ޔޫރަޕްގެ ކްލަބް ފުޓްބޯޅައިގެ ގަދަބާރެއްގެ ގޮތުގައި ފާހަގަކުރެވޭ ކްލަބް ބާސެލޯނާގެ ކޯޗުކަމުން އެ ކުލަބުގެ ކުރީގެ ތަރި ޒަވީ ވަނީ ވަކިކޮށްފަ އެވެ.
ޒަވީ މަގާމުން ވަކިކޮށްފައި މިވަނީ މި ސީޒަނަށްފަހު ބާސެލޯނާގެ ކޯޗުގެ މަގާމު ދޫކޮށްލާނެ ކަމަށް ކުރިން އިއުލާންކުރުމަށްފަހު އެ ނިންމުން ބަދަލުކޮށް ކްލަބުގައި މަޑުކުރި ފަހުންނެވެ.
ބާސާ އިން ޒަވީ ދޫކޮށްލުމުން އެ ކުލަބުން ޒަވީއަށް 12 މިލިއަން ޔޫރޯ ދައްކަން ޖެހެ އެވެ. އެހެންނަމަވެސް ޒަވީ ވަނީ އެ ފައިސާ މުޅިން މާފުކޮށްދީފަ އެވެ. ޔޫރަޕުގެ ކްލަބްތަކުގެ ކޯޗުންގެ މުސާރައަށް ބަލާއިރު ޒަވީގެ މުސާރަ އަކީވެސް ވަރަށް ކުޑަ މުސާރަ އެކެވެ.
ޒަވީ ބުނި ގޮތުގައި އޭނާ ބާސެލޯނާގެ ކޯޗުކަމާއި ހަވާލުވީ ފައިސާގެ ބޭނުމުގައެއް ނޫނެވެ. ބާސާގެ ހާލަތު ވަރަށް ދަށް ކަމަށާއި ބޭނުންވީ އެކަން ރަނގަޅުކުރުމަށް ކަމަށްވެސް ބުންޏެވެ.
ޒަވީގެ ބާކީ އޮތް އެއް އަހަރު ދުވަހުގެ މުސާރަ އެއްކޮށް މައާފު ކުރުމާ ގުޅިގެން މާލީ ހާލަތު ގޯސްވެފައިވާ ބާސާއަށް ކޮންމެވެސް ވަރެއްގެ ލުޔެއް ލިބޭނެ ކަމަށް ބެލެވެ އެވެ.
މި ސީޒަނަށްފަހު ބާސާ ދޫކޮށްލާނެކަން ޒަވީ އިއުލާން ކުރީ މިދިޔަ ޖެނުއަރީ މަހުގެ ފަހުކޮޅު އެވެ. އެއަށްފަހު ބާސާގެ ރައީސް ލަޕޯޓާއާއި އެކުގައި ކުރެވުނު މަޝްވަރާތަކަށް ފަހުގައި އޭނާ އެ ޓީމުގައި މަޑުކުރަން ފަހުން ނިންމީ އެެވެ. ނަމަވެސް ޒަވީ ދާދި ފަހުން ދިން ޕްރެސް ކޮންފަރެންސެއްގައި ދެއްކި ވާހަކަތަކަކާ ގުޅިގެން ބާސެލޯނާގެ ބޯޑާއި އޭނާއާއި ދެމެދުގައި އޮތް ގުޅުން ގޯސްވެ އެ މައްސަލަ ގަނޑުގެ ތެރެއިން ޒަވީގެ ވަޒީފާ ގެއްލުނީ އެވެ.
ޒަވީ ،44، ބާސާއާ އެކު ހަދާފައިވާ ކޮންޓްރެކްޓް ހަމަވާނީ 2025 އަހަރު އެވެ.
ލަލީގާގެ ތާވަލުގެ ދެވަނައިގައި ސީޒަން ނިންމާލި ބާސެލޯނާ އިން މިސީޒަން ނިންމާލަން ޖެހުނީ ހުސް އަތާ އެވެ. ވާދަވެރި ރިއާލް މެޑްރިޑުން ވަނީ ލީގު ކާމިޔާބުކޮށްފަ އެވެ. އަންނަ މަހުގެ ދެވަނަ ދުވަހު ކުޅޭ ޗެމްޕިއަންސް ލީގުގެ ފައިނަލަށް ވެސް ރިއާލް ދަތުރުކޮށްފައިވެ އެވެ.
ޒަވީ ބާސާގެ ކޯޗުކަމާ ހަވާލުވީ 2021 ވަނަ އަހަރު އެވެ. ޒަވީގެ އިރުޝާދުގެ ދަށުން ކުޅެ ބާސާ އިން ވަނީ މިދިޔަ ސީޒަނުގައި ސްޕެނިޝް ލީގުގެ އިތުރުން ސްޕެނިޝް ސުޕަ ކަޕް ވެސް ކާމިޔާބުކޮށްފަ އެވެ. އޭނާގެ ފުރަތަމަ ސީޒަން ވަރަށް ކާމިޔާބެވެ.