އެހެން ތަންތަން ފެހި ކުރުމުގެ ގޮތުން ރަށްރަށުން ރުއްގަސް ނަގައިގެން ގެންދާ މައްސަލަ ވަރަށް ސީރިއަސް މައްސަލައިގެ ގޮތުގައި ބަލައި ފިޔަވަޅު އަޅާނެ ކަމަށް އެންވަޔަރުމަންޓް މިނިސްޓަރު، ޑރ. ހުސެން ރަޝީދު ވިދާޅުވެއްޖެ އެވެ.
ޔޫއެންޑީޕީގެ "ސްމޯލް ގްރާންޓް ޕްރޮގްރާމް" އިން އެހީދޭ މަދަނީ ޖަމްއިއްޔާތަކަށް ލިޔުން ހަވާލުކުރުމަށް މިއަދު ހޮޓަލް ޖެންގައި ބޭއްވި ހަފްލާގައި މިނިސްޓަރު ޑރ. ހުސެއިން ވިދާޅުވީ، މިއަދު ރަށްތަކަށް ދިމާވެފައިވާ އެންމެ ބޮޑު މައްސަލަ އަކީ ރާއްޖޭގެ ކަނޑުތަކާއި، ފަޅުތަކަށް ކުނި އެޅުން ކަމަށާއި، ރުށްގަސް ކެނޑުން ކަމަށެވެ.
"އެއްރަށް ފެހި ކުރުމުގެ ބޭނުމުގައި އަނެއް ރަށުން ރުށްގަސް ގެންދިއުމަކީ ސީރިއަސް މައްސަލައެއް ގޮތުގައި މިނިސްޓްރީއިން ބަލާނެ. އެކަން ހުއްޓުވާނެ،" މިނިސްޓަރު ވިދާޅުވި އެވެ.
"ސްމޯލް ގްރާންޓް ޕްރޮގްރާމް" ފުރިހަމަ ކުރި 14 ފަރާތަކަށް ވަނީ މިއަދުގެ ހަފްލާގައި ހަދާނީ ލިޔުން ހަވާލުކޮށްފަ އެވެ. މި ޕްރޮގްރާމަށް އަލަށް ހޮވުނު 16 މަދަނީ ޖަމްއިއްޔާއަކަށް އެހީ ލިބުނު ކަމުގެ ލިޔުން ވެސް ހަވާލުކުރި އެވެ.
ރާއްޖެއަކީ ޖަޒީރާވަންތަ ގައުމެއްގެ ގޮތުގައި ސިފަ ކުރައްވަމުން މިނިސްޓަރު ވިދާޅުވީ ގުދުރަތީ ގޮތުން ރާއްޖެއަށް ލިބިފައިވާ ސިފަތައް ހިމާޔަތް ކުރަން ޖެހޭނެ ކަމަށާއި، ރާއްޖޭގެ ތިމާވެށި އަންނަން އޮތް ޖީލުތަކަށް ފޯރު ކޮށްދިނުމަކީ ގައުމީ ވާޖިބެއް ކަމަށެވެ. މީގެއިތުރުން، ކުރިއަށް އޮތް ދުވަސްތަކުގެ ތެރޭ ރަށްރަށުގައި ގަސް އިންދުމުގެ ޕްރޮގްރާމްތައް ހިންގާނެ ކަމަށާއި، އެއްވެސް ރަށެއް ބާކީ ނުކޮށް ހުރިހާ އަތޮޅުތަކެއްގެ ރަށްތައް ސާފު ކުރުމުގެ މަޝްރޫޢުތައް ހިންގާނެ ކަމަށްވެސް ވިދާޅުވި އެވެ. އަދި މިފަދަ ބޮޑެތި މަޝްރޫއުތައް ހިންގާނީ އެންވަޔަރަމެންޓަލިސްޓުންގެ ލަފައާއެކު ކަމަށްވެސް މިނިސްޓަރު ޑރ. ހުސައިން ވިދާޅުވި އެވެ.
މި ރަސްމިއްޔާތުގައި ވަނީ ދިވެހި ބޭހަށް ބޭނުންކުރާ ފަތްޕިލާވެލީގެ ޑާޓާ ހިމެނޭ ވެބްސައިޓް އެއްވެސް ލޯންޗު ކޮށްފަ އެވެ. ބަޔޯޑައިވާސިޓީ ޑޮޓް ކޮމްއިން ދިވެހި ބޭހަށް ބޭނުންކުރާ 400 އަށް ވުރެ ގިނަ ފަތްޕިލާވެލީގެ ތަފްސީލީ މައުލޫމާތު ލިބެން ހުންނާނެ އެވެ. އަދި މި ގަސްތަކުން ބޭސްވެރިކަން ކުރެވޭނީ ކޮންކަހަލަ ކަންކަމަކަށްތޯވެސް މި ވެބްސައިޓް މެދުވެރިކޮށް ފެންނަން ހުންނާނެ އެވެ. މީގެ އިތުރުން، ރާއްޖޭގެ ކުޅިތަކާއި ޗަސްބިންތަކުގެ މައުލޫމާތާއި، ވީޑީއޯ ހިމެނޭ ވެބްސައިޓެއް
ވެސް ވަނީ ލޯންޗުކޮށްފަ އެވެ.
ގްލޯބަލް އެންވަޔަރަމަންޓް ފެސިލިޓީ، ޖެފްގެ ދަށުން ހިންގާ ސްމޯލް ގްރާންޓް ޕްރޮގްރާމް، އެސްޖީޕީއަކީ ތިމާވެށީގެ މައްސަލަތައް ހައްލުކުރުމަށް އިޖްތިމާއީ މަސައްކަތްތައްކުރާ އަމިއްލަ ޖަމިއްޔާތަކަށް ތަފާތު މަޝްރޫއުތައް ހިންގުމަށް ބޭނުންވާ މާލީ އެހީތެރިކަން ފޯރުކޮށްދިނުމަށް ޔޫއެންޑީޕީއާ ގުޅިގެން ހިންގާ ޕްރޮގްރާމެކެވެ.