އުމުރުން 65 އަހަރުން މަތީ ފަރާތްތަކަށް ރައީސް ކަމަށް ކުރިމަތި ލެވޭގޮތަށް ގާނޫނު އަސާސީއަށް އަލުން އިސްލާހެއް ހުށަހަޅައިފި އެވެ.
އެ މައްސަލަ މަޖިލީހަށް ހުށަހަޅާފައިވަނީ ޕީޕީއެމްއަށް ނިސްބަތްވާ، އިނގުރައިދޫ ދާއިރާގެ މެންބަރު އިބްރާހިމް ފަލާހު އެވެ. ޕީޕީއެމްގެ ޕީޖީ ގުރޫޕްގެ ޑެޕިއުޓީ ލީޑަރުގެ މަގާމު ވެސް އަދާ ކުރައްވާ ފަލާހު ކުރިން ވިދާޅުވީ އެ އިސްލާހު ހުށަހަޅަން ނިންމެވީ އެހެން ގައުމުތަކުގައި ވެސް ވެރިކަމަށް ކުރިމަތިލެވޭ އެންމެ މަތީ އުމުރެއް ނެތުމުން އެއީ ރާއްޖޭގައި ވެސް އޮންނަން ޖެހޭ ކަމެއް ކަމަށް ގަބޫލު ނުކުރައްވާތީ ކަމަށެވެ.
"އެއްވެސް މީހަކަށް ރައިސުލްޖުމްހޫރިއްޔާ ކަމުގެ މަގާމަށް ކުރިމަތިނުލެވޭ ގޮތަށް އޮންނަން ޖެހޭނެ ކަމަކަށް ގަބޫލެއް ނުކުރަން، އެހެންވެ އެ އިސްލާހު އުވާލަން ހުށަހަޅަނީ،" ފަލާހު ވިދާޅުވި އެވެ. ގާނޫނު އަސާސީއަށް އިސްލާހު ގެނެވޭނީ މަޖިލީހުގެ ތިންބައިކުޅަ ދެބައި މެންބަރުންގެ ތާއިދާއެކު އެވެ.
ގާނޫނު އަސާސީއަށް 2008 ވަނަ އަހަރު އަމަލު ކުރަން ފެށި އިރު ރައީސުލް ޖުމްހޫރިއްޔާ ކަމަށް ކުރިމަތިލުމަށް ވަކި މަތީ އުމުރެއް ކަނޑައަޅާފައެއް ނުވެއެވެ. އެހެން ނަމަވެސް، މަޖިލީހުން ފަހުން ވަނީ އުމުރުން 65 އަހަރުން މަތީ ބޭފުޅުންނަށް ރައީސް ކަމަށް ކުރިމަތި ނުލެވޭނެ ކަމަށް ގާނޫނު އަސާސީއަށް އިސްލާހެއް ހުށަހަޅައި އެ އިސްލާހު ފާސްކޮށް، ގާނޫނު އަސާސީ އިސްލާހު ކޮށްފައެވެ.
އުމުރުން 65 އަހަރުން މަތީގެ މީހުންނަށް ރައީސް ކަމަށް ކުރިމަތި ނުލެވޭ ގޮތަށް ގާނޫނު އަސާސީ އިސްލާހު ކުރީ 2015 ވަނަ އަހަރުގެ ތެރޭގައި ޕީޕީއެމްގެ މެންބަރުންނާއި ޖުމްހޫރީ ޕާޓީ އަދި އެމްޑީޕީގެ ބައެއް މެންބަރުންގެ ތާއިދާއެކު އެވެ.
އެ އިސްލާހު ގާނޫނު އަސާސީއަށް ގެނައުމުން އޭރު ވެރިކަމަށް ކުރިމަތިލުމުގެ ޝައުގު ހުންނެވި ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ފުރުސަތު ގެއްލުނެވެ. އެ އިސްލާހު ގާނޫނު އަސާސީއަށް ނުގެނެވޭނެ ކަމަށް އޭރު ބައެއް ގާނޫނީ ބޭފުޅުން ވިދާޅުވަމުން ދިޔަ އެވެ.