ޕްރޮސެކިއުޓާ ޖެނެރަލް (ޕީޖީ) ގެ މަގާމަށް ރައީސް އޮފީހުގެ ލީގަލް ސެކެޓްރީގެ މަގާމުގައި ހުންނެވި ހ. ޔެލޯރޯސް، އައްބާސް ޝަރީފް އައްޔަންކުރައްވައިފި އެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ރަސްމިއްޔާތެއްގައި ޕީޖީގެ މަގާމަށް އައްބާސް އައްޔަންކުރައްވާ އޭނާއަށް ލިޔުން ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
ޕީޖީގެ މަގާމަށް އައްބާސްގެ ނަން ރައްޔިތުންގެ މަޖިލީހަށް ފޮނުއްވީ މި މަހުގެ 11ވަނަ ދުވަހުގެ ރޭ މަޖިލީހުގެ ދައުރުން ބޭރުގައި ބޭއްވި ފުރަތަމަ ޖަލްސާގައެވެ.
އެ ޖަލްސާގައި ވަނީ ޕީޖީގެ މަގާމަށް އައްޔަންކުރެއްވުމަށްޓަކައި މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ފޮނުއްވި ސިޓީފުޅު އިއްވާފަ އެވެ. ޕީޖީގެ މަގާމަށް އައްޔަންކުރެއްވުމަށް ރައީސް ފޮނުއްވި އައްބާސް ޝަރީފްގެ ނަން މަޖިލީހުގެ ތަޅުމަށް އިއްވުމާ ގުޅިގެން އެ މައްސަލަ ދިރާސާކުރުމަށް މަޖިލީހުގެ ރިޔާސަތުން ފޮނުއްވީ ޖުޑިޝަރީ ކޮމިޓީ އަށެވެ.
ޕީޖީގެ މަގާމަށް އައްބާސް އައްޔަންކުރަން ރައްޔިތުންގެ މަޖިލީހުން ރުހުން ދިނީ މަޖިލީހުގެ ދައުރުން ބޭރުގައި އިއްޔެ ބޭއްވި ހާއްސަ ޖަލްސާގަ އެވެ.
އެ ގޮތުން ޕީޖީގެ މަގާމަށް އައްބާސް އައްޔަންކުރަން ފެންނަ ކަމަށް މަޖިލީހުން ފާސްވީ ވޯޓު ދެއްވި 85 މެންބަރުންގެ އިއްތިފާގުންނެވެ.
ޕީޖީގެ މަގާމަށް ކުރިމަތިލުމަށް ރައީސް އޮފީހުން ފުރުސަތު ހުޅުވާލީ މިދިޔަ އޮގަސްޓް 27 ވަނަ ދުވަހު އެވެ. މިފުރުސަތުގައި އައްބާސްގެ އިތުރުން ބައެއް ބޭފުޅުން ޕީޖީގެ މަގާމަށް ކުރިމަތިލެއްވި ނަމަވެސް ރައީސް އޮފީހުން އެ ނަންތައް ހާމަކޮށްފައެއް ނުވެ އެވެ.
ޕްރޮސެކިއުޓާ ޖެނަރަލްގެ މަގާމުގައި އެންމެ ފަހުން ހުންނެވި ހުސައިން ޝަމީމް މިދިޔަ އޮގަސްޓް 22 ވަނަ ދުވަހުގެ ރޭ އިސްތިއުފާ ދެއްވާފައި ވަނިކޮށް ޝަމީމް އެ މަގާމުން ވަކިކުރަން ރައްޔިތުންގެ މަޖިލީހުން ފާސްކުރީ އެ ރޭ ބޭއްވި މަޖިލީހުގެ ޖަލްސާ ގައެވެ.