ޑެޕިއުޓީ ޕްރޮސެކިއުޓާ ޖެނެރަލްގެ މަގާމަށް ހައިކޯޓުގެ ކުރީގެ ފަނޑިޔާރު އަލީ ސަމީރު އައްޔަންކުރައްވައިފި އެވެ.
ޕްރޮސެކިއުޓާ ޖެނެރަލްގެ ގާނޫނުގައި އެ އޮފީހަށް ދެ ޑެޕިއުޓީ ޕްރޮސެކިއުޓާ ޖެނަރަލުން އައްޔަންކުރުމަކީ ޕްރޮސެކިއުޓާ ޖެނަރަލަށް ލިބިގެންވާ ބާރެކެވެ.
އަލީ ސަމީރުގެ އިތުރުން ޑެޕިއުޓީ ޕްރޮސެކިއުޓާ ޖެނަރަލްގެ މަގާމުގައި ދެން ހުންނެވީ މަހްމޫދު ސަލީމް އެވެ.
ހައި ކޯޓުގެ ފަނޑިޔާރު ކަމުން އަލީ ސަމީރު އިސްތިއުފާ ދެއްވީ މިދިޔަ މަހުގެ 17 ވަނަ ދުވަހު އެވެ. އިސްތިއުފާ ދެއްވި ވަކި ސަބަބެއް ހާމަކޮށްފައި ނުވި ނަމަވެސް އޭނާ އިސްތިއުފާ ދެއްވީ ޖޭއެސްސީން އަލީ ސަމީރުގެ މައްސަލައެއް ބަލަމުން ދަނިކޮށެވެ.
ހައިކޯޓުގެ ފަނޑިޔާރުކަމުގެ މަގާމަށް ސަމީރު އަދާކުރެއްވީ މާޗް 26، 2011 އިން އޭޕްރީލް 17، 2022 އަށެވެ.
ސަމީރަކީ މިސްރުގެ އަލްއަޒުހަރު ޔުނިވަސިޓީން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލް ކުރެއްވުމަށްފަހު، މެލޭޝިއާގެ އިންޓަނޭޝަނަލް އިސްލާމިކް ޔުނިވަސިޓީން ކޮމްޕަރޭޓިވް ލޯ އިން މާސްޓާސް ޑިގްރީ ހާސިލް ކުރައްވާފައިވާ ބޭފުޅެކެވެ.
ސަމީރު އަދާކުރައްވާފައިވާ މަގާމުތަކުގެ ތެރޭގައި ޖިނާއީ ކޯޓުގެ ސެކްރެޓެރީކަމާއި، މަދަނީ ކޯޓުގެ ސީނިއާ އެޑްމިން އޮފިސަރުކަމާއި، މަދަނީ ކޯޓުގެ ގާޒީ ކަމާއި، މަދަނީކޯޓުގެ އިސް ގާޒީ ކަމާއި، ސިވިލްކޯޓުގެ އިސް ގާޒީ ކަން ވެސް ހިމެނެ އެވެ.
ސަމީރަކީ ހައިކޯޓުގެ ފަނޑިޔާރުންގެ ތެރެއިން ޖޭއެސްސީގެ މެންބަރު ކަންވެސް ކުރައްވާފައިވާ ބޭފުޅެކެވެ.