އެމެރިކާގެ ރައީސް ޖޯ ބައިޑަންގެ ދައުރު މި މަހު 20 ގައި ހަމަވުމުގެ ކުރިން އިޒުރޭލަށް އަށް ބިލިއަން ޑޮލަރުގެ ހަތިޔާރު ވިއްކަން ވަނީ ނިންމާފަ އެވެ. މި ޕެކޭޖްގައި ހަތިޔާރާއި ވަޒަނާއި ފައިޓަރު ޖެޓުތައް އަދި އެކި ބަރުދަނުގެ ބޮން ހިމެނެ އެވެ.
އެމެރިކާގެ ސްޓޭޓް ޑިޕާޓްމަންޓުން މިހާރު ވަނީ މި ކަރުދާހަށް ބަހުސްކުރަން ކޮންގްރެސްއަށް ނުރަސްމީކޮށް އަންގާފަ އެވެ. މިކަމާ ގުޅިގެން އެމެރިކާގެ ސެނެޓަރު ބާނީ ސެންޑާސް އެކްސްގައި މެސެޖްކުރައްވައި ވަނީ އިޒުރޭލަށް ހަތިޔާރު ވިއްކަން ބައިޑަން ސަރުކާރުން ކުރާ މަސައްކަތްތަކަށް ހުރަސްއަޅުއްވައި ހުއްޓުވާނެ ކަމަށް ވިދާޅުވެފަ އެވެ.
ބާނީ ސެންޑާޒް ދެކެވަޑައިގަންނަވާ ގޮތުގައި، އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ހުންނެވީ ހައްދުފަހަނައަޅާފަ އެވެ. ނަތަންޔާހޫ އަކީ އެއްވެސް އިރެއްގައި ހަމަބުއްދީގައި ހުންވާ ބޭފުޅެއް ނޫން ކަމަށް ސެނެޓަރު ވިދާޅުވި އެެވެ.
އިޒުރޭލުގެ ހަމަލާތަކުގައި ޣައްޒާއިން 45،650 އަށް ވުރެ ގިނަ މީހުން މަރާފައިވާ ކަމަށް ބާނީ ސެންޑާސް ވިދާޅުވި އެވެ. އާންމުގެ ގެދޮރާއި ސިއްހީ ފަރުވާދޭ މަރަކަޒުތައް އަދި ތައުލީމީ ނިޒާމު މުޅިން ސުންނާފަތިކޮށްފި ކަމަށް އޭނާ ވިދާޅުވި އެވެ.
ބައިޑަން ސަރުކާރުން ގަބޫލުކުރަނީ އިޒުރޭލު އޮތީ އެހީއަށް ބޭނުންޖެހިފައި ކަމަށެވެ. މެދުއިރުމައްޗަށް މުގޫލާފައި ތިބި ހަނގުރާމަވެރިންގެ ޖަމާއަތްތަކުން އިޒުރޭލަށް ދީފާނެ ހަމަލާއަކުން ޔަހޫދީން ރައްކާތެރި ކުރުމަކީ އެމެރިކާއަށް ވާޖިބެއް ކަމަށް ބައިޑަން ވިދާޅުވާ ވިދާޅުވުން އަބަދުވެސް ތަކުރާރުކުރައްވަ އެވެ.
ބާނީ ސެންޑާސް ވިދާޅުވީ އެ ބިލަށް ހުރަސްއެޅުމަށް އޭނާއަށް ކުރެވުނު ހުރިހާ ކަމެއް ކުރައްވާނެ ކަމަށެވެ. ގާނޫންހަދާ މަޖިލީހުގައި މި ބިލަށް ދެކޮޅުހަދާނެ މެމްބަރުން ތިއްބެވި ކަމަށް ސެނެޓަރު ވިދާޅުވި އެވެ. އޭނާ އަދި ވިދާޅުވީ އެ ހުރިހާ އެންމެންގެ އެހީތެރިކަން ހޯއްދަވާނެ ކަމަށެވެ.
އިޒުރޭލަށް ވިއްކާ ހަތިޔާގެ ބޭނުންހިފަނީ އަމިއްލަ ދިފާއުގައި ނޫންކަން ޣައްޒާއިން ފެނިވަޑައިގަންނަވާ ކަމަށް ސެނެޓަރު ވިދާޅުވި އެވެ.
ފަލަސްތީންގައި އާރެއް ބާރެއް ނެތް ބައެއްގެ ބޮލަށް ބޮންއެޅުމަކީ އަމިއްލަ ދިފާއުގައި ކުރާ ކަމެއް ނޫން ކަމަށްވެސް އޭނާ ވިދާޅުވި އެވެ. އެއީ ނަސްލެއް ނައްތާލުމަށް ހިންގާ ޖަރީމާއެއް ކަމަށް ގަބޫލުކުރައްވާ ކަމަށް ބާނީ ވިދާޅުވި އެވެ.