ޑިފެންސް މިނިސްޓްރީގެ މަސައްކަތްތަކަށް ގެނައި ބަދަލަށް ރުހުން ހޯދަން ރައްޔިތުންގެ މަޖިލީހަށް ހުށަހަޅައިފި އެވެ.
ޑިފެންސް މިނިސްޓްރީގެ މަސައްކަތްތަކަށް ބަދަލު ގެނެސް އެ މިނިސްޓްރީގެ ދަށުން ހިންގާ ގޮތަށް މޯލްޑިވްސް ހައިޑްރޮގްރަފިކް ސާވިސްގެ ނަމުގައި ވަކި އިދާރާއެއް މިދިޔަ މަހުގެ 19 ވަނަ ދުވަހު ރައީސް އިބްރާހިމް މުހައްމަދު ސޯލިހު ވަނީ އުފައްދަވާ އެވެ.
އެހެންކަމުން ރާއްޖޭގެ ޖުމްހޫރިއްޔާގެ ގާނޫނު އަސާސީގެ 116 ވަނަ މާއްދާގެ ދަށުން، ޑިފެންސް މިނިސްޓްރީގެ މަސައްކަތަށް ގެނައި ބަދަލު މަޖިލީހުން ފާސް ކޮށްދެއްވުމަށް އެދި ރައީސް ސޯލިހު ވަނީ މަޖިލީހަށް ސިޓީއެއް ފޮނުއްވާފަ އެވެ. އަދި އެ ސިޓީ މަޖިލީހުގެ އަމީން އާންމު ވަނީ އިއްވާފަ އެވެ.
ޑިފެންސްގެ މަސައްކަތްތަކަށް ގެނައި ބަދަލާއެކު މިހާރު އެ މިނިސްޓްރީގެ މަސައްކަތްތަކުގެ ތެރޭގައި ހަތް ދާއިރާއެއް ހިމެނެ އެވެ. އޭގެ ތެރޭގައި ރާއްޖޭގެ ދިފާއާއި ގައުމީ ސަލާމަތާ ބެހޭ ކަންކަމަާއި، ރާއްޖޭގެ ސަރަހައްދުތައް ހިމާޔަތްކޮށް ރައްކާތެރި ކުރުމާ ގުޅޭ ކަންކަން، ކާރިސާތަކާ ހާދިސާތަކާ ގުޅިގެން މަރުކަޒީ ފެންވަރުގައި ކުރަން ޖެހޭ ކަންކަން، ކަނޑާއި ވައިގެ ބަނދަރުތަކުގެ ސަލާމަތާ ރައްކާތެރިކަމާ ގުޅޭ ކަންކަން، ރާއްޖޭގެ އިމިގްރޭޝަނާ ބެހޭ ކަންކަން، އެންޓި ޓެރަރިޒަމާ ކައުންޓާ ޓެރަރިޒަމާ ގުޅޭ ކަންކަމާއި ރާއްޖޭގެ ހައިޑްރޮގްރޮފީއާ ގުޅޭ ކަންކަން ހިމެނެ އެވެ.
ޑިފެންސްގެ މަސައްކަތްތަކަށް ގެނައި ބަދަލު އިތުރަށް ދިރާސާކޮށް އެ ކަމާމެދު ގޮތެއް ނިންމުމަށް ސަރުކާރުގެ މަސްއޫލިއްޔަތު އަދާކުރާަ މިންވަރު ބަލާ ކޮމިޓީއަށް މިއަދު ވަނީ ފޮނުވާފަ އެވެ.