ކޮވިޑް-19 އިން ރައްކާތެރިވުމުގެ ގޮތުން ޖަހަމުންދާ ފައިޒާ-ބަޔޯންޓެކް ވެކްސިނަށް އުމުރުން 60 އަހަރުން މަތީގެ މީހުންނަށްވެސް ރަޖިސްޓްރީވެވޭނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
އެޗްޕީއޭއިން މިރޭ ބުނީ މާލެ ސަރަހައްދުގައި ފައިޒާ ވެކްސިން ދިނުން މި މަހުގެ 11 ގައި ފަށާފައިވާއިރު 16 އަހަރުން މަތީގެ މީހުންގެ ތެރެއިން ދިގު މުއްދަތަކަށް ދާއިމީ ބައްޔަށް ބޭސް ކުރާ މީހުންނާއި 60 އަހަރުން މަތީގެ މީހުންނަށް ވެކްސިން ދިނުމަށް ނިންމާފައިވާ ކަމަށެވެ.
ރާއްޖެއަށް ލިބިފައިވަނީ 5,850 ޑޯޒެވެ. މިއީ ކޮވެކްސް ފެސިލިޓީ މެދުވެރިކޮށް ލިބިފައިވާ ވެކްސިނެވެ. ފައިޒާގެ އިތުރު ވެކްސިން ނުގެންނަން ސަރުކާރުން ވަނީ ނިންމާފައެވެ.
އެޗްޕީއޭއިން ބުނީ ފައިޒާ ވެކްސިންގެ ލިބިފައިވަނީ މަދު ސްޓޮކެއް ކަމަށް ވާތީ ވެކްސިން ދޭނީ ރަޖިސްޓްރީ ކޮށްފައިވާ މީހުންނަށް އެޕޮއިންޓްމެންޓް ދީގެން، ރަޖިސްޓްރީ ކޮށްފައިވާ ތަރުތީބުން ކަމަށެވެ.