އަތޮޅުތަކުގައިވެސް އަންނަ އަހަރުން ފެށިގެން ކުނީގެ ފީ ބިލް ކުރާނީ ކަރަންޓު ބިލާއެކު ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފި އެވެ.
ދައުލަތުގެ މީޑިއާ ޕީއެސްއެމްގައި ވާހަކަ ދައްކަވަމުން ވެމްކޯގެ ސަދަން އޮޕަރޭޝަންސްގެ މެނޭޖިން ޑިރެކްޓަރު އަހުމަދު ޝާފިއު ވިދާޅުވީ މާލެ ސަރަހައްދުގައި ކަރަންޓު ބިލްގައި ކުނީގެ ފީ ހިމަނާފައިވާ ގޮތަށް ވެމްކޯ އިން ހިދުމަތް ދޭ ހުރިހާ ރަށެއްގައި ޖެނުއަރީ ފުރަތަމަ ދުވަހުން ފެށިގެން ކަރަންޓު ބިލްގައި ކުނީގެ ފީ ހިމަނަން ނިންމާފައިވާ ކަމަށެވެ.
ހދ. ކުޅުދުއްފުށި، ގދ. ތިނަދޫ، ލ. ފޮނަދޫ އަދި ކ. މާފުށީގައި މިވަގުތު ވެމްކޯ އިން ހިދުމަތް ދެމުން ދަނީ ހިލޭކަން ފާހަގަކުރައްވާ ޝާފިއު ވިދާޅުވީ ޖެނުއަރީ ފުރަތަމަ ދުވަހުން ފެށިގެން އެ ރަށްރަށުން ކަރަންޓު ބިލްގައި ހިމަނައިގެން ކުނީގެ ފީ ނަގާނެ ކަމަށެވެ.
މާލެ ސަރަހައްދުގައި ކުނީގެ ބިލާއި ކަރަންޓު ބިލް އެއްކޮށްލީ މިދިޔަ އަހަރު އެވެ. އޭރު ބިލް އެއްކޮށްލީ ބައެއް މީހުން ވެމްކޯއަށް ފައިސާ ނުދައްކާ މައްސަލަ ބޮޑުވެގެން އެކަމަށް ހައްލެއް ހޯދުމަށެވެ.
ގޭބިސީތަކުން ކުނި އުކާލުމަށް ވެމްކޯ އިން މަހަކަށް ނަގަނީ 150 ރުފިޔާގެ ފީއެކެވެ. ކޮމާޝަލް ނުވަތަ ވިޔަފާރިތަކުން ކުނި އުކާލާ ކޮންމެ ދުވަހަކަށް ލީޓަރަކަށް ނަގަނީ 20 ލާރި އެވެ.