓެރި ގައުމުތަކުން ހަސަދަވެރިވަނީ އެމީހުންގެ ވިޔަފާރިތައް ގެއްލޭތީ ކަމަށެވެ. އަދި ވިދާޅުވީ، ކުރު މުއްދަތުގެ ތެރޭގައި ޗައިނާ ސަރުކާރުން ރާއްޖެއަށް ވެދިން ވަރުގެ އެހީއެއް ފޯރުކޮށްދިން އެހެން ގައުމެއް ނެތް ކަމަށާއި ޗައިނާއިން ރާއްޖޭގެ ދާހިލީ ކަންކަމުގެ ތެރެއަށް ވަދެ ނޫޅޭ ކަމަށެވެ.
"ރާއްޖެއާ ޗައިނާ ގުޅުނީމަ މި ގައުމަށް އައިސްދާނެ ކުރިއެރުމާއި ތަރައްގީގެ ސަބަބުން ހަސަދަ ވެރިވާ އަވައްޓެރިން ތަކެއް އެބަ އުޅޭ، އެހެން ނަމަވެސް ފަސް އެނބުރި ބަލައެއް ނުލާނަން، ގުޅުން އުފައްދަން ޖެހޭ ބަޔަކާ ގުޅުން އުފައްދާނަން، ގުޅުން ކަނޑާލަން ޖެހޭ ބަޔަކާ ގުޅުން ކަނޑާލާނަން، މިކަމާ ދެކޮޅު ހަދާބަޔަކު ތިބެން ޖެހޭނީ، އެކަން ކުރާނީ އެގޮތަށް،" ރިޔާޒް ވިދާޅުވި އެވެ.
ރިޔާޒް ވިދާޅުވީ، ކޮމަން ވެލްތާ ގުޅުން ކަނޑާލުމުން ރާއްޖެއަށް ގެއްލުމެއް ނެތް ކަމަށާއި އެކަމުގެ ސަބަބުން މިނިވަން ކަމާއެކު ވެރިކަން ކުރުމުގެ ފުރުސަތު މިއަދުގެ ވެރިއަކަށް ލިބިގެން ގޮސްފައިވާ ކަމަށެވެ. އަދި ޗައިނާ އާއި ރާއްޖޭގެ ގުޅުމުގެ ސަބަބުން ރާއްޖެއަށް އަންނަ ތަރައްގީގެ ސަބަބުން އިދިކޮޅު ފަރާތްތަކުން ކަންބޮޑުވާ ކަމަށާއި އެކަން ހުއްޓުވުމަށް ރާއްޖޭގެ ޓޫރިޒަމަށް ގެއްލުންވާ ގޮތަށް ވާހަކަ ދައްކަމުންދާ ކަމަށް ރިޔާޒް ވިދާޅުވި އެވެ.
"ޗައިނާ އާއި ރާއްޖޭގެ ގުޅުމުގެ ސަބަބުން އަވަށްޓެރި ގައުމުތަކުން ހަސަދަ ވެރިވަނީ އެމީހުންގެ ވިޔަފާރިތައް ގެއްލޭތީ، ދަރުމަވަންތަ ހޮސްޕިޓަލް އައީމަ ކައިރީގައި ހުރި ގައުމުތަކަށް ބޭސްފަރުވާއަށް ދިއުން މަދުވާނެތީ، އެހެންވެ ކަންބޮޑު ވަނީ، މިލިއަނުން މިލިއަނުން އެ ގައުމުތަކަށް ޑޮލަރު އެބަދޭ، އެ ހުއްޓޭ ކަމަށް ވަނީނަމަ ކަންބޮޑުވާނެ،" ރިޔާޒް ވިދާޅުވި އެވެ.
ރައީސް އަބުދުﷲ ޔާމީން ގެންނަވާ ތަރައްގީގެ ކަންކަމަށް އަލި އަޅުވާލައި ރިޔާޒް ވިދާޅުވީ، މި ސަރުކާރުގެ ހަތަރު އަހަރު މުޅި މާލެ ސަރަހައްދަށް ގެނެސްދީފައިވާ ތަރައްގީ އަކީ ކުރީގެ ރައީސް މައުމޫން އަބުދުލްގައްޔޫމް ވެރިކަމުގެ 30 އަހަރުގައި މުޅި ރާއްޖެއަށް ގެނެސްދީފައިވާ ތަރައްގީގެ 50 ޕަސެންޓް ތަރައްގީ މި ވެރިކަމުގެ ހަތަރު އަހަރު ތެރޭގައި މާލެ ސަރަހައްދަށް ގެނެސްދީފައިވާ ކަމަށެވެ. އަދި ވިދާޅުވީ، ރާއްޖޭގެ ތާރީހުގައި ވެސް މިހާ ކުޑަ މުއްދަތެއްގެ ތެރޭގައި އެހާބޮޑު ތަރައްގީއެއް ގެނެސްދޭނެ އިތުރު ވެރިއެއް ނާންނާނެ ކަމަށެވެ.