އެންމެނާ ވެސް ލައްވާލައިގެން މިއުޅޭ ކޮވިޑާއެކު އައި ލޮކްޑައުން ތެރޭގައާ އޭގެ މަސްތަކެއް ފަހުން ކާފިއުއެއް ވެސް ހިމެނޭ ގޮތަށް ގެނެސްފައިވާ ލުުއި ލޮކްޑައުންގެ ތެރޭގައި ހުއްޓި ގަނޑުވެފައިވާ ކަންކަމާއި ހުއްޓާ ނުލައި ވަރަށް ބާރަށް ހިނގަ ހިނގާ ހުރި ކަންކަން އެބަހުއްޓެވެ. ބާރަށް ހިނގައިގެންފައިވާ ކަންކަމުގެ ތެރޭގައި އެންމެ ގިނައީ ގޭގައި ތާށިވެފައި ތިބި މީހުން މުނިފޫއްސަށާއި އަތްމަތީގެ ދަތިކަން ފިލުވާން އެކި ނަން ނަމުގައި ގެނެސްފައިވާ ފުޑްއެލާޓެވެ. ހަދާފައި ވިއްކާން ދޫކޮށްލާ އެކި ރަހައިގެ ތަފާތު ކާނާގެ ޓްރެންޑެވެ.
މާލެތެރޭގައި އެއީ ވަރަށް ބޮޑު ވާދަވެރި ކަމަކަށް ވެފައި އެބަ އޮތެވެ. އެކަކަށް ވުރެ މޮޅަށް އަނެކަކު އިސްތިހާރު ހަދައިހެން ފޭސްބުކާއި އިންސްޓަގްރާމުގައި އިސްތިހާރުކޮށް ކާއެއްޗެއްހި އެބަ ވިއްކަ އެވެ. ހެދިކާއެއް، ކޭކެއް ނުހަދައި ހަމަ އެކަކު ނެތެވެ. ހަމަ ހިނގަ އެވެ. ހުރިހާ އެންމެންގެ އެއްޗެހި ވެސް ވަރަށް މީރެވެ، ހުސްވެސް ވެއެވެ.
އެކަމަކު މިހާރު އެއަށް ވުރެ ބާރަށް ހިނގައިގަނެގެން އުޅެނީ "ބޮޑު އެއް ކުކުޅު" ގެ ވާދަވެރި ކަމެކެވެ. ކޮންމެ ކެފޭއެއް އަދި އެހެންނާ ރެސްޓޯރެންޓަކުން ވެސް ގޮތެއް ހަދާލައިގެން މިހާރު ނެރެނީ ބޮޑު އެއް ކުކުޅެކެވެ. ތަފާތު ގޮތްގޮތަށް ހަވާދު އުނގުޅާލާފައިވާ އެ ކުކުޅުގެ ވާދަވެރިކަން މިދިއަ ދެތިން ހަފުތާއެއްގެ ތެރޭ މައްޗަށް ގޮސްފައިވާ މިންވަރު ފޭސްބުކް ވޯލްތައް ހަވާލީމަ އާއި އިންސްޓަގްރާމް ބަލައިލުމުން ފެންނާނާން އޮންނާނެ އެވެ. އޯޑަރު ކޮށްލައި އެކަނި ވެލައިގެން އިނދެ ބޮޑު އެއްކުކުޅު ކާލަން ބޭނުމިއްޔާ ކޮންމެސް އިރަކުން އިތުރަށް ހަވާލައި ބަލައިލާށެވެ. ދެން ހަވާދުގަނޑު ބަލާފައި އެންމެ މީރުހެން ހީވާ ތަނަކަށް އަދި އެންމެ ބައިވަރުތައް ގިނަ ތަނަކަށް ގުޅާލާށެވެ.
ބޮޑު އެއް ކުކުޅުގެ ވާދަ ޖަހައިގެން މިހާރު އެންމެން މިއުޅެނީ ކީއްވެގެން ހެއްޔެވެ؟ އެކަން ވެސް ބަލައިލަން ރަނގަޅެއް ނޫން ހެއްޔެވެ؟
ކޮވިޑް ލޮކްޑައުނަށް ފަހު ދެން ވައްޓާލި ލުއި ލޮކްޑައުންތެރޭގައި ރެސްޓޯރެންޓްތަކާއި ކެފޭތަކައި ބިސްޓްރޯ ފަދަ ތަންތަން ހުޅުވާލައި އާ ގައިޑްލައިނާ އެއް ގޮތަށް ހިދުމަތް ދޭޭން ފެށި ނަމަވެސް އެއްވެސް ތަނެއް އެހާ ގަދަ ގަދައަށް ހިނގައިގަންނަ ގޮތެއް ނުވި އެވެ. އެހެން އޮއްވާ "ރޭގަނޑު ހަތަރު ދަމު" ގެ ކާފިއުއެއް 10:00 ޖަހާއިރު ފަށައިފި އެވެ. އެހެންވެ ހުރިހާ ތަނަކުން ވެސް ބެލީ "އެކަތިފަހަރުން ޖަހައިގެން" ވިޔަސް މީހުން ކުޅުދިޔައި ކޮށްލައި އެމީހުންގެ ކެފޭއާ ދިމާއަށް ގެންދާނެ އަދި އެ ތަންތާނގެ ނަމްބަރުތަކަށް ގުޅައގެން މީހުން އޯޑަރުތައް ދޭނެ ޖާދޫއެއް ހަދާށެވެ. ބައެއް މީހުން ފޮނި، ކުޅީގެ ތަފާތު ރަހައިގެ ޖާދޫ ހެދި އެވެ.
މީގެ ތެރެއިން އެންމެ ބާރަށް ހިނގައިގަތީ ކޮންމެވެސް ބާވަތެއްގެ ހަވާދުގަނޑަކުން ހަނާކޮށް ފައްކާ ނަމެއް ދީފައި އޮންނަ ބޮޑު އެއް ކުކުޅެކެވެ. މި ބޮޑު ކުކުޅު ފުރަތަމަ ނެރުުނު ބައެއްގެ މިލްކުވެރިކަން ކެފޭ ތަކުގެ "ބަހުގެ ވާދަ" އަށް ދޫކޮށްލާނީ އެވެ. އެއީ އެއާ ހަވާލު ނުވާ ބަޔަކު ނޫޅޭތީ އެވެ.
މިދިއަ ދެތިން ހަފުތާގެ ތެރޭގައި ފެނުުނީ ކޮންމެ ބަޔަކު ވެސް އެމީހުންގެ މެނޫއަށާއި އިސްތިހާރު ފޮޓޯގަނޑުން ފެންނަ ދޮލަނގަށް ފުރިހަމަ ބޮޑު ކުކުޅެއް ލައިގެން އުޅޭ ތަނެވެ. ބައެއް ތަންތަނުން ކުކުޅުގެ ބޮލާއި އޭގެ ބަނޑުތެރޭގެ ސާމާނު ފިޔަވައި އެހެން ހުރިހާ ބައެއް ހިމެނޭ ގޮތަށް މީރު ކޮށްފައިވާ ހަމައެކަނި ބޮޑު ކުކުޅެކެވެ. އެއީ ވަރަށް މަދު ކެފޭތަކެވެ.
ގިނަ ތަންތަނުން އެ މީހުންގެ ބޮޑު ކުކުޅު ނެރެފައި ވަނީ ގިނަ އެހެން ބައިވަރުތަކެއް "ކޮމްބޯ" ކޮށްފަ އެވެ. ކުޅާއެކު ދެތިން ހަތަރު ފަރާޓާއަކާ މިންޓް ސޯހެއްގެ އިތުރުން ޑާލް ފްރައި އެއް ހިމަނާފައި ހުރެ އެވެ. އަދި ބައެއް ތަންތަނުން ބޮޑު އެ ކުކުޅާއެކު ހައެއްކާ ރޮއްޓާ ތަރުކާރީ ކޮޅެކެވެ. އަދި ބައެއް ތަންތަނުން ދެ ވައްތަރެއްގެ ގްރޭވީއަކާއިއެކު ބޮޑު ކުކުޅާއި އޭގެ ބަނޑުތެރޭގެ ސާމާނެވެ.
މިއިން ކޮންމެ ބަޔަކު ވެސް ބުނަނީ ބޮޑު އެއްކުކުޅުގެ އައިޑިއާ އުފަން ކުރުވީ އެ މީހުން ކަމަށެވެ. މިތަނުން ދޮށީ ކޮން ބައެއްގެ ކުކުޅެއް ކަމަށް ނޭނގެ އެވެ. ފާހަގަ ކުރެވުނު އެއް ކަމަކީ އެ ކުކުޅާއެކު ކިތަންމެ ގިނަ ބައިވަރުތަކެއް ހުއްޓަސް 150ރ. އިން މައްޗަކަށް ނުގެން ދެއެވެ. އާންމު ގޮތެއްގާއި ބޮޑު ކުކުޅުގެ ކޮމްބޯ 100ރ. ގައި ބަހައްޓާފައި ހުރެ އެވެ.
މާލެތެރޭގައި މި ބޮޑު ކުކުޅު ވަރަށް ބާރަށް އެބަ ހިނގަ އެވެ. އެއް ކެފޭއަކުން ބުނީ އެތާނގައި ދެވެރިން ތިބެ އެވެ. އޭގެ އެއް ވެރިޔާ ބުނި ގޮތުގައި ބޮޑު ތަންދޫރީ ކުކުޅެއްގެ އައިޑިއާ ގެނައީ ލޮކްޑައުނަށް ފަހު ހަމަ ތަން ހިނގައި ނުގަނެގެ ދުން އަޅާފައި އޮތުމުން މީހުންގެ ސަމާލުކަން އަނބުރާލުމަށެވެ.
"އަޅުގަނޑުމެން ހެދި ގޮތަކީ ވޭރިއޭޝަނެއް ކަޮމްބޯ ކޮށްފައިވާ އޭގެ ތެރެއަށް ބޮޑު އެއް ކުކުޅުލީ، ދެން އަގު ތިރިއަށް ވައްޓާލީ... ފަސް ފަރާޓާ އާއި މުގު ރިހައަކާއެކު ސޯސްކޮޅެއް ވެސް ހިމަނަފައި ކުޑަ ބިރިއާނީ ބަތްކޮޅަޅާއެކު މެދަށް ކުކުޅު ވައްތާލައި އަގު 100ރ. ކަމަށް ޖެހުމާއެކު ހިނގައިގެންފި. މީހުން ވެސް ވަންނަން ފަށާއިފި. އަޅުގަނޑުމެން އެކަން ކުރީ ހިނގައި ނުގަނެގެން ސަމާލުކަން އަނބުރާލުމަށް. އޭގެ ފަހަތުން އެހެން މީހުން ވެސް އެގޮތަށް ހަދައިފި. މި ކުކުޅު ވަރަށް ހިނގާހެން ހީވަނީ މިހާރު ހުރިހާ ތަނެއްގައި ވެސް، އަޅުގަނޑަށް ހީވަނީ އަޅުގަނޑުގެ ތަނުންހެން މިކަން ހިންގާލީ،" އޭނާ ބުންޏެވެެ.
އެހެން ރެސްޓޯރަންޓަކުން "ދައުވާ" ކުރާ ގޮތުން ބޮޑު އެއްކުކުޅުގައި ހަވާދު ލީ އެ މީހުނެވެ. އަދި އެތަން ބަލަން ތިބެފައި އެހެން މީހުން އެ ސްޓައިލްގެ ކޮޕީއެއް ކުރީ އެވެ.
"އެ ޔަގީން ކަމެއް އަޅުގަނޑުމެން މިކަން ފުރަތަމަ ކުރީ! އަދި އިސްތިހާރު ކުރަން ފެށުމާއެކު އެހެން މީހުން ވެސް އެކަން ކޮށްފި. އެއީ އެއްވެސް މައްސަލައެއް ނޫން، މި ގޮތަށް ބަދަލުކޮށްލީމާ މީހުން ވަރަށް ގަންނޭ، ވަރަށް ގިނައިން ކައި!" އޭނާ ބުންޏެވެ.
ކެފޭއެއްގައި ސުޕަވައިޒަރަކަށް މަސައްކަތް ކުރާ ޒުވާން ކުއްޖަކު ބުނި ގޮތުގައި އަގު ވައްޓާލާފައި ބޮޑު އެއްކުޅު ބޭއްވުމުން އެ އިސްތިހާރު ބަލާ ބަޔަކު އަދި ކެފޭއަށް ދާ ބަޔަކު ވަރަށް އަވަހަށް ގަޔާވެ ކުޅު ދިޔައި ވެއެވެ. އެ މީހުނަކަށް އޯޑަރު ނުދީއެއް ނުތިބެވެ އެވެ އޭނާ ބުނާ ގޮތުން ފުރިހަމަ އެއް ކުކުޅު ނަގައި ދެ މީހަކު އެކުވެލައިގެން ނޫނީ އެކަނި ވިޔަސް ކާލަން ވަރަށް ބޭނުންވެ އެވެ: "އެހެންވެ ކަންކަން ނޭނގޭ އެހާ ހިނގަނީ. އަދި އެހެންވެގެން ދޯ މިހާރު އެންމެން ވެގެން ބޮޑު ކުކުޅު ހަދަނީ ވެސް،"
ހަވާދުލީ ބޮޑު އެއް ކުކުޅު ކެވޭތޯ ބަލަމާ ހިނގާށެވެ. އެކަމަކު ބައިހަދާފައި ކާލަން އުޅުނިއްޔާ މި ދުވަސްވަރު ގޯހެއް ހިނގާފާނެ އެވެ، ރަނގަޅު ވާނީ އެކަކަށް ވެސް ނާނގައި އެކަނި އިނދެ "ފިލުވައިލިއްޔާ" އެވެ. އެކަމަކު އެހެން ކެވޭނެ ހެއްޔެވެ؟