ދޮރުގައި ތާލިބާނުން ޓަކި ޖަހައިފި ނަމަ ދޮރު ހުޅުވައި ލައްވާނެ ކަމަށް ތުރުކީގެ ރައީސް ރަޖަބް ތައްޔިބު އުރުދުޣާން ވިދާޅުވެއްޖެ އެވެ.
އުރުދުޣާން ވިދާޅުވީ ތާލިބާނުންނާ މަޝްވަރާ ކުރައްވަން ތައްޔާރު ކަމަށާއި އެކަމުގައި އޮތީ ތާލިބާނުން ކުރި އަވަހެއް ކަމަށެވެ. ނޫސްވެރިންނަށް ހުކުރު ދުވަހު މައުލޫމާތު ދެއްވަމުން އުރުދުޣާން ވިދާޅުވީ ތުރުކީ ކޮޅުން ފުރުސަތު ނަގައިނުލައްވާނެ ކަމަށާއި ތާލިބާނުނާ ގުޅިގެން ތަރައްގީއަށް މަސައްކަތް ކުރައްވާނެ ކަމަށެވެ.
އުރުދުޣާން ވިދާޅުވި ގޮތުން އަފްޣާނިސްތާނަކީ އަޅާނުލެވި ދޫކޮށްލެފައި އޮތް ގައުމެކެވެ. އެމެރިކާއާ ހުޅަނގުން ވެސް އަފްޣާނަށް މާބޮޑު ކަމެއް ކޮށްދީފައި ނެތް ކަމަށް އޭނާ ވިދާޅުވި އެވެ. އަރަބި އިސްލާމީ ގައުމުތަކުން އަފްޣާނަށް މިހާރު އަޅާލާ މިންވަރު އިތުރު ކުރަން ޖެހިފައި އޮތް ކަމަށް ވެސް ވިދާޅުވި އެވެ.
ނޫސްވެރިންގެ ސުވާލުތަކަށް ޖަވާބުަ ދެއްވަމުން އުރުދުޣާން ވިދާޅުވީ އަފްޣާނަށް އެންމެ ގިނައިން އިންވެސްޓްމަންޓް ފުރުސަތު ފަހިކޮށްދޭ ގައުމަކަށް ތުރުކީ ވާނެ ކަމަށާއި އެކަމަށް ނިމުމެއް ނެތް ކަމަށެެވެ.
އަފްޣާންގެ ތަރައްގީއަށް ތާލިބާނުން ވިސްނާފައި އޮތް ގޮތް އެނގެން ބޭނުންވެ ލައްވާ ކަމަށް ވިދާޅުވަމުން އުރުދުޣާން ވިދާޅުވީ ތަރައްގިއާ ގުޅުން ހުރި ހުރިހާ ދިމާއަކުން ވެސް މަޝްވަރާ ކުރަންވީ ކަމަށެވެ.
"އަފްޣާންގައި ތިބީ މުސްލިމުން. އަޅުގަނޑުމެން އެ މީހުން ދޫކޮށެއް ނުލާނަން،" އުރުދުޣާން ވިދާޅުވި އެވެ. އުރުދުޣާން ވިދާޅުވީ ތުރުކީ ވިޔަފާރިތައް އަފްޣާންގައި އެބަހުރި ކަމަށާއި އެއިން އެއްވެސް ފުރުސަތެއް ގެންގެން ދިއުމަށް ފުރުސަތު ނުދެއްވާނެ ކަމަށެވެ.
ތާލިބާނުން އަފްޣާން ހިފައި ވެރިރަށް ކާބުލް ވަށާލުމުން ބިރުން ފިލަން ތުރުކީއަށް ވަދެ ތިބި މީހުންނަށް އެހީތެރިކަން ފޯރު ކޮށްދެއްވާނެ ކަމަށް ވެސް އުރުދުޣާން ވިދާޅުވި އެވެ. އޭނާ ވިދާޅުވި ގޮތުން މިހާރު ވެސް 300،000 އަފްޣާން ރެފިއުޖީން ތުރުކީގައި އެބަ ތިއްބެވެ. އޭގެ ތެރޭގައި ކާކުކަން އަންގައިދޭ ސައްހަ ލިޔުމެއް ނެތް މީހުން ވެސް ހިމެނޭ ކަމަށްް ވިދާޅުވި އެވެ.
ތުރުކީއާ ސީރިއާ އަދި އަފްޣާން ހިއްސާކުރާ ބޯޑަރުގައި ފާރު ރާނައި ބަންދު ކުރަނީ ކީއްވެތޯ އެހުމުން އުރުދުޣާން ވިދާޅުވީ ސައްހަ ލިޔުމެއް އޮތް ނަަމަ އެމީހަކަށް ތުރުކީން ފުރުސަތު ދޭނެ ކަމަށާއި ތުރުކީއަށް އެތެރެވާ މީހުން ކޮންޓްރޯލް ކުރުމަކީ ވަރަށް މުހިންމު ކަމެއް ކަމަށެވެ.