ބާސެލޯނާގެ ޑިފެންޑަރު ސަމިއުލް އުމްޓިޓީ ވިއްކާލަން އެ ކްލަބުން މަސައްކަތް ކުރި ނަމަވެސް އޭނާ ކްލަބު ދޫކޮށްލަން ދެކޮޅު ހަދައިފި އެވެ.
ހަރަދުތައް ކުޑަ ކުރުމަށްޓަކައި ބާސާއިން އަންނަނީ ގިނަ ކުޅުންތެރިންތަކެއް ވިއްކާލުމަށް މަސައްކަތް ކުރަމުންނެވެ. އޭގެ ތެރެއިން އެއް ކުޅުންތެރިއަކީ ފްރާންސްގެ ޑިފެންޑަރު އުމްޓިޓީ އެވެ. ބާސާއިން އުމްޓިޓީ ވިއްކާލަން ނިންމީ އޭނާގެ މުސާރަ ބޮޑު ވުމާއި ގިނަ އަނިޔާ ތަކެއްގެ ސަބަބުން ކުޅުމާއި ދުރުގައި ގިނަ ދުވަހު ހުންނަން ޖެހޭތީ އެވެ.
ބާސާއިން ވަނީ އުމްޓިޓީ އެތައް ކުލަބަކަށް ފޮނުވާލަން މަސައްކަތްކޮށް ގިނަ ހުށަހެޅުންތަކެއް ހުށަހަޅާފަ އެވެ. އެކަމަކު އުމްޓިޓީ ނިންމާފައި ވަނީ މި ފެށުނު 2020/21 ސީޒަން ނިމެންދެން ބާސެލޯނާގައި މަޑު ކުރުމަށެވެ. މިކަމާއި ގުޅިގެން ޓީމުގެ ކޯޗު ކޫމަން ބުނީ އޭނާ ޓީމުގައި މަޑު ކުރިއަސް ޓީމުން ޖާގަ ލިބުމަކީ ވަރަށް ނާދިރު ކަމެއް ކަމަށެވެ.
އުމްޓިޓީ ބުނީ ކޫމަންގެ ޕްލޭންގައި އޭނާ ނެތް ނަމަވެސް އޭނާ ގަބޫލު ކުރާ ގޮތުގައި އޭނާގެ ފަރާތުން ބާސާއަށް ގިނަ ފައިދާތަކެއް ކޮށްދެވެން އެބަހުރި ކަމަށެވެ.
ޕްރީ ސީޒަން މެޗު ތަކުގައި އުމްޓިޓީ ވަނީ އޭނާގެ ކަކޫ ވަރުގަދަ ކުރުމަށް ޖިމްގައި ވަރަށް ބުރަކޮށް މަސައްކަތް ކޮށްފަ އެވެ. އޭގެ ނަތީޖާ ވެސް ފެނިފައި ވަނީ ފޮނިކޮށެވެ. އާންމު ގޮތެއްގައި ކަކުލަށް އަނިޔާވުން ގިނަ އުމްޓިޓީގެ ކަކޫ މިހާރު ވަނީ ވަރަށް ބޮޑަށް ވަރުގަދަކޮށް ފިޓްނެސް ލެވެލް ރަނގަޅު ކޮށްފަ އެވެ.
އެހެންކަމުން އުމްޓިޓީ ގަބޫލު ކުރާ ގޮތުގައި ޖެރާޑް ޕީކޭ، އެރިކް ގާސިއާ، ރޮނާލްޑް އަރައުހޯ އަދި ކްލެމެންޓް ލެންގްލޭ ހުރި ނަމަވެސް އޭނާއަށް ޓީމުގެ ފުރަތަމަ 11 އިން ޖާގަ ހައްގެވެ.
އަހަރެއްގެ މައްޗަށް އުމްޓިޓީގެ މުސާރައިގެ ގޮތުގައި ބާސާއިން އަށް މިލިއަނާއި ނުވަ މިލިއަން ޔޫރޯގެ އަދަދެއް ހަރަދު ކުރަން ޖެހެ އެވެ. އެހެން ކަމުން ބާސާއިން ވަނީ އޭނާގެ ކޮންޓްރެކްޓް އުވާލުމަށް ވެސް މަސައްކަތް ކޮށްފަ އެވެ. ނަމަވެސް ގާނޫނީ ގޮތުން އެމީހުންނަށް އެކަމުގައި ގިނަ ހުރަސްތަކެއް ވަނީ ކުރިމަތިވެފަ އެވެ. އުމްޓިޓީ އާއެކު ބާސާއިން ހަދާފައިވާ ކޮންޓްރެކްޓް ހަމަވަން އަދި ދެއަހަރު އެބައޮތެވެ.