މަސްތުވާތަކެއްޗާއެކު ހައްޔަރުކުރި މީހަކު އެއީ އޭނާގެ ބައްޕަގެ އެއްޗެއް ކަމަށް ބުނެފި އެވެ.
މި މައްސަލައިގައި ހައްޔަރުކޮށްފައިވަނީ އުމުރުން 23 އަހަރުގެ ދިވެހި ފިރިހެނެކެވެ.
ކްރިމިނަލް ކޯޓުން އިއްޔެ ވަނީ އޭނާ 30 ދުވަހަށް ބަންދުކޮށްފައި ބެހެއްޓުމަށް އަމުރުކޮށްފަ އެވެ.
އޭނާގެ މައްޗަށް ކުރަނީ މަސްތުވާތަކެތި ބޭނުންކުރުމާއި ގެންގުޅުން އަދި ޓްރެފިކްކުރުމުގެ ތުހުމަތެވެ.
ތުހުމަތުތަކަށް އިންކާރުކޮށް ފެނިފައިވާ ތަކެއްޗަކީ އޭނާގެ ބައްޕަގެ ތަކެތި ކަމަށް ބުނެފައިވާ ކަމަށް ކޯޓު އަމުރުގައިވެ އެވެ. ނަމަވެސް ސީނުގައި އެއީ ބައްޕަގެ ތަކެތި ކަމަށް ބައްޕަ ބުނެފައި ނުވާ ކަމަށް އައިއޯ ފާހަގަކުރި ކަމަށްވެސް އަމުރުގައިވެ އެވެ.
މި މައްސަލާގައި ގިނަ އަދަދެއްގެ މަސްތުވާތަކެއްޗާއި މަސްތުވާތަކެތި ބަންދުކުރުމަށް ކަމަށް ބެލެވޭ ތަކެތި ފެނިފައިވާ ކަމަށް އައިއޯ ވަނީ ފާހަގަކޮށްފަ އެވެ.