ދިރާގު ކަސްޓަމަރުން ނަށް މިއަދު ހެނދުނު ނުވައަކުން ހަވީރު ހައެއް ޖެހުމާހަމަ އަށް ސައޫދީ އަރަބިއްޔާ އަށް ހިލޭ ގުޅޭ ގޮތަށް ހަމަޖައްސައިފި އެވެ.
ދިރާގުން ބުނީ ސައޫދީ އަރަބިއްޔާގައި ރޭ ހިނގި ނުރައްކާތެރި ހާދިސާއަކާ ގުޅިގެން އެ ގައުމުގައި ތިބި ދިވެހިންނަށް ރާއްޖޭން ފަސޭހައިން ގުޅޭނެ އިންތިޒާމު ހަމަޖެއްސުމުގެ ގޮތުން މިއަދު ހެނދުނުން ފެށިގެން މުޅިން ހިލޭ އެ ގައުމަށް ގުޅޭނެ ކަމަށެވެ.
"މިހާރު ޕްރިޕެއިޑް ކަސްޓަމަރުންނާއި ޕޯސްޕެއިޑް ކަސްޓަމަރުންނަށް ވެސް ހިލޭ ގުޅޭނެ،" ދިރާގުގެ މެނޭޖަރު މާކެޓިން އެންޑް ކޮމިއުނިކޭޝަން މުހައްމަދު މިރުޝާން ހަސަން މިއަދު ވިދާޅުވި އެވެ.
ސައޫދީއަށް މޫސުން ގޯސްވުމުގެ ސަބަބުން މައްކާގައި ރޭ ވަނީ ނުރައްކާތެރި ހާދިސާއެއް ހިނގާފަ އެވެ. މޫސުން ގޯސްވެ، ވައިގަދަ ވުމުގެ ސަބަބުން ކްރޭން ވެއްޓިވަނީ 100 މީހުން މަރުވެ، އެތަށް ބަޔަކު ވަނީ ޒަހަމްވެފަ އެވެ. ނަމަވެސް މި ހާދިސާގައި އެއް ވެސް ދިވެއްސަކަށް ގެއްލުމެއްވެފައި ނުވާ ކަމަށް ސަރުކާރުން ވަނީ ބުނެފަ އެވެ.
މި އަހަރު ރާއްޖެ އިން 2000 މީހަކު ހައްޖަށް ގޮސްފައިވެ އެވެ. އޭގެތެރޭގައި ހިމެނެނީ ހައްޖު ކޯޕަރޭޝަންގެ ހަވާލުގައި 1300 މީހުންނާއި އަމިއްލަ ޖަމާއަތްތަކުގެ ހަވާލުގައި ދިޔަ 700 މީހުން ހިމެނެ އެވެ.
ސައޫދީ އަރަބިއްޔާ އަށް ހިލޭ ގުޅޭގޮތަށް ދިރާގުން ހަމަޖެއްސިއިރު، ރޭ މެންދަމު 12 އިން ތިނެއް ޖެހުމާ ހަމަ އަށް އުރީދޫ ކަސްޓަމަރުން ނަށް ވެސް ހިލޭ ސައޫދީ އަރަބިއްޔާ އަށް ގުޅޭ ގޮތަށް އެ ކުންފުނިން ހަމަޖެއްސި އެވެ.