މިއަހަރު އެންމެ ގިނައިން ބެލީ ނާޖާއިޒް ފައިދާ ހޯދައިދިނުމުގެ މައްސަލަތައް ކަމަށް އެންޓި ކޮރަޕްޝަން ކޮމިޝަން (އޭސީސީ)ން ބުނެފި އެވެ.
އެ ކޮމިޝަނުން މިއަދު ނެރުނު ތަފާސް ހިސާބުތައް ބުނާ ގޮތުން މިއަހަރުގެ މިހާތަނަށް އެ ކޮމިޝަނަށް އެންމެ ގިނައިން ހުށަހެޅީ ނާޖާއިޒް ފައިދާ ހޯދައިދިނުމުގެ މައްސަލަތަކެވެ. އެގޮތުން ހުށަހެޅުނު މައްސަލަތަކުގެ ތެރެއިން ޖޫން މަހުގެ ނިޔަލަށް 264 މައްސަލައެއް ބަލައި ނިންމި ކަމަށް އޭސީސީ އިން ބުންޏެވެ.
މިހާތަނަށް ހުށަހެޅި މައްސަލަތަކުގެ ޖުމްލަ އަދަދު އެ ކޮމިޝަނުން ހާމައެއް ނުކުރެ އެވެ.
އޭސީސީން ބުނީ ދެވަނަޔަށް އެންމެ ގިނައިން އެ ކޮމިޝަނަށް ހުށަހަޅާފައިވަނީ ގަވާއިދާ ހިލާފުވުމުގެ މައްސަލަތައް ކަމަށެވެ. އެގޮތުން ހުށަހެޅި މައްސަލަތަކުގެ ތެރެއިން ފުރަތަމަ ހަ މަސް ދުވަހު ގަވާއިދާ ހިލާފުވުމުގެ 172 މައްސަލައެއް އެ ކޮމިޝަނުން ބަލައި ނިންމި ކަމަށެވެ.
ނާޖާއިޒު ފައިދާ ހޯދުމުގެ 104 މައްސަލައެއް ވެސް މިއަހަރުގެ އޭސީސީން ނިންމި ކަމަށް އެ އިދާރާއިން ވަނީ ބުނެފަ އެވެ. އަދި ދައުލަތަށް ފައިދާވާން އޮތްކަމެއްގައި އެނޫންގޮތަކަށް އަމަލުކުރުމުގެ 40 މައްސަލައަކާއި، ދައުލަތުގެ މުދަލާއި ފައިސާއަށް އިހުމާލު ވުމުގެ 35 މައްސަލައަކާއި ރިޝްވަތުގެ 7 މައްސަލައަކާއި އަދި ދޮގު މައުލޫމާތު ދިނުމާއި ހެކި ފޮރުވުމުގެ ޖުމްލަ 13 މައްސަލައެއް ވެސް މިއަހަރުގެ ފުރަތަމަ ހަމަސް ދުވަހުގެ ތެރޭގައި ބަލައި ނިންމި ކަމަށް ވެސް އޭސީސީން ހާމަކޮށްފައިވެ އެވެ.
