ދިރުވާލައިގެން ރާއްޖެއަށް މަސްތުވާތަކެތި އެތެރެކުރުމުގެ މައްސަލަތަކެއް އަނެއްކާވެސް ފެންމަތިވެއްޖެ އެވެ.
ދިރުވާލައިގެން ރާއްޖެއަށް މަސްތުވާތަކެތި އެތެރެކުރަން މަސައްކަތް ކުރި ދެ ދިވެހިން ހައްޔަރުކުރިތާ، ދެ ދުވަސް ނުވަނީސް އަނެއްކާވެސް އިތުރު ދެ މީހަކު ދިރުވާލައިގެން ރާއްޖެއަށް މަސްތުވާތަކެތި އެތެރެކުރިކަމުގެ ތުހުމަތުގައިވަނީ ހައްޔަރުކޮށްފަ އެވެ.
މި ފަހަރު ހައްޔަރު ކުރި ދެ މީހުންގެ ތެރެއިން އެކަކީ ބްރެޒިލް މީހެކެވެ. އަނެއް މީހާއަކީ ދިވެއްސެކެވެ.
ދިރުވާލައިގެން ރާއްޖެއަށް މަސްތުވާތަކެތި އެތެރެކުރަން މަސައްކަތް ކުރި ކަމުގެ ތުހުމަތުގައި މި ހަފްތާގައި ކުރިން ހައްޔަރުކޮށްފައިވަނީ އުމުރުން 33 އަހަރުގެ ދިވެހި ފިރިހެނަކާއި އުމުރުން 40 އަހަރުގެ ދިވެހި ފިރިހެނެކެވެ.
އުމުރުން 33 އަހަރުގެ ދިވެހި ފިރިހެން މީހާއަކީ ނ. މަނަދޫ ޕީކޮކް، އިހްސާން އިސްހާގެވެ. އަދި އުމުރުން 40 އަހަރުގެ މީހާއަކީ، މއ. ސޭބޫ މުހައްމަދު ފާރިޝްއެވެ.
މި ދެ މީހުން ދިރުވާލައިގެން ރާއްޖެއަށް އެތެރެކުރި މަސްތުވާތަކެތި މިހާރު ފުލުހުން ހޯދާފައިވާ ކަމަށް ވަނީ މައުލޫމާތު ލިބިފަ އެވެ.
އެ ތަކެތި ހޯދީ އެ ދެ މީހުން އެޑްމިޓްކޮށްފައި ބައިތިއްބައިގެން އެ މީހުން ބޮޑުކަމުދިޔުމުންނެވެ. ދެ މީހުންވެސް އެޑްމިޓްކޮށްފައި ތިބީ ދޫނިދޫ މެޑިކަލްސްގައެވެ.