ރައީސް އިބްރާހީމް މުހައްމަދު ސޯލިހްގެ ސަރުކާރުން މާލޭގެ ރައްޔިތުންނަށް ގޯދި ދޫކުރުމަށް ކުރިއަށް ގެންދިޔަ ބިންވެރިޔާ ސްކީމްގެ ތެރެއިން ހުޅުމާލޭގެ ދެވަނަ ފިޔަވަހިން ދޫކުރަން ނިންމި ހުރިހާ ގޯއްޗެއް މިއަދު ހަވާލުކޮށް ނިންމައިފި އެވެ.
ހުޅުމާލޭގެ ދެވަނަ ފިޔަވަހިން ދޫކުރާ ގޯތިތައް މިމަސް ނިމުމުގެ ކުރިން ހަވާލުކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
ހައުސިން މިނިސްޓްރީން ސޯޝަލްމީޑިއާގައި މިއަދު ކޮށްފައިވާ ޕޯސްޓެއްގައި ބުނެފައިވަނީ ނިމިދިޔަ ސަރުކާރުން މާލޭގެ ރައްޔިތުންނަށް ހުޅުމާލެ އިން ދޫކުރާ ހުރިހާ ގޯތި ދޫކޮށް ނިންމާފައިވާ ކަމަށެވެ.
ރައީސް ސޯލިހްގެ ސަރުކާރުން ނިންމާފައި އޮތީ ހުޅުމާލޭގެ ދެވަނަ ފިޔަވަހިން 1،408 ގޯތި އަދި ހުޅުމާލޭގެ ތިންވަނަ ފިޔަވަހިން 699 ގޯތި ދޫކުރުމަށެވެ. ހުޅުމާލޭގެ ތިންވަނަ ފިޔަވަހީގެ ބިން ހިއްކަން ފެށީވެސް ރައީސް ސޯލިހްގެ ސަރުކާރުންނެވެ.
ބިންވެރިޔާ ސްކީމުގެ ދަށުން ރައީސް ސޯލިހް ނިންމަވާފައި އޮތީ ހުޅުމާލެ، ގުޅީފަޅު އަދި ގިރާވަރުފަޅުން 9،000 އެއްހާ ގޯތި ދޫކުރުމަށެވެ.
ހުޅުމާލޭގެ ތިންވަނަ ފިޔަވަހިންނާއި، ގުޅީފަޅާއި އަދި ގިރާވަރު ފަޅުން ދޫކުރަން ނިންމާފައިވާ ގޯތިތައް އަދި ހަވާލެއް ނުކުރެ އެވެ. އެ ތަންތަނުގެ ބިން ހިއްކުމުގެ މަސައްކަތްވެސް އަދި މުޅިން ނިންމާލާފައެއް ނުވެ އެވެ.