ޗެނަލް 13 ގައި މަސައްކަތް ކުރަމުންދިޔަ ގިނަ އަދަދެއްގެ މުވައްޒަފުން ކުއްލި ގޮތަކަށް ވަޒީފާއިން ވަކިކޮށްފި އެވެ.
އެނގިފައިވާ ގޮތުގައި ޗެނަލް 13 ގައި މަސައްކަތް ކުރަމުންދިޔަ 25 އަށްވުރެ ގިނަ މުއައްޒަފުން ވަޒީފާއިން ވަކިކޮށްފައިވާ ކަމަށާއި އެމުވައްޒަފުން ވަޒީފާއިން ވަކި ކޮށްފައިވަނީ އިއްޔެގެ ވަގުތެއްގަ އެވެ.
އެނގިފައިވާ ގޮތުގައި އިއްޔެ ވަޒީފައިން ވަކި ކުރި މުވައްޒަފުންގެ ތެރެއިން ޗެނަލް 13 ގައި ގިނަ ދުވަސްތަކެއް ވަންދެން މަސައްކަތް ކުރި މުވައްޒަފުންވެސް ހިމެނެ އެވެ. އަދި އަލަށް ނޫސްވެރިކަމުގެ ދާއިރާއަށް ގުޅުނު ގިނަ އަދަދެއްގެ ޒުވާން ނޫސްވެރިންވެސް ހިމެނެ އެވެ.
ޗެނަލް 13ގެ ސީއީއޯ މުހައްމަދު ލައްމާން "އަވަސް" އަށް ވިދާޅުވީ، އެކަމަކީ އިންޓާނަލް ކަމެއް ކަމަށާއި މިހާރު ކުރެވެމުންދަނީ ކުންފުނި ރީސްޓްރަކްޗާ ކުރުމުގެ މަސައްކަތް ކަމަށެވެ. އޭނާ ވިދާޅުވީ އިތުރު މުވައްޒަފުން ވަކިނުކުރާނެ ކަމަށާއި ވަކިކުރަން ނިންމާފައިވާ މުވައްޒަފުން މިހާރު ވަކިކޮށްފައިވާ ކަމަށެވެ.
ޗެނަލް 13ގެ ގިނަ އަދަދެއްގެ މުއައްޒަފުން ވަޒީފާއިން ވަކިކޮށްފައިވާއިރު، އެ ޗެނަލް އަކީ މިހާރުގެ ސަރުކާރު ހިންގާ ޕާޓީ، ޕީޕީއެމް އިސްވެރިން ހިންގަމުން އަންނަ ޗެނަލެކެވެ.