އެމްޑީޕީގެ އެތެރޭގެ އިންތިހާބުގައި ވާދަ ކުރަން ކުރިމަތި ލުމުގެ ފުރުސަތު އަންނަ ހޯމަ ދުވަހާ ހަމައަށް އިތުރުކޮށްފި އެވެ.
އެމްޑީޕީން ކޮށްފައިވާ އިއުލާނެއްގައި ބުނެފައިވަނީ، ގިނަ އަދަދެއްގެ މެމްބަރުންގެ އެދުމުގެ މަތިން، އެ ޕާޓީގެ ހުސްވެފައިވާ މަގާމުތަކަށް ކުރިމަތިލުމުގެ މުއްދަތު 30 ސެޕްޓެމްބަރު 2019 އާ ހަމައަށް އިތުރު ކޮށްފައިވާ ކަމަށެވެ. ކުރިން ނިންމާފައި އޮތީ ކުރިމަތިލެވޭ އެންމެ ފަހު ތާރީހަކީ 26 ސެޕްޓެމްބަރު ކަމަށެވެ.
އެމްޑީޕީން ބުނީ މުއްދަތު އިތުރު ކުރި ނަމަވެސް، މަގާމުތަކަށް ކުރިމަތިލެވޭނީ ކުރިން ކޮށްފައިވާ އިއުލާނުގައި ބުނެފައިވާ ފަދައިން 26 ސެޕްޓެމްބަރ 2019 ގެ ނިޔަލަށް އެ ޕާޓީގެ މެމްބަޝިޕް ޕާޓީ އޮފީހަށް ހުށަހަޅާފައިވާ މީހުނަށެވެ.
އަންނަ މަހުގެ 18 ވަަނަ ދުވަހު އެމްޑީޕީގެ ހަރުގެތަކާއި، ޖަގަހަތަކުގައި ބާއްވާ އިންތިހާބުގައި 45 ދާއިރާއަކުން 104 މަގާމަކަށް ބޭފުޅުން ހޮވާނެ އެވެ. އޭގެތެރޭގައި، ހިމެނެނީ އެކި ދާއިރާތަކުން ހޮވާ ރައީސްގެ ފަސް މަގާމާއި، ނައިބު ރައީސްގެ ހަތް މަގާމާއި، ސެކްރެޓަރީގެ 27 މަގާމާއި، ސެކްރެޓަރީގެ ނައިބުގެ 29 މަގާމާއި، މައުލޫމާތާއި އިޝްތިހާރާއި، އާންމު އެންގުންތަކާ ބެހޭ ސެކްރެޓަރީގެ 36 މަގާމެވެ.