ފެނަކައިގެ ސައްތައިންސައްތަ ހިއްސާ، ސްޓޭޓް ޓްރޭޑިން އޯގަނައިޒޭޝަން ޕަބްލިކް ލިމިޓެޑް (އެސްޓީއޯ)އިން ގަނެ އެ ކުންފުނީގެ ސަބްސިޑަރީ ކުންފުންޏެއްގެ ގޮތުގައި ހެދުމަށް ކުރަމުން ދިޔަ މަސައްކަތް ހުއްޓާލައިފި އެވެ.
ސަރުކާރުގެ އެންމެ ބޮޑު އެއް ކުންފުނި އެސްޓީއޯ އިން މިއަދު ބުނީ އެ ކުންފުނީގެ ދަށަށް ފެނަކަ ބަދަލުކުރުމުގެ މަސައްކަތް ހުއްޓާލީ މިދިޔަ އާދީއްތަ ދުވަހު ފިނޭންސް މިނިސްޓްރީން އެގޮތަށް އަންގާފައިވާތީ ކަމަށެވެ.
މި އެންގުމާއެކު އެސްޓީއޯ އިން ސަރުކާރަށް ކުރިން ހުށަހެޅި އެކުއިޒިޝަން ޕްރޮޕޯސަލްގައި ހިމަނާފައިވާ ކަންކަން ކުރިއަށް ގެންގޮސްފައިވާ މިންވަރަށް ބަލައި، އެސްޓީއޯ އިން ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް ޑިރެކްޓަރުންގެ ބޯޑުންވެސް މިއަދު ނިންމާފައިވާ ކަމަށް އެސްޓީއޯ އިން ބުނެ އެވެ.
ފެނަކަ، އެސްޓީއޯ އިން ގަނެ އެ ކުންފުނީގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސެވުމަށް ވަޒީރުންގެ މަޖިލީހުގެ ލަފާފުޅާއެކު ރައީސް ޑރ. މުހައްމަދު މުއޮއްޒު ނިންމެވީ މިދިޔަ އޮގަސްޓު މަހު އެވެ.