ބަނގުރޫޓްވުމާ ހަމައަށް ގޮސްފައި އޮތް ފެނަކަ ކޯޕަރޭޝަންގެ ދަރަނި ތަކުގެ ތެރެއިން 900 މިލިއަނެއްހާ ރުފިޔާ ދައްކައިފި އެވެ.
މި މައުލޫމާތު ހާމަކޮށްފައިވަނީ މިދިޔަ އަހަރެއްހާ ދުވަހު ފެނަކައިން ކޮށްފައިވާ މަސައްކަތްތަކުގެ މައްޗަށް އެކުލަވާލާފައިވާ ރިޕޯޓެއް ގައެވެ.
ރިޕޯޓްގައިވާ ގޮތުން ފެނަކަ ކޯޕަރޭޝަންގެ މިހާރުގެ މެނޭޖްމަންޓުން އެ ކުންފުންޏާ ހަވާލުވިއިރު 4 ބިލިއަން ރުފިޔާއަށް ވުރެ ބޮޑު ދަރަންޏެއް އޮތެވެ. އެހެންނަމަވެސް މިދިޔަ އަހަރެއްހާ ދުވަހު ކުރި މަސައްކަތުން ރަނގަޅު ކާމިޔާބީތަކެއް ހާސިލްކޮށްފައިވާ ކަމަށްވެސް ރިޕޯޓްގައި ފާހަގަކޮށްފަ އެވެ. އެގޮތުން ދަރަނި ކުޑަކުރިއިރު ހިންގުމުގެ ހަރަދުން އެއް އަހަރުގެ ތެރޭގައި 160 މިލިއަން ރުފިޔާ ކުޑަކޮށްފައިވެ އެވެ.
ރިޕޯޓްގައި ބުނެފައިވަނީ އެ ކުންފުނީގެ ދަރަނި ބޮޑުވީ ކުންފުންޏަށް ލިބޭ އާމްދަނީއަށް ބެލުމެއް ނެތި ވަޒީފާ ދިން މުވައްޒަފުންގެ ސަބަބުންނާއި ބޭކާރު މަޝްރޫއުތަކާ ގުޅިގެން އިސްރާފް ބޮޑުވުމުގެ ސަބަބުންނެވެ.
ފެނަކަ އިން 1،094 ފަރާތަކަށް ދައްކަންޖެހޭ 3.4 ބިލިއަން ރުފިޔާގެ ތެރެއިން 600 މިލިއަން ރުފިޔާ 281 ފަރާތަކަށް ދައްކާ ހަލާސްކޮށްފައިވާ ކަމަށްވެސް ރިޕޯޓްގައިވެ އެވެ.
ރިޕޯޓްގައިވާ ގޮތުން ފެނަކައަށް ލިބޭ އާމްދަނީގެ 40 ޕަސަންޓް ދަރަނި އަދާކުރުމަށް ހޭދަކުރަންޖެހޭތީ ރައްޔިތުންނަށް ކޮންމެހެން ދޭންޖެހޭ ހިދުމަތްތައް ދިނުމަށް ބޮޑެތި ގޮންޖެހުންތަކެއް އެ ކުންފުންޏަށް އެބަހުއްޓެވެ. ފެނަކައިގެ ދަރަނިތައް އަދާކުރަމުން ކުންފުނިން ރީސްޓްރަކްޗާކޮށް ހަރުދަނާކުރުމަށް މާލީ އެހީތެރިކަން ބޭނުންވާ ކަމަށްވެސް ބުނެފައިވެ އެވެ.
ފެނަކައަށް އާމްދަނީ ލިބޭ މައިގަނޑު ވަސީލަތަކީ ކޮންޓްރޯލް އަގުތަކެއްގައި ދެމުން އަންނަ ޔުޓިލިޓީ ހިދުމަތް ކަން ފާހަގަކޮށް ރިޕޯޓްގައި ބުނެފައިވަނީ މާލީ ގޮންޖެހުންތަކެއް ހުރި ނަމަވެސް ކުންފުނީގެ ހިދުމަތްތައް ރަނގަޅު ކުރަން ފާއިތުވި އަހަރެއްހާ ދުވަހުގެ ތެރޭގައި ރަނގަޅު ކުރިއެރުންތަކެއް ހޯދާފައިވާ ކަމަށެވެ. އެގޮތުން 21 ރަށުގައި ފެނުގެ ހިދުމަތް އަލަށް ފެށުމާއި ފަސް ރަށުގައި ފެނުގެ ކެޕޭސިޓީ އިތުރު ކުރުމާއި ހަތަރު ރަށުގައި ނަރުދަމާގެ ހިދުމަތް އަލަށް ދޭން ފެށުމާއި 53 ރަށުގައި 61 އާ ޖެންސެޓް ބެހެއްޓުން ފާހަގަކޮށްފައިވެ އެވެ.