ވިހަ ރަށެއްގައި ނަރުދަމާ ނިޒާމް ގާއިމްކުރުމުގެ ބޮޑު މަޝްރޫއު ހަވާލުކުރީ އެކަމުގެ ގާބިލުކަން ނެތް ކަމަށް އެ ކުންފުނިން ބުނެފައިވަނިކޮށް ކަމަށް ފެނަކަ ކޯޕަރޭޝަންއިން ބުނެފި އެވެ. މި މަޝްރޫއުގެ ދަށުން އެ ކުންފުންޏަށް ދެމެހެއްޓެނެވި ފައިދާއެއް ނުކުރާނެ ކަމާއި ފެނަކަ އޮތީ މާލީގޮތުން ދަތި ހާލަތެއްގައި ކަމަށް ކުންފުނިން ބުންޏެވެ.
މި މަޝްރޫއަކީ ފެނަކަ ކޯޕަރޭޝަނާ ހަވާލުކޮށްގެން ބޮޑު ލޯނެއް ނަގައިގެން ނިމި ދިޔަ ސަރުކާރުން ހިންގަން މަސައްކަތް ކުރި މަޝްރޫއުއެކެވެ. ނަމަވެސް ފެނަކަ ކޯޕަރޭޝަންގެ މާލީ ހާލަތު އެފަދަ މަޝްރޫއުއެއް ހިންގުމަށް ފުރުސަތު ނުދޭ ކަމަށާއި އެކަމުގެ ގާބިލްކަން ނެތް ކަމަށް އެންޓި ކޮރަޕްޝަން ކޮމިޝަން، އޭސީސީއިން ވަނީ ބުނެފަ އެވެ. އެ މަޝްރޫއު ހަވާލު ކުރުމުގައި ކޮރަޕްޝަންގެ އަމަލުތަކެއް އުޅޭތީ މަޝްރޫއު ކެންސަލް ކުރަން އެ ކޮމިޝަނުން ވަނީ އަންގާފަ އެވެ.
އެކަމާ ގުޅިގެން ފެނަކަ ކޯޕްރޭޝަންއިން މިއަދު ނެރުނު ނޫސް ބަޔާނެއްގައި ބުނީ ރައީސް އޮފީހާއި ފިނޭންސް މިނިސްޓްރީއާއެކު ކުރި މުއާމަލާތްތަކުގައި 20 ރަށުގެ ނަރުދަމާގެ މަޝްރޫއު ހިންގުމަށްޓަކައި އެކްސްޓާނަލް ފައިނޭންސް ހަމަޖައްސައިފިނަމަ އެ ކުންފުނިން ބޮޑެތި ދަތިތަކާ ކުރިމަތިލާން ޖެހޭނެ ކުރިން ވެސް ފާހަގަކޮށްފައިވާނެ ކަމަށެވެ. އަދި ފެނަކައަކީ އެފަދަ ގާބިލު ކަމެއް ނެތް ކުންފުންޏެއް ކަމަށާއި މަޝްރޫއުތައް އަލުން ނަގައިފިނަމަ ކުންފުނި ބަނގުރޫޓުވުން އެކަށީގެންވާ ކަމެއް ކަމަށް ގަބޫލުކޮށް ކަމާބެހޭ ފަރާތްތަކަށް އެކަން އެންގި ކަމަށް ވެސް ބުންޏެވެ.
ވިހި ރަށުގެ ނަރުދަމާގެ މަޝްރޫއު ބާތިލު ކުރުމަަށް އޭސީސީއިން އެންގި އެންގުމަށް އެ ކުންފުނިން ފުރިހަމަ އެއްބާރުލުން ދޭނެ ކަމަށް ވެސް ވަނީ ބަޔާނުގައި ބުނެފަ އެވެ.
ވިހި ރަށުގެ ނަރުދަމާ އެޅުމުގެ މަަޝްރޫއަށް ފެނަކައިން ސޮއި ކޮށްފައިވަނީ 800 މިލިއަން ދިވެހި ރުފިޔާއަށެވެ. ސްރީ ލަންކާގެ ކުންފުންޏަކާއެކު ސޮއިކުރި ރަށްތަކުގެ ތެރޭގައި ހއ. މާރަންދޫ، ވަށަފަރު އދ . ދިގުރަށް، ހދ. ވައިކަރަދޫ، ފިނޭ އަދި ށ. ފޯކައިދޫ، ނ. މާފަރު އާއި، އެ އަތޮޅު ޅޮހި، ރ. ކިނޮޅަސް، ބ. ކަމަދޫ، މާޅޮސް، ގޮއިދޫ އަދި ޅ. އޮޅުވެލިފުށި ކ. ގުޅީގެ އިތުރުން އއ. ފެރިދޫ ވ. ކެޔޮދޫ އަދި ގއ. ދެއްވަދޫ އަދި ގދ. ހޯޑެއްދޫ ހިމެނެއެވެ.