ސަފާރީއެއްގައި ހުއްޓާ ކަނޑަށް ވެއްޓުނު މީހާ ހޯދަމުން ދަނިކޮށް މަރުވެފައި އޮއްވާ ފެނިއްޖެ އެވެ.
މަރުވެފައި އޮއްވާ ފެނުނީ ނ. ހޮޅުދޫ، ސީވީޑް، އަލީ އަރުޝަދު އެވެ.
އަރިއަތޮޅު ރިސޯޓެއް ކައިރީގައި އޮތް ސަފާރީއަކުން ވެއްޓުނު އަލީ ހޯދުމުގެ މަސައްކަތް ސިފައިން ކުރަމުން ދަނިކޮށް އޭނާގެ ހަށިގަނޑު ފެނުނީ ކަނޑުގެ 69 މީޓަރު އަޑިންނެވެ.
ސިފައިންގެ ޑައިވަރުން މިހާރު ވަނީ އަލީގެ ހަށިގަނޑު ލޯންޗަށް ނަގާފަ އެވެ.
އަލީ އަރުޝަދު ރޭގެ ވަގުތެއްގައި އެންމެ ފަހުން ފެނުނީ ސަފާރީގެ ޑެކްމަތީ ހުއްޓާ ވެއްޓި އުޅަނދުގެ އަރިމަތީ ޖެހިފައި މޫދަށެވެ. އެ މަންޒަރު ވަނީ ސަފާރީގައި ހުރި ސީސީޓީވީ ކެމަރާއަށް ރެކޯޑް ވެފަ އެވެ.
އަލީ ކަނޑަށް ވެއްޓެއް ދިމާވި ވަކި ސަބަބެއް އަދި ސާފުވާ ގޮތެއް ނުވެ އެވެ.