ރަޝިއާއިން ޔުކްރޭނަށް ހަމަލާދީފާނެ ކަމަށް ބެލެވެން ފެށި ހިސާބުން -- ހަނގުރާމައިގެ އެތައް ދުވަހެއް ކުރިން، ވޮޝިންގްޓަނުން ޔުކްރޭނަށް ހަތިޔާރު ފޮނުވަން ފެށި ކަމަށް އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން ވިދާލުވެއްޖެ އެވެ.
ބްލިންކެން ވިދާޅުވި ގޮތުން ފެބްރުއަރީ 2022 ގައި ހަނގުރާމަ ފެށިއިރު، ޔުކްރޭންގައި އެ ވަރަށް ހަތިޔާރު ނެތް ނަމަ ޔުކްރޭންގެ އަސްކަރިއްޔާ ބޮޑު ތަނުން ފޭލިވީހެވެ.
ވޮޝިންގްޓަން ޕޯސްޓަށް ދެއްވި އިންޓަވިއުއެއްގައި ބްލިންކެން ވިދާޅުވީ ރަޝިއާއިން ޔުކްރޭނަށް ހަމަލާދޭނެކަން ޔަގީންވިއިރު، ޔުކްރޭން އަތުގައި ހަނގުރާމަ ދަމަހައްޓާނެ ހަތިޔާރު ހުންނާނެ ކަމަށެވެ.
އެމެރިކާގެ އެދުމަކަށްވީ، ބްލިންކެން ވިދާޅުވި ގޮތުން ޔުކްރޭންގެ އަސްކަރިއްޔާ ގާބިލުކުރުމެވެ. އަދި އަމިއްލައަށް ދިފާއުވެވޭ ވަރު ކޮށްދިނުމަކީ ވޮޝިންގްޓަނުން ވިސްނާފައި އޮތް ގޮތް ކަމަށް އޭނާ ވިދާޅުވި އެވެ.
އެންތަނީ ބްލިންކެން ވިދާޅުވި ގޮތުގައި ސެޕްޓެމްބަރު 2021 އިން ފެށިގެން ޔުކްރޭނަށް ހަތިޔާރު ފޮނުވުމަށް ވޮޝިންގްޓަނުންން ނިންމައި އަމަލީ މަސައްކަތްތައް ފެށި އެވެ. އަދި ޖެހިގެން އައި ޑިސެމްބަރުގައި ވެސް އިތުރު ޝިޕްމަންޓްތައް ފޮނުވި ކަމަށް އޭނާ ވިދާޅުވި އެވެ.
ހަނގުރާމަ ފަށައި ރަޝިއާ ދެމިގަތް ބާރުމިނުގައި ކުރިއަރައިގެން ނުދެވުނި ޔުކްރޭންގައި ހަތިޔާރު ހުރުމުން ކަމަށްވެސް ބްލިންކެން ވިދާޅުވި އެވެ. ޔުކްރޭންގެ އަސްކަރިއްޔާގައި ތަޖުރިބާ ހުރި ނަމަ، ޔުކްރޭނަށް މިހާރު ކޮށްފައި އެ އޮތްވަރު ނުކުރެވޭނެ ކަމަށްވެސް ސެކްރެޓަރީ އޮފް ސްޓޭޓް ވިދާޅުވި އެވެ.
ރަޝިއާގެ ވިސްނުމަކަށް ވެފައި އޮތީ، ބްލިންކެން ވިދާޅުވި ގޮތުން، ވެރިރަށް ކީވް ހިފައި އަދި ދުނިޔޭގެ ޗާޓުން ޔުކްރޭން ފޮހެލުން ކަމަށެވެ.
އެމެރިކާ އާއި ބައިވެރިންގެ ރޭވުންތަކުގެ ސަބަބުން މަޑުޖައްސާލަން ރަޝިއާއަށް މަޖުބޫރުވީ ކަމަށްވެސް އޭނާ ވިދާޅުވި އެވެ.
އެންތަނީ ބްލިންކެން އަކީ އެމެރިކާގެ މިހާރުގެ ސެކްރެޓަރީ އޮފް ސްޓޭޓް ނަމަވެސް، މި ޖެނުއަރީ 20 ގައި، އިންތިޚާބީ ރައީސް، ޑޮނަލްޑް ޓްރަމްޕް ރައީސްކަމާ ހަވާލުވެވަޑައިގަންނަވާ ހިސާބުން، އޭނާއަށް މަގާމު ގެއްލޭނެ އެވެ.
ޓްރަމްޕް ސަރުކާރުގައި އެމެރިކާގެ ސެކްރެޓަރީ އޮފް ސްޓޭޓްގެ މަގާމު އަދާކުރައްވާނީ ރިޕަބްލިކަން ޕާޓީގެ މާކޯ ރޫބިއޯ އެވެ.