ޕްރޮގްރަސިވް ޕާޓީ އޮފް މޯލްޑިވްސް (ޕީޕީއެމް)އިން ދާދި ފަހުން ބޭއްވި ކޮންގްރެސް ސައްހަ ނުވާނެ ކަމަށް ޕީޕީއެމްގެ ފުރަތަމަ ކޮންގްރެސްއިން ފަސް އަހަރު ދުވަހަށް އިންތިހާބު ކުރި އެ ޕާޓީގެ ރައީސް އަދި ކުރީގެ ރައީސް މައުމޫން އަބުދުލް ގައްޔޫމް ވިދާޅުވެއްޖެ އެވެ.
ރިޔާސީ އިންތިހާބު ކާމިޔާބު ކުރި އިބްރާހިމް މުހައްމަދު ސޯލިހު (އިބޫ) އާއި ރައީސް މައުމޫންގެ އޮފީހުގައި ބޭއްވި ބައްދަލުވުމަށް ފަހު ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް މައުމޫން ވިދާޅުވީ، ޕީޕީއެމްގެ ކޮންގްރެސް ބާއްވާފައިވަނީ އެޕާޓީގެ އަސާސީ ގަަވައިދާ ހިލާފަށް ކަމަށެވެ.
ޕާޓީގެ އަސާސީ ގަވައިދާ ހިލާފަށް ކުރާ އެއްވެސް ކަމެއް ސައްޙަ ނުވާނެ ކަމަށާއި، ކޮންގްރެސް ބާއްވާފައިވަނީ އަސާސީ ގަވއިދުގައި ބުނާ ކަންކަމާއި ހިލާފަށް ކަމަށް ރައީސް މައުމޫން ވަނީ ވިދާޅުވެފަ އެވެ. ކޮންގްރެސް އަށް މީހުން ގެންނަނީ ޕާޓީގެ ހުރިހާ ގޮފިތަކަކުން ވަކި އުސޫލަކުން ކަމަށާއި، ސައްޙަ މައުލޫމާތު ނުލިބި، އަދި މީޑިއާވެސް ނުވައްދާ ސިއްރުން އެ ބޭއްވި ކޮންގްރެސް ސައްޙަ ނުވާނެ ކަމަށެވެ.
ޕާޓީ އަބުރާ ހޯދުމަށް ކޯޓަށް ވަޑައިގަންނަވާނަންތޯ ނޫސްވެރިއަކު ސުވާލު ކުރުމުން ރައީސް މައުމޫން ވިދާޅުވީ، ޕާޓީ ހޯދުމަށް ހުދު އެމަނިކުފާނު އަދި ވަޑައިނުގަންނަވާ ކަމަށެވެ. އެހެން ނަމަވެސް އެމަނިކުފާނާއި އެކީ މަސައްކަތް ކުރައްވާ ބޭފުޅުން އެކަމަށް މަސައްކަތް ކުރައްވާނެ ކަމަށެވެ.
ޕީޕީއެމުން ކޮންގްރެސްއެއް ބާއްވައި، ޕާޓީގެ މުހިއްމު މަގާމްތަކަށް މީހުން ހޮވާފައިވަނީ އަސާސީ ގަވާއިދާ ހިލާފަށް ކަމަށް ބުނެ، ކޮންގްރެސްގެ ނިންމުންތައް ބާތިލްކުރަން ކޯޓަށް ހުށަހަޅާނެ ކަމަށް ރައީސް މައުމޫންގެ ސިޔާސީ ހަރަކާތް، އެމްއާރްއެމްއިން ވަނީ ކުރިން ބުނެފަ އެވެ.
ޕީޕީއެމްގެ އިންތިހާބީ ކޮމެޓީގައި ތިއްބެވި އަދި މިހާރު މައުމޫން ރިޕޯމް މޫމަންޓް، އެމްއާރްއެމްގައި ހަރަކާތްތެރިވާ ތިން މެންބަރަކު ނެރުނު ބަޔާނެއްގައި ބުނެފައިވަނީ ޕީޕީއެމްގެ އަސާސީ ގަވާއިދުގެ 72 ވަނަ މާއްދާގެ ހ ގައިވާ ގޮތުން ޕާޓީގެ އެތެރޭގައި ބާއްވާ ހުރިހާ އިންތިހާބުތަކެއް ހިންގައި ބަލަހައްޓާނީ ޕާޓީގެ އިންތިހާބީ ކޮމިޓީން ކަމަށް ބަޔާންކޮށްފައި އޮތް ނަމަވެސް ކޮންގްރެސްގައި މަގާމްތަކަށް ބޭފުޅުން ހޮވާފައިވަނީ އިންތިހާބީ ކޮމިޓީގެ ޣައިރު ހާޒިރުގައި ކަމަށެވެ. އެހެންކަމުން އެޖަލްސާގައި ޕާޓީގެ މަގާމްތަކަށް އިންތިހާބުކޮށްފައިވާ މީހުންގެ ސައްހަ ކަމެއް ނޯންނާނެ ކަމަށް ވެސް އިންތިހާބީ ކޮމިޓީގެ އެ ބަޔާނުގައި ވަނީ ބުނެފަ އެވެ.
އެ ބަޔާނުގައި އިތުރަށް ވަނީ، ޕީޕީއެމްގެ އަސާސީ ގަވާއިދާ ހިލާފަށް ކޮންގްރެސް ކުރިއަށް ގެންދާތީ ޕާޓީގެ ގިނަ ގޮފިތަކަކުން ޝަކުވާ ހުށަހަޅާފައިވާ ކަމަށް ބުނެފަ އެވެ. މީގެ އިތުރުން ކޮންގްރެސް ހުއްޓުވުމުގެ ވަގުތީ އަމުރަކަށް އެދި ރައީސް މައުމޫންގެ ދަރިކަނބަލުން ޔުމްނާ މައުމޫން ސިވިލް ކޯޓަށް މައްސަލައެއްވެސް ހުށަހެޅުއްވި އެވެ.