އަތްތެރި މަސައްކަތްތަކަށް ކުޅަދާނަ ތަފާތު ހުނަރުވެރިން އުޅޭ ވަރަށް ގިނަ ރަށްރަށް އުތުރާއި މެދު އަދި ދެކުނުގެ އަތޮޅުތަކުގައި ވެއެވެ. ބައެއް ރަށްރަށުގެ ނަން ބުނެލުމުން އެއީ ވަކި ހުނަރަކަށް ކުޅަދާނަ ބަޔަކު އުޅޭ ރަށެއްކަން އެނގެ އެވެ. އޭގެ ތެރެއިން ބ. ތުޅާދޫގެ ނަމާއެކު ފުރަތަމަ ވެސް ސިކުނޑީގައި އޮންނާނީ ލިޔެލާޖެހުމުގެ މަސައްކަތެވެ.
ތުޅާދޫގެ އިގްތިސޯދުގެ މައިގަނޑު މަސައްކަތްތަކަކީ މަސްވެރި ކަމާއި ވަޑާމެވެ. ދެން ލިޔެލާޖެހުމާއި ލާފެން ކުރުމުގެ މަސައްކަތެވެ. އެ ރަށުން ތައްޔާރުކޮށް އަތްތެރި މަސައްކަތުގެ މައުރަޒު ތަކުގައި ހިމަނާ ތަކެއްޗަކީ އަބަދުވެސް ރަން ވަނަ ހޯދާ ތަކެއްޗެވެ. އެހެން ކަމުން އެއީ ލިޔެލާޖެހުމާއި ލާފެންކުރުމުގައި އެންމެ ހުނަރުވެރި އަދި ކުޅަދާނެ މީހުން އުޅޭ ރަށެވެ. މީގެ އެތަކެއް ޒަމާނުއްސުރެ ތުޅާދޫގައި ކުރަމުން އައި މި މަސައްކަތް މިއަދާ ހަމައަށް ވެސް ފަނޑުވުމެއް ނެތެވެ.
އަތްތެރި އެހެން މަސައްކަތްތަކާ ހިލާފަށް ތުޅާދޫގެ އަތްތެރި މަސައްކަތަށް އަބަދުވެސް ތަރައްގީ އާދެ އެވެ. ޓޫރިޒަމްގެ ތެރެއިންލާފައި އެ މަސައްކަތުގެ ތަފާތު ހުނަރުތައް އަބަދުވެސް ފެންނަމުން ދެއެވެ. މި ފަހުން ވެސް މިވަނީ އެފަދަ ފުރިހަމަ ބަދަލެއް ފެނިފަ އެވެ.
ތުޅާދޫގެ ޖަމިއްޔާއެއް ކަމަށްވާ ތުޅާދޫ ސްޕޯޓްސް ކްލަބް (ޓީއެސްސީ) އިން އިންތިޒާމް ކޮށްގެން ބޭއްވި އަންހެނުންގެ ފުޓްސަލް މުބާރާތުގެ ޗެމްޕިއަން ޓީމަށް ދިން ޓްރޮފީ އާއި ޗެމްޕިއަން އަދި ރަނަރަޕް ޓީމަށް ދިން މެޑަލްތަކުން ލިޔެލާޖެހުމުގެ މަސައްކަތާއި ތަރައްގީ ވަރަށް ފުރިހަމައަށް ވަނީ ދައްކާލާފަ އެވެ. ފާހަގަ ކުރެވުނު އެއް ކަމަކީ މުބާރާތުގެ ޗެމްޕިއަން ޓީމަށް ތަށި ހަވާލު ކޮށްފައި ވަނީ އެ ޓީމުގެ ނަން ވެސް ވަގުތުން އެ ތަށީގައި ކަނޑާނެގުމަށް ފަހު އެވެ. އަދި ލިޔެލާޖަހާ ތަކެތީން އާންމުކޮށް ފެންނަ ކަވި ޑިޒައިންތައް މި ޓްރޮފީތަކާއި މެޑަލްތަކުން ވެސް ފެނުނެވެ.
އެ މަސައްކަތުގެ މޭސްތިރިޔާ އަބްދުﷲ ސާޖިދު ބުނި ގޮތުގައި އެ މަސައްކަތަށް ހޭދަވީ ފަސް ވަރަކަށް ދުވަހެވެ. ސާޖިދަކީ ވިޔަފާރި އުސޫލުން "އައިލެންޑް ގުޑްސް" ގެ ނަމުގައި ލާޖެހުމުގެ މަސައްކަތް ކުރާ ހުނަރުވެރި އެކެވެ. އޭނާ ބުނާ ގޮތުގައި ދިވެހިވަންތަ މަސައްކަތުން ފެނިގެން މި ދިޔައީ ދިވެހިންގެ ހުނަރެވެ.
ޓީއެސްސީގެ މުބާރާތަށް "އައިލެންޑް ގުޑްސް" އިން ފަރުމާ ކޮށްދިން ޓްރޮފީ އާއި މެޑަލްތަކުގެ ފުރިހަމަ ކަމުގެ ވާހަކަ ސޯޝަލް މީޑިއާގައި ވެސް ވަރަށް ވައިގައި ހިފި އެވެ. އޭގެ ފަހުން ވެސް ތުޅާދޫގެ ލިޔެލާޖެހުމުގެ ތަފާތު މަސައްކަތެއް ފެނުނެވެ. ފުޓްބޯޅަ މުބާރާތަށް ތައްޔާރުކުރި ޓްރޮފީ އާއި މެޑަލްތަކުގެ ފޮޓޯތައް ނަގަން މަސައްކަތް ކުރަމުންދިޔަ ތުޅާދޫ ޒުވާނެއްގެ ކެމެރާގެ ލެންސްގެ މަތިގަނޑު ހަލާކުވުމާ ގުޅިގެން އެ ކެމެރާގެ ލެންސަށް ހެޔޮވަރުކޮށް ތައްޔާރުކުރި މަތިގަނޑެކެވެ.
އާއްމުކޮށް ލިޔެލާ ޖަހާފައި ހުންނަ ތަކެތީގައި ހުންނަ ހުރިހާ ކުރެހުމެއް ހިމެނޭ އެ މަތިގަނޑުން ވެސް ވަރަށް ހިނގައިފި އެވެ. ގިނަ ބަޔަކު ގަޔާވި މި މަސައްކަތާ ދޭތެރޭގަ އައި ފުޓްސަލް މުބާރާތަށް ތައްޔާރު ކޮށްދިން ޓްރޮފީ އާއި މެޑަލްތަކާ މެދު މުބާރާތް ރާވާ އިންތިޒާމް ކުރި ފަރާތުން ހިތްހަމަޖެހޭ ގޮތަށް ނިމި އާންމުގެ ލޯބި ލިބުމުން "އައިލެންޑް ގުޑްސް" ގެ ވެރިޔާ އާއި ހުނަރުވެރި މުވައްޒަފުން ތިބީ ހިތްހަމަޖެހިފަ އެވެ. ތުޅާދޫ އޮތީ އެކަމާ އުފާވެފަ އެވެ.