ރާއްޖެއިން މިމަހު 6،300 އަށްވުރެ ގިނަ މީހުން އުމްރާގެ އަޅުކަން އަދާކުރަން މައްކާއަށް ގޮސްފި އެވެ.
މިކަން ހާމަކުރައްވާ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މި ފަހަރު އެކި ކުންފުނިތަކުގެ ހަވާލުގައި 6،373 އަށްވުރެ ގިނަ މީހުން އުމްރާގެ އަޅުކަން އަދާކުރަން މައްކާއަށް ގޮސްފައިވާ ކަމަށެވެ.
ރާއްޖެއިން މިމަހު އުމްރާއަށް ގޮސްފައިވާ އެންމެންގެ ހާލުވެސް ރަނގަޅު ކަމަށް ޝަހީމް ވިދާޅުވި އެވެ.
ސްކޫލު ޗުއްޓީއާ ދިމާކޮށް ގިނަ އަދަދެއްގެ ބަޔަކު އުމްރާގެ އަޅުކަން އަދާކުރަން މައްކާއަށް ގޮސްފައިވާއިރު އަގުހެޔޮކޮށް އުމްރާއަށް ދެވޭނެ ޕެކޭޖުތަކެއް ތައާރަފްކޮށްދިނުމަށް މިނިސްޓަރު ޝަހީމް މީގެ ކުރިން ވަނީ އެދިވަޑައިގެންފަ އެވެ.
ރާއްޖޭގައި ބޭއްވި ފުރަތަމަ "ހައްޖު އުމްރާ ކޮންފަރެންސް" އިފްތިތާހް ކުރުމަށް މިއަހަރުގެ އޮކްޓޫބަރު މަހު އިސްލާމީ މަރުކަޒުގައި ބޭއްވި ރަސްމިއްޔާތުގައި މިނިސްޓަރު ޝަހީމް ވިދާޅުވީ އުމްރާއަށް މީހުން ގެންދާ ގުރޫޕްތަކުން މިހާރު އެކަން ކުރަނީ ވަކި ދުވަސްވަރަކު ވަކި މުނާސަބަތަކާ ގުޅުވައިގެން ކަހަލަ ގޮތަކަށް ކަމަށާއި ނަމަވެސް އަހަރުގެ ކޮންމެ ދުވަހަކުވެސް އުމްރާއަށް ދެވޭނެ އަގުހެޔޮ ފަސޭހަ ގޮތަކަށް ނިޒާމު ބަދަލުކުރަންޖެހޭ ކަމަށެވެ.
އުމްރާ ޕެކޭޖްތަކުގެ އަގުތައް ހުރި ގޮތުން އެ އަގުތަކުގައި ކޮންމެ މީހަކަށް އުމްރާއަށް ނުދެވޭނެކަން ފާހަގަކުރައްވައި ޝަހީމް ވިދާޅުވީ 20،000 ރުފިޔާއާއި 15،000 ރުފިޔާގެ ޕެކޭޖުތަކެއް ހެދިއްޖެނަމަ ވަރަށް ގިނަ ބަޔަކަށް އުމްރާއަށް ދެވޭނެ ކަމަށް ބެލެވޭ ކަމަށެވެ.
އުމްރާ ޕެކޭޖުތައް މިހާރު އުޅެނީ 28،000 ރުފިޔާ އާއި 37،000 ރުފިޔާއާ ދެމެދުގެ އަގުތަކެއްގައެވެ.