ރައްޔިތުންގެ މަޖިލީހުގެ ޖަލްސާއެއް މާދާމާ ބާއްވަން ނިންމައިފި އެވެ.
މަޖިލީހުގެ އިދާރާއިން ބުނީ މާދަމާގެ ޖަލްސާ އޮންނާނީ ހެނދުނު 11:00 ޖަހާއިރު ކަމަށާއި އެ ޖަލްސާ ކުރިއަށް ގެންދާނީ ވެސް އޮންލައިން ކޮށެވެ.
މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރު ހަސަން ޒިއާއު ވިދާޅުވީ މާދަމާގެ ޖަލްސާގައި ހުރިހާ މެންބަރުންވެސް ބައިވެރިވާނީ ގޭގައި ތިއްބަވައިގެން ކަމަށެވެ. އަދި އިދާރީ މުވައްޒިފުންނާއި، މަޖިލީހުގެ ރައީސްގެ ތިއްބަވާނީ ގޭގައި ކަމަށެވެ.
މާދަމާގެ ޖަލްސާއަށް ގިނަ ކަންތައްތަކެއް ވަނީ އެޖެންޑާކޮށްފައެވެ. އެގޮތުން ލޯކަލް ކައުންސިލް އިންތިހާބާއި ގުޅޭގޮތުން ހުށައަޅާފައިވާ ބިލްތައް ފާހަގަކޮށްލެވެއެވެ. އަދި ޗިލްޑްރަންސް އޮމްބަޑްސްޕާސަންގެ މަގާމަށް އައްުޔަން ކުރެއްވުމަށް ރައީސް ފޮނުއްވާފައިވާ ނަމާ ގުޅޭ މައްސަލަ ދިރާސާ ކުރުމަށް ކޮމެޓީއަށް ފޮނުވުމާއި، ހަކަތައިގެ ބިލްގެ ބަހުސް ކުރިއަށް ގެންދިއުމާއި، މަތީ ތައުލީމްގެ ބިލްގެ ބަހުސާއި، ފުލުުހުންގެ ހިދުމަތުގެ ބިލްގެ އިތުރުން އިމިގްރޭޝަންގެ ގާނޫނަށް އިސްލާހު ގެނައުމުގެ ބިލްވެސް ވަނީ މާދަމާގެ ޖަލްސާއަށް އެޖެންޑާކޮށްފައެވެ.
އަދި ދެ ގަރާރެއްގެ އިތުރުން ކޮމެޓީން ނިންމާފައިވާ ތިން ރިޕޯޓަކާމެދު ގޮތް ނިންމުންވެސް މާދަމާގެ ޖަލްސާއަށް ވަނީ އެޖެންޑާ ކޮށްފައެވެ.
ކޮވިޑް-19 އާ ގުޅިގެން މަޖިލީހުގެ ޖަލްސާތައް އޮންލައިންކޮށް ކުރިއަށް ގެންދިއުމަށްފަހު މަޖިިލީހުގެ ޖަލްސާތައް ހުއްޓާލީ މިދިޔަ ހަފްތާއިން ފެށިގެންނެވެ.