ހުޅުމާލޭގައި ފަހި ދިރިއުޅުން ކޯޕަރޭޝަން (އެފްޑީސީ) އިން ހަދަމުންދާ 4،000 ހައުސިން ޔުނިޓް ހިމެނޭ ޓަވަރުތަކުގެ ތެރެއިން ހަތަރު ޓަވަރެއް ދިރިއުޅުމަށް ބޭނުންވާ ހުރިހާ ވަސީލަތްތަކާ އެކު މިއަހަރުގެ މާޗް މަހުގެ ތެރޭގައި ނިންމާލެވޭނެ ކަމަށް އެފްޑީސީ އިން ބުނެފި އެވެ.
އެފްޑީސީ އިން އެންމެ ފުރަތަމަ ހުރިހާ މަސައްކަތްތަކެއް ނިންމުމަށް ހަމަޖެހިފައިވާ ހަތަރު ޓަވަރަކީ "އަމާން އުދަރެސް"ގެ ނަން ދީފައިވާ ޓަވަރުތަކުގެ ތެރެއިން 11، 12، 13 އަދި 14 ވަނަ ޓަވަރެވެ.
އެފްޑީސީގެ އޮފިޝަލަކު މިއަދު އަވަސްއަށް ވިދާޅުވީ ހަތަރު ޓަވަރުގެ މަސައްކަތް ކުރިއަށް އޮތް ފެބްރުއަރީ މަހުގެ ދެވަނަ ހަފްތާގެ ތެރޭގައި ނިންމާލެވޭނެ ކަމަށެވެ. އަދި އެފްޑީސީ އިން ތަރައްގީކުރާ ޖުމްލަ 32 ޓަވަރު މިއަހަރުގެ ޖޫން މަހުގެ ތެރޭގައި އެއްކޮށް ނިންމާލެވޭނެ ކަމަށްވެސް ވިދާޅުވި އެވެ.
އެފްޑީސީ ފްލެޓްތަކުގެ ހުލާސާއެއް
ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުގެ ގެދޮރުވެރިޔާ ސިޔާސަތުގެ ދަށުން އެފްޑީސީއާ ހަވާލުކޮށްގެން ހުޅުމާލޭގައި ހަދަމުންދާ 4،000 އެޕާޓްމަންޓްގެ ތެރޭގައި ހިމެނެނީ ދެ ކޮޓަރީގެ އެޕާޓްމަންޓްތަކުގެ ގޮތުގައި 650 އަކަފޫޓުގެ 1،200 އެޕާޓްމަންޓާއި ތިން ކޮޓަރީގެ އެޕާޓްމަންޓްތަކުގެ ގޮތުގައި 900 އަކަފޫޓްގެ 2،800 އެޕާޓްމަންޓެވެ.
އެފްޑީސީ އިން މި މަސައްކަތް ކުރިއަށް ގެންދަނީ ދެ މަޝްރޫއެއްގެ ގޮތުގައި އިންޑިއާގެ ދެ ކުންފުންޏަކާ ހަވާލުކޮށްގެންނެވެ. މި މަޝްރޫއުގެ ދަށުން އިންޑިއާގެ ދެ ކުންފުނި ކަމަށްވާ ނެޝަނަލް ބިލްޑިންގްސް ކޮންސްޓްރަކްޝަން ކޯޕަރޭޝަން (އެންބީސީސީ) އިން 2،000 ފްލެޓް އަދި ކަލްޕަތާރޫ ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އިން 2،000 ފްލެޓް ހަދާނެ އެވެ. ކޭޕީއައިއެލްގެ ފްލެޓްތަކަށް ކިޔަނީ "އަމާން އުދަރެސް" އެވެ. އެންބީސީސީގެ ފްލެޓްތަކަށް ކިޔަނީ "އަމާން ދޯދި" އެވެ.
ކޮންމެ މަޝްރޫއެއްގައި 16 ޓަވަރު -- ޖުމްލަ 32 ޓަވަރު އިމާރާތްކުރާނެ އެވެ. އަދި ދެ ކޮޓަރީގެ ޔުނިޓްތަކަށް ހާއްސަކުރެވިފައިވާ ޓަވަރުތަކާއި، ތިން ކޮޓަރީގެ ޔުނިޓްތަކަށް ހާއްސަކުރެވިފައިވާ ޓަވަރުތައް މިމަޝްރޫއުގައި ހިމެނެ އެވެ. މިއިން ކޮންމެ މަޝްރޫއުއެއްގައި 900 އަކަފޫޓުގެ ތިން ކޮޓަރީގެ 1400 ޔުނިޓް އަދި 650 އަކަފޫޓުގެ ދެ ކޮޓަރީގެ 600 ޔުނިޓް ހިމެނެ އެވެ.
އެފްޑީސީ ފްލެޓްތަކަށް ދިމާވެގެން އުޅޭ މައްސަލައަކީ ކޮބާ؟
ރައީސް ސޯލިހްގެ ވެރިކަން ނިމުނުއިރު އެފްޑީސީގެ ފްލެޓްތަކުގެ މަސައްކަތް ނިންމާލެވިފައި ނުވި ނަމަވެސް ފްލެޓް ލިބޭ މީހުންގެ ލިސްޓް އެކުލަވާލައި އާންމުކުރި އެވެ. ނަމަވެސް އެތައް ބައެއްގެ ކަންބޮޑުވުމާއި ޝަކުވާތަކާ ގުޅިގެން އޭސީސީ އިން ވަނީ ލިސްޓުގައި މައްސަލައެއް އުޅޭތޯ ބެލުމަށް ތަހުގީގެއް ހިންގާފަ އެވެ. ތަހުގީގަށްފަހު އޭސީސީ އިން އެކުލަވާލި ރިޕޯޓްގައި ބުނެފައިވަނީ 4000 ފްލެޓް ލިބޭ މީހުން ކަނޑައެޅިއިރު 59.6 ޕަސަންޓް މީހުންގެ ޝަރުތު ހަމައެއް ނުވާ ކަމަށެވެ. އަދި އެއްވެސް މައްސަލައެއް ނެތްކަމަށް އޭސީސީ އިން ނިންމީ 20.7 ޕަސަންޓް މީހުންނެވެ.
އޭސީސީގެ ތަހުގީގު ރިޕޯޓާ ގުޅިގެން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު ފްލެޓް ލިސްޓް މިހާރު ގެންދަނީ މުރާޖައާ ކުރަމުންނެވެ. ނަމަވެސް އެ މަސައްކަތް ނިންމާ ފްލެޓްތައް ހަވާލުކުރެވޭނެ ސީދާ ތާރީހެއް ރައީސް މުއިއްޒުގެ ސަރުކާރަށް އަދި ދެވިފައެއް ނުވެ އެވެ. ފްލެޓް ހަވާލުކުރުން ލަސްވާތީ އާންމުންގެ ފާޑުކިޔުންވެސް ސަރުކާރަށް ވަރަށް ބޮޑަށް އަމާޒުވެ އެވެ.